U21. უკრაინა-საქართველო 3:3. შემოვატრიალეთ: არაბიძე, ლაკვეხელიანი... არის!

უკრაინა-საქართველო 3:3
1:0 რუსინი (7-პენ), 1:1 ლაკვეხელიანი (35), 2:1 ლედენიოვი (45), 3:1 იანჩიკი (59), 3:2 ლაკვეხელიანი (77), 3:3 ლეჟავა (85)
საქართველო: გუგეშაშვილი, მარგველაშვილი, ლოჩოშვილი, კობოური, სილაგაძე, ლაკვეხელიანი, კუცია, არდაზიშვილი, არაბიძე, ბუღრიძე, არველაძე; შეცვლაზე შევიდნენ: ლეჟავა, ძებნიაური, ქავთარაძე, კერელეიშვილი.
მწვრთნელი: გიორგი ცეცაძე
გაძევება: იანჩიკი (77), არაბიძე (90)

საქართველოს ახალგაზრდულმა ნაკრებმა ამხანაგურ შეხვედრაში უხვგოლიანი ფრე ითამაშა უკრაინასთან. გია ცეცაძის შეგირდებმა მაგრად იბრძოლეს და ლამის წაგებული თამაში შემოატრიალეს. იყო მომენტი, როცა უკრაინა ორი ბურთითაც გვიგებდა...

ძალიან სანახაობრივ შეხვედრაში დუბლი მიითვალა ლუკა ლაკვეხელიანმა. "საბურთალოს" ნიჭიერმა ფლანგელმა მცველმა ორივე შემთხვევაში გიორგი არაბიძის შესანიშნავი გადაცემა აქცია გოლად. ზოგადად, არაბიძემ ძალიან კარგად ითამაშა და უფრო კმაყოფილი ვიქნებოდით, თამაშის დასრულებამდე წამებით ადრე არბიტრს მინდვრიდან რომ არ გაეძევებინა.

ქართველთაგან ერთი გოლი ბოლნისის "სიონის" შუახაზელმა ლაშა ლეჟავამ შეაგდო. ბოლოს თამაშის მოგებაც კი შეგვეძლო. ლაკვეხელიანს ისევ არაბიძის პასით უნდა გაეტანა, მაგრამ...

არ შეიძლება, დადებითი ტენდენციები არ შეგენიშნა ჩვენი გუნდის თამაშში. თუნდაც ის, რომ არაბიძე თამაშობდა ზუსტად ისე, როგორც მისგან ველით და ძალიან მწვავე იყო ლაკვეხელიანი, რაზედაც მის მიერ შესრულებული დუბლი მეტყველებს, მაგრამ რა ვუყოთ დაცვაში დაშვებულ უამრავ შეცდომას?

გასაგებია, რომ ახალგაზრდული ნაკრების დაცვის ხაზმა ასეთი შემადგენლობით პირველად ითამაშა, მაგრამ ამდენ ლაფსუსს მაინც ვერაფრით გავამართლებთ...
ახლა უფრო დაწვრილებით ვთქვათ თამაშზე. უკრაინას სწრაფი გოლი გამოუვიდა. გიორგი კუციამ საჯარიმო მოედანში ითამაშა წესების დარღვევით. უკრაინელებმა 11-მეტრიანის შესრულების უფლება მოიპოვეს და რუსინმა ზუსტად დაარტყა.

საქართველოს ნაკრებმა ტაიმის დასრულებამდე 10 წუთით ადრე გაათანაბრა. არაბიძემ ფილიგრანული, უგრძესი პასი მისცა ლაკვეხელიანს, რომელმაც ბურთი კარგად დაამუშავა, სიტუაცია მშვენივრად შეაფასა და მეკარეს ფეხებშუა გაუტანა.

ტაიმი მაინც უკრაინელებმა მოიგეს. ლედენიოვმა შანსი მიიღო და ხელიდან არ გაუშვა. ქართველთა დაცვამ ერთხელაც ვერ შეძლო უკრაინელი შემტევების განეიტრალება. მეორე ნახევარში კიდევ უფრო უკეთესი სანახაობა ვიხილეთ.

ჩვენი მდგომარეობა თითქოს გამოუვალი გახდა მაშინ, როცა იანჩიკმა უკრაინელთა უპირატესობა ორბურთიანი გახადა, მაგრამ ქართველები ასე არ ფიქრობდნენ. მით უმეტეს, გოლის ავტორს მალე უხეშობის გამო მინდვრის დატოვება მოუხდა.

თამაში საკუთარ თავზე ისევ არაბიძემ აიღო. მან ერთი პასით "მოჭრა" მეტოქის მთელი დაცვა და გოლი ისევ ლაკვეხელიანმა გაიტანა. ისეთი პასი იყო, ერთ რამედ ღირდა მისი ნახვა...

თამაშის დასრულებას ხუთიოდე წუთი აკლდა, როცა უკრაინელთა დაცვას კიდევ ერთი ლაფსუსი მოუვიდა. ლეჟავა კარგ სიტუაციაში დარჩა და შანსიც გამოიყენა - 3:3.

ორი წლის წინ საქართველო და უკრაინა ახალგაზრდული ნაკრების დონეზე ზესტაფონში შეხვდნენ ერთმანეთს. მაშინ ჩვენს ახალგაზრდებს გია გეგუჩაძე წვრთნიდა და ის თამაშიც ასეთივე ანგარიშით მორჩა.

ცეცაძის გაწვრთნილი გუნდი მალე კიდევ ერთ ამხანაგურ თამაშს ჩაატარებს - 20 ნოემბერს კვიპროსს ესტუმრება.

ყოველდღიური სპორტული გაზეთი "ლელო"
692
მკითხველის კომენტარები / 0 /
მსგავსი ამბები
რუბრიკის სხვა სიახლეები
;