U23. საქართველოს ჩემპიონატი: გუჯეჯიანის არჩევანი

გუშინ, 25 ოქტომბერს, დიღმის ძიუდოს აკადემიაში 23-წლიანებში საქართველოს ჩემპიონატი ჩატარდა, რომელსაც ამ ასაკის მსოფლიოს პირველობაზე წასაყვანი შემადგენლობა უნდა გამოევლინა. 

ახალგაზრდული გუნდების მთავარმა მწვრთნელმა ლაშა გუჯეჯიანმა იმთავითვე განაცხადა, რომ 10-12 ნოემბერს, ჩერნოგორიის მთავარ ქალაქ პოდგორიცაში გასამართავ ამ ტურნირზე მხოლოდ საქართველოს ჩემპიონებს წაიყვანდა. თუმცა მწვრთნელს ორი წონის გაორება შეუძლია და ამ კვოტასაც იყენებს, სათანადო წონები კი ადრევე განუსაზღვრავს.

ერთი მათგანი, როგორც გუშინდელ წერილში ვივარაუდეთ, 73 კილოგრამი და ახალგაზრდებში ევროპისა და მსოფლიოს წლევანდელი ბრინჯაოს მედალოსანი, ქართული ძიუდოს ახალ ტალანტად მიჩნეული ხაშურელი ტატო გრიგალაშვილია, მეორე კი ვინ, თუ არა, უფროსებში ევროპის წლევანდელი მესამე პრიზიორი ბექა ღვინიაშვილი (90), რომლებიც გუშინდელი შეჯიბრებისგან დაასვენა. ოღონდ ღვინიაშვილის საკითხი ჯერ კიდევ არაა ბოლომდე გარკვეული, რადგან ამ დღეებში აბუ დაბიში გრან პრიზე ჭიდაობს, რამაც, შესაძლოა, ჩერნოგორიაში გასამგზავრებლად პრობლემები შეუქმნას.

საქართველოს ასაკობრივი ჩემპიონატი საკმაოდ საინტერესოდ წარიმართა და ბევრი მოულოდნელი შედეგიც ვიხილეთ. მაგალითად, 60-ში ხელი მოეცარა ახალგაზრდებში მსოფლიოს სულ ახალ ჩემპიონ ჯაბა პაპინაშვილს, ვინც მომავალ ფინალისტ ალეკო ქვრივიშვილთან დამარცხდა; 

გვარის მიუხედავად, 66-შიც მოულოდნელი ჩანს ზვიად ხუბულურის გამარჯვება თორნიკე ნაგლიაშვილის, ახალგაზრდებში მსოფლიოს მესამე პრიზიორ ბაგრატ ნინიაშვილის და სხვათა გარემოცვაში. არადა, ხუბულურმა სწორედ ნინიაშვილს, ნაგლიაშვილის მძლეველ ირაკლი ხერგიანს და ახლო წარსულში ამ წონის იმედად მიჩნეულ გიორგი გუგულაშვილს სძლია. 

81-ში თამაზ კირაკოზაშვილმა გიგა გიგაურს აჯობა, მაგრამ წააგო კობა მჭედლიშვილთან. ამან მერე ლევან გუგავასაც მოუგო, მაგრამ ფეხი სტკიოდა და ფინალში ბექა დონღვანს ვერ გაუმკლავდა. თუმცა დონღვანს წილისყრამაც რომ საოცრად გაუმართლა, გუშინაც ვწერდით.

100-ში ონისე სანებლიძემ მიყოლებით ჩამოიშორა ზაურ კენჭაძე, ნახევარფინალში - დავით რამაზაშვილი და ფინალში - დავით ოზბეთელაშვილი, თუმცა ამას მოულოდნელს ვერ დავარქმევთ. უბრალოდ, ყურადღება იმაზე შევაჩერეთ, რომ წონის ყველა ლიდერი პირადად დაჯაბნა.

მძიმე წონაც მოსალოდნელი შედეგით დასრულდა: ახალგაზრდებში ევროპის მესამე პრიზიორ გელა ზაალიშვილს ვერავინ გაუწია მეტოქეობა. მათ შორის, ვერც ფინალში მთავარმა კონკურენტმა გიორგი ლაზუაშვილმა.

ფავორიტებიდან იმიჯი გაამართლეს ბექა შავდათუაშვილმა (73) და ნოდარ ბერიანიმ (90), ვინც ასევე პირადად მოუგო მთავარ კონკურენტებს, ნიკა სიდამონიძეს და იმედა გოგოლაძეს.

როგორც გითხრით, ჩემპიონები ჩერნოგორიაში იჭიდავებენ, ჩვენ კი ტურნირის შეფასება გუჯეჯიანს ვთხოვეთ:

- სამწუხაროდ, არ გვაქვს საერთაშორისო ტურნირებზე და კონკურენციაში დაკვირვების საშუალება უფრო ძლიერი გუნდის შესაკრებად. აქედან გამომდინარე, დავიტოვეთ იმ ორი წონის გაორების ვარიანტი.

დღევანდელ ტურნირს რაც შეეხება, მაქსიმალისტი ვარ და მაქსიმუმს ვითხოვ, რომ იყოს უმაღლესი კლასის შეჯიბრება. დავინახეთ რაღაცები, რაც არ მოგვეწონა, ასევე რაღაცები, რაც მოგვეწონა, მაგრამ ახლა არ მინდა ამაზე საუბარი - ამით არ შეიცვლება არაფერი. ჩერნოგორიაში წასვლამდე შეკრების გავლას ვერ ვახერხებთ, პირდაპირ ისე წავალთ ტურნირზე.

საქართველოს 23-წლამდელთა ნაკრები
60 კგ. ირაკლი კუპატაძე
66 კგ. ზვიად ხუბულური
73 კგ. ბექა შავდათუაშვილი
81 კგ. ბექა დონღვანი
90 კგ. ნოდარ ბერიანი
100 კგ. ონისე სანებლიძე
+100 კგ. გელა ზაალიშვილი.

ყოველდღიური სპორტული გაზეთი "ლელო"
1716
მკითხველის კომენტარები / 0 /
მსგავსი ამბები
რუბრიკის სხვა სიახლეები