U23. ძიუდო. ევროპის ჩემპიონატის წინათქმა: ბექა ღვინიაშვილის ნაადრევი ფინალი

დღეს, 10 ნოემბერს, ჩერნოგორიის დედაქალაქ პოდგორიცას სპორტის სასახლეში ევროპის ჩემპიონატი იწყება 23-წლიანთა შორის, რომელშიც ჩვენი ბიჭების ნაკრები სრული შემადგენლობით იასპარეზებს, გოგონებში კი ერთადერთი მონაწილე გვეყოლება.

დღეს ჩერნოგორიაში ბიჭებიდან 60-66, გოგონებიდან კი 48, 52 და 57-ის წარმომადგენლები იჭიდავებენ. 60-ში ირაკლი კუპატაძე პირველ წრეში ესპანელ ხავიერ ლასა იგლესიასს შეხვდება, მოგების შემთხვევაში კი ახალგაზრდებში აზერბაიჯანელთა ევროპის წლევანდელი ჩემპიონი და მსოფლიოს წლევანდელი ფინალისტი კარამატ ჰუსეინოვი ელოდება.

66-ში ზვიად ხუბულურიც პირველივე წრიდან ჩაებმება საქმეში, სადაც იტალიელი ლუიჯი ბრუდეტის დამარცხებას ეცდება. ამას თუ შეძლებს, მომდევნო ორთაბრძოლას სერბ სტრაჰინია ბუნჩიჩთან გამართავს.

დღესვე იჭიდავებს ჩვენი ერთადერთი მანდილოსანი მარიამ ჯანაშვილი, ვინც ისევ თავის მშობლიურ 52 კილოგრამში დაბრუნდა. ისიც პირველივე წრეში გაირჯება უკრაინელ კატერინა ჩერტილთან პაექრობით.

* * *
ხვალ, 11 ნოემბერს, ჩერნოგორიული ტატამი 73-81-კილოგრამიან ბიჭებს და 63-70-ის გოგოებს დაეთმობათ. 73-ში იასპარეზებს ჩვენი ერთ-ერთი გამორჩეული ძიუდოისტი, ახალგაზრდებში ევროპისა და მსოფლიოს წლევანდელი მესამე პრიზიორი ტატო გრიგალაშვილი. ის თავიდან ისვენებს, მისი პირველი მეტოქე კი ბრიტანელი ერიკ ჰამისა და მოლდოველი კორნელ ანდრიეს პაექრობაში გამოვლინდება.

რაც მთავარია, პოდგორიცაში არ ჭიდაობს ამ წონის ფავორიტი, უფროსებში ევროპის ჩემპიონი, ახალგაზრდებში კი ევროპისა და მსოფლიოს მომგები ჰიდაიეტ ჰეიდაროვი, ხოლო მეორე აზერბაიჯანელი, ევროპის ფინალისტი მურად ფატიევი ბადის ზედა მხარესაა, ამ წონაში ჩვენი მეორე მონაწილის - ბექა შავდათუაშვილის მხარეს. თუმცა ჩვენებური მეორე ჯგუფშია და პირველ ორთაბრძოლას ავსტრიელ ლუკას რაიტერთან ჩაატარებს.

81-ში ბექა დონღვანი პირველი წრიდან ჩაებმება შეჯიბრებაში რუმინელ ელემერ ჟოცზისთან შეხვედრით, მოგების შემთხვევაში კი ახალგაზრდებიდან ჩვენთვის კარგად ნაცნობ უკრაინელ ბოჰდან ზუსკოსა და ლატვიელ ნიკიტა დუინოვსს შორის უმჯობესს დაეჭიდება.

* * *
ჩემპიონატის ბოლო დღეს - კვირას 90, 100 და მძიმე წონის ბიჭები იჭიდავებენ 78 და 78 კილოგრამების გოგონებთან ერთად.

90-ში ჩვენი კიდევ ერთი გამოკვეთილი ლიდერი, უფროსებში ევროპის მედალოსანი ბექა ღვინიაშვილი იჭიდავებს, ვინც თავიდან თავისუფალია, მაგრამ წილისყრამ მაინც სოლიდური გამოცდა მოუწყო: მეორე წრეში სავარაუდო მეტოქედ რუსი მიხაილ იგოლნიკოვი ჰყავს.

ის მანამდე ესპანელ მარკ საბატერ ბრაოს ხვდება და მასთან მოგება არ უნდა გაუჭირდეს. ის და ღვინიაშვილი ერთად მოდიან ახალგაზრდული ნაკრებიდან, სადაც ორივე ლამის ყველაფერს იგებდა.

რუსი ღვინიაშვილს სერიოზულ კონკურენტად ექცა - ურთიერთშეხვედრებში თითო მოგება-წაგება აქვთ. ეს ნამდვილად ნაადრევი ფინალია.

ამავე წონაში ნოდარ ბერიანი ბადის მეორე მხარესაა, პირველ შეხვედრას კი ხორვატ ანტონიო ერნეს გარასიჩთან გამართავს.

100-ში ონისე სანებლიძე ბელარუს დანიელ მუკეტეს ხვდება, ამათში მოგებულს კი მეორე წრეში უნგრელი ზალან ოჰატი ელოდება.

გელა ზაალიშვილი (+100) თავდაპირველად უკრაინელი ფედირ პანკოს დაგდებას ეცდება.

ყოველდღიური სპორტული გაზეთი "ლელო"
1484
მკითხველის კომენტარები / 0 /
მსგავსი ამბები
რუბრიკის სხვა სიახლეები