[VIDEO, ფეისბუქპრესკონფერენცია] სფფ: ვაისთან კონტრაქტის გახანგრძლივება იგეგმება, ეროვნული ლიგის განახლებაზე რამდენიმე ვარიანტია...

სფფ-ის პრეზიდენტმა ლევან კობიაშვილმა, ვიცე-პრეზიდენტმა ალექსანდრე იაშვილმა და გენერალურმა მდივანმა დავით მუჯირმა ფეისბუქკონფერენციის საშუალებით გულშემატკივართა კითხვებს უპასუხეს. ეროვნული ნაკრები და ეროვნული ტურნირები - ეს ის თემებია, რომელზეც საქართველოს ფეხბურთის ფედერაციის ხელმძღვანელებმა ილაპარაკეს.

ფეისბუქკონფერენცია 17 მარტს უეფას ვიდეოკონფერენციის გამოძახილი იყო და ძირითადად საუბარი მის შედეგებზე წარიმართა. ცხადია, მთავარი თემა იყო ევროპის ჩემპიონატი (რომელიც 2021 წლის ზაფხულისთვის გადაიდო) და მასთან დაკავშირებული პლეი ოფის ნახევარფინალური მატჩი საქართველოსა და ბელარუსის ნაკრებებს შორის, რომელიც 26 მარტს თბილისში უნდა გამართულიყო. მოგეხსენაბათ, უეფას გადაწყვეტილებით, პლეი ოფებიც გადადებულია.

ეროვნული ნაკრებები

ლევან კობიაშვილი, საქართველოს ფეხბურთის ფედერაციის პრეზიდენტი: - დღეს ყველაზე მთავარი თემა ეროვნული ნაკრების თემაა. გუშინ უეფას ვიდეოკონფერენცია შედგა, სადაც მისი წვერი 55 ქვეყანა მონაწილეობდა. მთავარი კითხვა ევროპის ჩემპიონატსა და ერთა ლიგის ნახევარფინალებს უკავშირდებოდა. ჩენთვის მთავარი ბელარუსთან 26 მარტის მატჩი გახლდათ, რომელიც გადაიდო. თამაშის სავარუდო თარიღი 2 ივნისია. თუმცა მთავარია, როგორ განვითარდება მოვლენები. იმედია, ყველაფერი უკეთესობისკენ წავა და ივნისისთვის გვექნება საშუალება, თამაშს ვუმასპინძლოთ. მაგრამ ვიმეორებთ, ესაა დღევანდელი მოცემულობა და არავინ უწყის, ხვალ და ზეგ რა მოხდება. ასევე იცით, რომ მარტში იყო დაგეგმილი 17, 19 და 21-წლამდელთა ნაკრებების თამაშები და ელიტრაუნდის მატჩები და ესეც გადაიდო.

ჩვენ ვიყავით პირველები, უეფას მატჩის გადადების მოთხოვნით რომ მივმართეთ და განცხადება გავავრცელეთ - ეს თამაში თუ ჩატარდებოდა, მხოლოდ მაყურებლის დასწრებით და რომ უმაყურებლოდ თამაშის გამართვა გამოსავალი არ იყო. მით უფრო, რომ ჩვენთვის ეს მატჩი ძალიან დიდი მნიშვნელობის გახლავთ და დიდ იმედებსაც ვუკავშირებდით. კარგია მაყურებლის ჯანმრთელობზე ზრუნვა, მაგრამ არანაკლებ მნიშვნელოვანია მოთამაშეთა ჯანმრთელობაც. მიხარია, რომ საბოლოოდ უეფამ ეს ფაქტორი გაითვალისწინა და მიმაჩნია, რომ მატჩის გადადება იდეალური გადაწყვეტილება იყო.

ბელარუსთან მატჩის გასამართად იდეალური პერიოდი? ჩვენ მარტში თამაში გვსურდა. ისტორიას თუ გადავხედავთ, ეს თვე ჩვენი ნაკრებისთვის ყოველთვის უფრო კარგი იყო, ვიდრე ივნისი. მაგრამ ახლანდელი ივნისი ჩვეულებრივი საფეხბურთო თვე არ იქნება. აქამდე ამ დროისთვის ევროპაში ჩემპიონატების უმრავლესობა დასრულებული იყო და ნაკრების ფეხბურთელების უდიდეს ნაწილს შეკრებამდე დასვენება უწევდა.  ამ შემთხვევაში, სხვადასხვა ქვეყნებში ჩემპიონატების დასრულება ყველგან გადაიწევს და შესაბამისად, ფეხბურთელები ფორმაში იქნებიან და ივნისში თამაში არ უნდა იყოს ცუდი.

ბელარუსებთან ხშირი კომუნიკაცია გვქონდა და მათთანაც, ვისაც ჩვენსავით პლეი ოფი უწევდა. აინტერესებდათ, რა ხდება ჩვენს ქვეყანაში. თუ მდგომარეობა არ გამოსწორდა და თამაში ივნისშიც გამოირიცხება, მერე გამიჭრდება იმის თქმა, სანაკრებო თამაშები როდის ჩატარდება, რადგან საერთაშორისო კალენდარში შემდგომი პერიოდი შევსებულია - ერთა ლიგის ახალი გათამაშება შემოდგომაზე უნდა დაიწყოს და არ ვიცი, კალენდარში ამ პლეი ოფის მატჩებს სად ჩასვამენ. ახლა ამის პასუხი უეფასაც არ ექნება.

ვინც ბილეთები ვერ შეიძინა და სტადიონზე ვერ მივიდოდა, მათთვის დაგეგმილი გვქონდა დიდ ქალაქებსა და დედაქალაქში ე.წ. ფანზონის მოწყობა. როცა მატჩი გაიმართება, ამას ჩვენს პარტნიორებთან და ადგილობრივ მუნიციპალიტეტთან ერთად აუცილებლად გავაკეთებთ.

17 და 19-წლამდელთა ნაკრებების ელიტრაუნდის მატჩები და გოგონათა სანაკრებო თამაშები, სავარაუდოდ, ივნისში ჩატარდება. გოგონების 19-წლამდელთა ჩემპიონატის გამართვაზე ჯერ ახალი არაფერია. იყო ლაპარაკი, რომ გაუქმდეს. დღევანდელი მონაცემებით ვიცით, რომ ჩატარდება. მაგრამ გამორიცხული არაფერია.

ეროვნული ტურნირები

სფფ-ს პრეზიდენტმა ეროვნული ლიგის გადადებაზეც ილაპარაკა: - ბევრი საინტერესო პროექტის განხორციელება გვსურდა, მაგრამ ამ ეტაპზე ეს შეუძლებელი აღმოჩნდა. კორონავირუსის საფრთხიდან გამომდინარე, თავიდანვე შევაჩერეთ სფფ-ის ეგიდით გამართული ყველა ტურნირი - ეროვნული ლიგა, ასაკობრივი ჩემპიონატები, მოყვარულთა ლიგა, ფუტსალი, ქალთა ჩემპიონატები... მათი განახლების შესახებ ინფორმაციებს ვითარების შესაბამისად მოგაწვდით.

ეროვნული ლიგის განახლების ვადებთან დაკავშირებით, სფფ-ის გენერალურმა მდივანმა დავით მუჯირმა ილაპარაკა: - მადლობა ეროვნული ლიგის ყველა გუნდს. პრევენციული ღონისძიება და რეკომენდაცია ყველას მხრიდან იქნა მხარდაჭერილი. ეს ერთსულოვნება გვაძლევს იმის საფუძველს, რომ სფფ-ის ეგიდით გამართული ყველა შეჯიბრი შეძლებისდაგვარად სრულყოფილად გაიმართება. საერთოდ, გათვლები ოპტიმისტური პროგნოზებით კეთდება და უეფამაც ასეთი სავარაუდო კალენდარული დღეები წარმოადგინა. ეს თარიღები იყო 14 აპრილიდან დაწყებული 30 ივნისის ჩათვლით - ვითარების შესაბამისად. ახლა ჩვენთან გუნდებში საწვრთნელი პროცესები შეჩერებულია. მათთან ყოველდღიური კავშირი გვაქვს და ჩვენც ორშაბათამდე ოპტიმისტურ გათვლებზე დაფუძნებულ კალენდარს შევთავაზებთ. იქნება ისეთ შემთხვევაზე გათვლილი სცენარებიც, თუ დღევანდელი ვითარება გაგრძელდება. ჩვენი პლუსია, რომ საქართველოში ევროტურნირის ყველა მონაწილე უკვე გამოვლინდა. ხოლო, სადაც "შემოდგომა-გაზაფხულის" სისტემაა, ჩემპიონატები დასამთავრებელია. ევროტურნირებზე მონაწილე კლუბები კი 30 ივნისამდე უნდა გაირკვეს. იმედი მაქვს, ეროვნული ლიგის დასამთავრებლად კლუბებს საუკეთესო ვარიანტს წარვუდგენთ...

- რაც შეეხება ბელარუსთან მატჩის ბილეთების საკითხს, ამაზე განცხადება გავაკეთეთ - ბილეთი ვინც იყიდა, სტადიონზე შესვლას ივნისშიც შეძლებს.

- ბელარუსთან მატჩის მასპინძელი სტადიონის შეცვლა და თამაშის ბათუმში გადატანა არ იგეგმება. იმედია, ბათუმის სტადიონის მშენებლობა მალე დასრულდება და ბათუმის "დინამოს" მიეცემა საშუალება, შიდა ტურნირებისა და ევროპალიგის თამაშებს საკუთარ არენაზე უმასპინძლოს.

ვაისს კონტრაქტი უმთავრდება

ვლადიმირ ვაისს საქართველოს ნაკრებთან კონტრაქტი მარტამდე აქვს გაფორმებული და თანამშრომლობა ერთა ლიგის ფინალური ეტაპის ბოლომდე იყო გათვლილი. ცხადია, ბელარუსთან მატჩის ივნისში გადატანის გამო, სლოვაკი სპეციალისტის ნაკრებში დარჩენასთან დაკავშირებით კითხვები გაჩნდა.

ამის შესახებ კომენტარი საქართველოს ფეხბურთის ფედერაციის ვიცე-პრეზიდენტმა ალექსანდრე იაშვილმა გააკეთა:

- ვლადიმირ ვაისს საქართველოს ფეხბურთის ფედერაციასთან კონტრაქტი მარტის ბოლოს, ერთა ლიგის თამაშების შემდეგ  უმთავრდება. ჩვენ მისი მუშაობით კმაყოფილები ვართ - ამიტომ არის აქამდე საქართველოს ნაკრების მთავარი მწვრთნელი. ვაისთან ყოველდღიური ურთიერთობა გვაქვს. თამაშები ივნისში თუ გვექნება, ბუნებრივია, გვსურს, რომ ამ მატჩებს მასთან ერთად შევხვდეთ. მაგრამ ამას გარკვეული დრო სჭირდება და დარწმუნებული ვარ, საკითხი დადებითად გადაწყდება.

ეროვნული ნაკრების ფეხბურთელები, საბედნიეროდ, კარგად არიან, კარანტინში არავინაა. ყველას უწევს სახლში ყოფნა. მათ ინდივიდუალური დავალებები აქვთ და ვითარების გამოსწორებას ელოდებიან.

ღუდუშაურმა ბრალი აღიარა, ტრიბუნალის ეს გადაწყვეტილება ჩემთვის მიუღებელია!..

სფფ-ს პრეზიდენტმა ლევან კობიაშვილმა ფეისბუქკონფერენციაზე "ვიტ ჯორჯიას" ყოფილ ფეხბურთელ პაატა ღუდუშაურზეც ილაპარაკა - 22 წლის თავდამსხმელზე, რომელიც გარიგებულ მატჩებთან დაკავშირებული ცნობილი სკანდალის შედეგად  თანაგუნდელებთან ერთად დააკავეს. ღუდუშაური უკვე თავისუფალია, თუმცა ფეხბურთის ფედერაციის პრეზიდენტი აცხადებს, რომ მასთან დაკავშირებით მოვლენები არასწორი ინტერპრეტაციით გაშუქდა:

"საქართველოს ფეხბურთის ფედერაციას გარიგებულ მატჩებთან და მასში რაიმე სახით მონაწილე ადამიანებთან დაკავშირებით შეურიგებელი პოზიცია ჰქონდა და სანამ მე პრეზიდენტი ვიქნები, ყოველთვის ასე იქნება. იყო ლაპარაკი, რომ ღუდუშაურთან მიმართებაში პროკურატურის მიერ მიღებული გადაწყვეტილება იყო გამამართლებელი და მას ამაში არანაირი ბრალი არ მიუძღვის. ეს არასწორია და საზოგადოება შეცდომაში შეჰყავს. უნდა დავაზუსტო, რომ განრიდება გამართლებას არ ნიშნავს - ეს მაშინ ხდება, როცა ადამიანი დანაშაულს აღიარებს. პაატამ აღიარა ის ბრალი, რაც წაუყენეს", - ამბობს კობიაშვილი.

სფფ-ს პრეზიდენტის თქმით, საფეხბურთო ტრიბუნალის გადაწყვეტილებებიდან ბევრი რამ მისთვის მიუღებელია: "ტრიბუნალმა ღუდუშაურთან დაკავშირებული გარემოებები გაითვალისწინა და შეცვალა გადაწყვეტილება, რაც ჩემთვის მიუღებელია. მსგავსი რამ ადრეც მომხდარა. სადისციპლინო კომიტეტის გადაწყვეტილება ტრიბუნალმა შეცვალა და ამას მაშინაც არ ვეთანხმებოდი. თუმცა, ტრიბუნალი იმიტომ არსებობს, რომ მხარეებმა თავიანთი პოზიციები წარმოადგინონ და თავი დაიცვან. ტრიბუნალის გადაწყვეტილებას პატივს ვცემ. მაგრამ ეს ჩემთვის მტკივნეული გადაწყვეტილებაა, ამას ვერასოდეს შევეგუები და ფეხბურთის ფედერაციას ყოველთვის უმკაცრესი პოზიცია ექნება. არ ვისურვებდი, მსგავსი რამ ქართულ ფეხბურთში ისევ მოხდეს, რადგან ეს ფეხბურთელებს, მათ ოაჯხებსა და ზოგადად საფეხბურთო სამყაროს დიდ ზიანს აყენებს".

843
მკითხველის კომენტარები / 0 /
მსგავსი ამბები
რუბრიკის სხვა სიახლეები
;