[VIDEO, შეკრების I დღე] ნაკრებს ტაბიძე და ანანიძეც გამოაკლდნენ, რეხვიაშვილი დაემატა...

საქართველოს ნაკრებმა წლის ბოლო ოფიციალური და ამხანაგური მატჩებისთვის მზადება დაიწყო. ვლადიმირ ვაისის გუნდი შვეიცარია-საქართველოს მატჩის მასპინძელი სენტ გალენის სიახლოვეს, გერმანიის ქალაქ ბად ვიორისჰოფენში იმყოფება, სადაც 3 დღე დარჩება.

შეკრების პირველ დღეს ეროვნულმა გუნდმა არასრული შემადგენლობით ივარჯიშა. ვაისის განკარგულებაში ჯერ მხოლოდ 13 ფეხბურთელია (ლაზარე კუპატაძე, ოთარ კაკაბაძე, გურამ კაშია, გია გრიგალავა, გიორგი ნავალოვსკი, ოთარ კიტეიშვილი, ვაკო გვილია, გიორგი ხარაიშვილი, ვაკო ყაზაიშვილი, ჯაბა ჯიღაური, ზურიკო დავითაშვილი, გიორგი ქვილითაია, ელგუჯა ლობჯანიძე). საკლუბო მატჩების გამო ლეგიონერების ნაწილი სავარჯიშო პროცესს 12 ნოემბრიდან შეუდგება.

ვაისის მიერ გასულ კვირას დასახელებულ შემადგენლობას, ტრავმების გამო ორი ფეხბურთელი გამოაკლდა - ჯანო ანანიძე და ჯიმი ტაბიძე. სლოვაკი მწვრთნელის გადაწყვეტილებით, საქართველოს ნაკრებს "საბურთალოს" მცველი გიორგი რეხვიაშვილი შეუერთდება. შეგახსენებთ, რომ ტრავმის გამო ნაკრებს მანამდე გამოაკლდნენ თორნიკე ოქრიაშვილი, ლაშა დვალი და საბა ლობჟანიძე.

პირველი ვარჯიშის დასრულების შემდეგ სფფ-ის ოფიციალურ ვებგვერდთან კომენტარი ოთარ კიტეიშვილმა ილაპარაკა:

"შვეიცარიის ნაკრები ძლიერი გუნდია - ევროპული ფეხბურთის ერთ-ერთი გრანდი. მათ წინააღმდეგ თბილისში ისეთი თამაში ვერ ვაჩვენეთ, როგორიც გვსურდა და 0:2 დავმარცხდით. იმ მატჩში შვეიცარიამ გვაჯობა, მაგრამ ახლა ვეცდებით, მაქსიმალურად დავიხარჯოთ, გამოვავლინოთ ჩვენი შესაძლებლობები და სასურველი შედეგი მივიღოთ.

ამ წელს ერთი ოფიციალური და ერთიც ამხანაგური შეხვედრა დაგვრჩა. ჩემი აზრით, ეს მატჩები მაქსიმალურად უნდა გამოვიყენოთ იმისთვის, რომ მარტში გასამართ ერთა ლიგის პლეი ოფებს იდეალურ ფორმაში შევხვდეთ".

ნაკრების სრული შემადგენლობა ასე გამოიყურება:

მეკარეები - გიორგი ლორია (ანორთოსისი, კვიპროსი), გიორგი მაკარიძე (სეტუბალი, პორტუგალია), ლაზარე კუპატაძე (საბურთალო);

მცველები - ოთარ კაკაბაძე (ლუცერნი, შვეიცარია), გურამ კაშია (სან ხოსე, აშშ), დავით ხოჭოლავა (შახტარი, უკრაინა), გია გრიგალავა (არსენალი, რუსეთი), გიორგი რეხვიაშვილი (საბურთალო), გიორგი ნავალოვსკი (დინამო ბთ);

ნახევარმცველები - ჯაბა კანკავა (ტობოლი, ყაზახეთი), ოთარ კიტეიშვილი (შტურმი, ავსტრია), ვაკო გვილია (ლეგია, პოლონეთი), გიორგი აბურჯანია (ტვენტე, ჰოლანდია), მურთაზ დაუშვილი (ანორთოსისი, კვიპროსი), ლევან შენგელია (ქონიასფორი, თურქეთი), გიორგი ხარაიშვილი (გიოტებორგი, შვედეთი), ვაკო ყაზაიშვილი (სან ხოსე, აშშ), ნიკა კვეკვესკირი (ტობოლი, ყაზახეთი), ჯაბა ჯიღაური (დინამო ბთ), გიორგი პაპუნაშვილი (სარაგოსა, ესპანეთი), ზურიკო დავითაშვილი (რუბინი, რუსეთი);

თავდამსხმელები - გიორგი ქვილითაია (გენტი, ბელგია), ელგუჯა ლობჯანიძე (თარაზი, ყაზახეთი), ბაჩანა არაბული (პანიონისი, საბერძნეთი).

ამას გარდა, ცნობილია კიდევ 6 ფეხბურთელის ვინაობა, რომელთაც ვაისი გაფართოებულ შემადგენლობაში განიხილავს: საბა კვირკველია (ლოკომოტივი, რუსეთი), ლაშა პარუნაშვილი (ესბიერგი, დანია), ლუკა ზარანდია (ვარეგემი, ბელგია), გიორგი მერებაშვილი (ვისლა პლოცკი, პოლონეთი), ბუდუ ზივზივაძე (მეზოკოვეშდი, უნგრეთი), ლევან კუტალია (დინამო თბ).

864
მკითხველის კომენტარები / 1 /
akinio
0
რაღაც არ ეწყობა, თორნიკე ოქრიაშვილი ტრავმის გამო არ არისო თქვენ თითონვე წერდით, (ვიდეოც იყო) კაცმა დრიბლინგები ატარა და ლამის გოლები გაიტანა, ჯანოც ძლივს სასტავში მოხვდა და ითამაშა ბოლო ტურში და გვეღადავებით?
მსგავსი ამბები
რუბრიკის სხვა სიახლეები
;