[VIDEO] ამასაც მოესწრო ქართული გუნდი!.. ვიდეორეფერის მიერ გაუქმებული გოლი და არდანიშნული პენალტი

ვიდეორეფერი ქართული გუნდის მონაწილეობით გამართულ მატჩში არასოდეს გამოუყენებიათ. 2018 წელს ფეხბურთის ფედერაციამ მისი ამუშავება სატესტო რეჟიმში სცადა. ეს იყო და ეს.

ახლა კი ამასაც მოვესწარით და ვიდეორეფერი ქართული გუნდის მონაწილეობით გამართულ მატჩში აამოქმედეს. ეს ესპანეთში მოხდა, სადაც თბილისის "ლოკომოტივის" 19-წლამდელთა გუნდი ხმელთაშუა ზღვის საერთაშორისო ტურნირში (MIC 2019) მონაწილეობს და გუშინ პლეი-ოფშიც გავიდა.

უკვე იცით, რომ ჯგუფური ეტაპის პირველ მატჩში თბილისელებმა კატალონიური "ბანიოლესი" 5:0 გაანადგურეს. გუშინ კი გადამწყვეტი დღე იყო და პლეი ოფის საგზურის მფლობელი ირკვეოდა. თბილისელებმა კატალონიურ "B1 სოკერ აკადემიასთან" 2 გოლი გაიტანეს (ბუიღლიშვილი, შეყილაძე), მაგრამ ეს საკმარისი არ აღმოჩნდა და 2:3 წააგეს.

ინგლისურ "ელიტ იუნიონ აკადემიასთან" დაპირისპირება გადამწყვეტი აღმოჩნდა. "ლოკომოტივმა" დავითაშვილისა და კონიაშვილის გოლებით 2:0 მოიგო და ტურნირის პლეი ოფში გავიდა. MIC 2019-ის მერვედფინალში თბილისელთა მეტოქე მადრიდის "ატლეტიკო" იქნება. მატჩი პარასკევს, 19 აპრილს, თბილისის დროით 20 საათზე დაიწყება.

საინტერესოა, რომ "ლოკომოტივისა" და "ელიტ იუნიონ აკადემიის" შეხვედრაში ტურნირის ისტორიაში პირველად გამოიყენეს ვიდეორეფერი. ეს მოხდა მაშინ, როცა "ლოკომოტივის" ფეხბურთელმა გოლი გაიტანა. 0:0-ზე,  თბილისელთა მცველის მიერ დარტყმულ ბურთი კარის წინ მყოფმა "ლოკომოტივის" სხვა მოთამაშემ ფეხებშუა გაატარა და გოლი გავიდა.

მაგრამ, ვიდეორეფერის ჩარევის შემდეგ, "ლოკომოტივის" ამ მოთამაშეზე თამაშგარე მდგომარეობა დაფიქსირდა, რადგან ჩაითვალა, რომ მან პირდაპირი გავლენა მოახდინა ეპიზოდზე და გოლი გაუქმდა.

მატჩში ვიდეორეფერი მეორედაც ჩაერია, როცა კუთხურის შემდეგ თბილისელთა თავდამსხმელმა კარში თავით დაარტყა და მცველმა ბურთს აშკარად ხელით შეუცვალა მიმართულება. პირველ შემთხვევაში თუ ვიდეორეფერიმ ქართველთა საწინააღმდეგოდ გადაწყვეტილება სამართლიანად მიიღო, მეორე შემთხვევაში "ლოკომოტივი" აშკარად დაიჩაგრა და ინგლისელთა კარში პენალტი არ დაინიშნა.

2404
მკითხველის კომენტარები / 0 /
მსგავსი ამბები
რუბრიკის სხვა სიახლეები
;