[VIDEO+ანალიზი] რუსთავქალაქობაზე გატეხილი ნავსი

რუსთავი
2
ლოკომოტივი
1
20.09. რუსთავი. ტექნიკური ცენტრი.
გოლები: 1:0 ქავთარაძე (50, კიტეიშვილის პასით), 2:0 ქოჩლაძე (74), 2:1 კირკიტაძე (81, შონიას პასით)
რუსთავი (4-2-3-1): მამარდაშვილი - კაპანაძე, ბუგულოვი, ნოზაძე, ლაცაბიძე - ქოჩლაძე, ვასაძე (76. ძალამიძე) - იმნაძე, კიტეიშვილი (63. სიჭინავა), სილაგაძე - ქავთარაძე (73. თევზაძე)
სათადარიგოები: კულუა, რაფაელი, ლეჟავა, ბაირამოვი
მთავარი მწვრთნელი: ვარლამ კილასონია
ლოკომოტივი (4-2-3-1): ბულისკერია - უბილავა, ჭანტურია, გურეშიძე, კომახიძე - დარცმელია, შონია - ინჯგია (62. კირკიტაძე), გოროზია (59. ანდრონიკაშვილი), მახარობლიძე (76. შეყილაძე) - სიხარულიძე
სათადარიგოები: შეროზია, გვალია, ჯიქია, ბუიღლიშვილი
მთავარი მწვრთნელი: ლევან კორღალიძე
გაფრთხილება: მახარობლიძე (71)
გაძევება: კომახიძე (55).
არბიტრი: გ. ვადაჭკორია

მატჩს თან გვარიანი ინტრიგა ახლდა. თუ "რუსთავის" მთავარი მიზანი უმაღლეს ლიგაში პლეი - ოფის გარეშე ადგილის შენარჩუნებაა, "ლოკომოტივს" ევროსაგზური ამოუჭრია გულში. აღსანიშნავია ისიც, რომ რუსთაველები მოგების შემთხვევაში გვარიანად უახლოვდებოდნენ მეტოქეს.
"რუსთავის" განაცხადში ამ შეხვედრაში ვიხილეთ ბრაზილიური წარმოშობის ებრაელი რაფაელ სოუზა და აზერბაიჯანელი ნახევარმცველი ფუად ბაირამოვი, რომელმაც ტრავმა მოიშუშა.

როცა საუკეთესოები მეკარეები არიან

თამაში დაძაბულად დაიწყო. ფეხბურთელები თავს არ ზოგავდნენ და მინდვრის ყოველი გოჯისათვის ბოლომდე იბრძოდნენ. პირველი დარტყმა "ლოკოსი" იყო - თემურ შონიას რუსთაველთა მეკარემ, გიორგი მამარდაშვილმა არ გაატანინა.

ამის მერე თამაში ძირითადად ცენტრში მიმდინარეობდა. ლუკა სილაგაძის დარტყმა ასცდა თბილისელთა კარს. მერე კი მამარდაშვილმა არ გაატანინა ირაკლი სიხარულიძეს, ვინც ჩაწოდების შემდეგ მძლავრი თავური დაჰკრა.

ტაიმის ყველაზე სახიფათო მომენტი 35-ე წუთზე ვიხილეთ. "რუსთავმა" მრავალსვლიანი, კარგი კომბინაცია ჩაათამაშა, ბექა ქავთარაძემ თითქოს საგოლედაც მოიქნია, მაგრამ შესანიშნავად ითამაშა "ლოკოს" მეკარემ, დემეტრე ბულისკერიამ და ბურთი მოიგერია.

პირველ ტაიმში "რუსთავი" უფრო დიდხანს ფლობდა ბურთს, მაგრამ საერთო ჯამში თამაში თანაბარი იყო.



უყურადღებობისათვის დასაჯეს

მეორე ტაიმი "რუსთავმა" აქტიურად დაიწყო და ხუთ წუთში გაიტანა კიდეც. მასპინძელთა სასარგებლოდ სტანდარტი დაინიშნა. სანამ თბილისელები დაეწყობოდნენ, "რუსთავმა" ჯარიმა გაათამაშა და ბექა ქავთარაძემ საგოლე შანსი ხელიდან აღარ გაუშვა. ამ ეპიზოდში მახვილგონივრულად იმოქმედა პაატა კიტეიშვილმა, ვინც სწრაფად გაათამაშა ბურთი.

გაშვებული გოლის შემდეგ "ლოკომ" შეუტია და სახიფათოდაც, მაგრამ ლუკა ნოზაძემ თავდადებული თამაშით განმუხტა სიტუაცია. "ლოკომოტივის" მდგომარეობა კი კიდევ უფრო დამძიმდა მას შემდეგ, რაც გვერდით მსაჯთან კონსულტაციის შემდეგ არბიტრმა ვადაჭკორიამ მინდვრიდან ლოკომოტიველი ირაკლი კომახიძე დაითხოვა.

მერე იყო "ლოკომოტივის" ორი ძალიან კარგი მომენტი. ჯერ შეტევაში ჩართულ სანდრო გურეშიძეს აუცდა თავური, მერე კი მასპინძელთა უყურადღებობით ირაკლი სიხარულიძემ ვერ ისარგებლა.უკანასკნელ წამს მას გატანაში ხელი მამარდაშვილმა შეუშალა.

ყველაფერი თითქოს შეხვედრის 74 - ე წუთზე გადაწყდა. "ლოკო" მოკლე პასებით ცდილობდა შეტევაში წასვლას. ამ დროს ბურთი მასპინძლებმა ჩაჭრეს და მათ რიგებში ერთ-ერთმა საუკეთესომ, ლაშა ქოჩლაძემ მეორე შეაგდო.

ასე არ ფიქრობდა დავით კირკიტაძე. დათომ მაღალ სისწრაფეზე შესანიშნავი რეიდი განახორციელა, კარში დაარტყა კიდეც და მცირე რიკოშეტიც დაიხმარა - 2:1. თამაში დაიძაბა.

87-ე წუთზე შესანიშნავად ითამაშა გიორგი მამარდაშვილმა - რუსთაველმა მეკარემ კირკიტაძის სახიფათო, ძალიან ეშმაკური დარტყმა მოიგერია. თამაშის დასრულებამდე მომენტები ორივე გუნდს ჰქონდა. სტუმართაგან ირაკლი სიხარულიძესა და დავით უბილავას, მასპინძელთაგან კი ლუკა სილაგაძეს, მაგრამ გოლი აღარ გასულა.

"რუსთავმა" "ლოკოს" ამ სეზონში პირველად მოუგო და უაღრესად მნიშვნელოვანი სამი ქულა ჩაიწერა აქტივში.

აღსანიშნავია, რომ 20 სექტემბერს რუსთავში რუსთავქალაქობა იზეიმეს - ამ მოგებამ ეს დღესასწაული კიდევ უფრო გაალამაზა...

360
მკითხველის კომენტარები / 0 /
მსგავსი ამბები
რუბრიკის სხვა სიახლეები
;