[VIDEO] ახალი ისტორია NBA-ში: პირველად აშშ-ის ფარგლებს გარეთ... ფინალი სუპერმატჩით დაიწყო

ეროვნული საკალათბურთო ასოციაციის ფინალური სერიის მატჩი პირველად გაიმართა ამერიკის შეერთებული შტატების გარეთ - კანადაში "ტორონტომ" მოგებით დაიწყო გადამწყვეტი სერია "გოლდენ სტეიტის" წინააღმდეგ - 118:109.

ჩემპიონი ზედიზედ მეხუთე თამაშობს ფინალში. წინა ოთხ წელიწადში "გოლდენ სტეიტი" მოგებით იწყებდა ფინალს, მაგრამ, ახლა, ეს ტრადიცია დაირღვა.
"უორიორზი" რამდენჯერმე იყო წინ პირველ მეოთხედში და ერთხელ - მეორეში. მეორე ტაიმში "ტორონტომ" ანგარიშის გათანაბრების საშუალებაც არ მისცა მეტოქეს და თითქმის სულ 8-10 ქულით იყო წინ. მასპინძლებს ერთი კრიტიკული მომენტი მეოთხე მეოთხედში დაუდგათ, როცა "გოლდენ სტეიტმა" სამ ქულამდე შეამცირა სხვაობა, მაგრამ იქვე "რეპტორზმა" 7:0 გაქცევა მოაწყო და აღადგინა 10-ქულიანი უპირატესობა.

სტუმრებმა ძირითადი დარტყმა არა კავაი ლეონარდისგან, არამედ პასკალ სიაკამისგან მიიღეს, რომელმაც 17-დან 14 (!) ტყორცნა ჩააგდო და 32 ქულა დააგროვა. მესამე მეოთხედში, როცა "ტორონტომ" ორნიშნა უპირატესობა მოიპოვა, სიაკამს ტყორცნა არ აუცილებია - ექვსიდან ექვსი გამოიყენა.

"გოლდენ სტეიტმა" ისევ კევინ დურანტის გარეშე ითამაშა, სამაგიეროდ, გუნდს დაუბრუნდა დემარკუს კაზინსი, თუმცა, მისთვის დიდი დრო არ მიუციათ - რვა წუთში ცენტრს სამი ქულა, ორი პასი და ორი ჩაჭრა ჰქონდა.



ტორონტო-გოლდენ სტეიტი 118:109
25:21, 34:28, 29:32, 30:28
ტ: სიაკამი (32+8 მოხსნა+5 პასი), ლეონარდი (23+8 მოხსნა+5 პასი), მ. გასოლი (20+7 მოხსნა), დენი გრინი (11), ლაური (7+6 მოხსნა+9 პასი) - სასტარტო; ვანვლიტი (15), იბაკა (5), მაკოუ (3), პაუელი (2).
გ-ს: კარი (34+5 პასი), ტომპსონი (21), დრეიმონდ გრინი (10+10 მოხსნა+10 პასი), იგუოდალა (6+6 მოხსნა+7 პასი), ბელი (2) - სასტარტო; ლუნი (9), ლივინგსტონი (6), კუკი (6), მაკინი (6), ჟერებკო (6), კაზინსი (3).
სერია: 1-0

2052
მკითხველის კომენტარები / 0 /
მსგავსი ამბები
რუბრიკის სხვა სიახლეები
;