[VIDEO] გოლდენ სტეიტის კარგი და ცუდი ამბავი: მეორედ დაკარგული დურანტი და მეორე მოგება ფინალში

"გოლდენ სტეიტი" იოლად არ თმობს ჩემპიონობას. სტუმრად ზედიზედ ორი მატჩის მოგების შემდეგ, "ტორონტოს" შეეძლო შინ დაეხურა ფინალური სერია და არსებობის ისტორიაში პირველად მოეპოვებინა ჩემპიონის ტიტული, მაგრამ ასე არ მოხდა.

"უორიორზს" დაუბრუნდა კევინ დურანტი. სამწვრთნელო შტაბმა გარისკა და ცხრამატჩიანი პაუზის შემდეგ, სასტარტო ხუთეულში დააყენა ფორვარდი. როგორც გაირკვა, ეს გაუმართლებელი ნაბიჯი იყო - დურანტმა 11 წუთი ითამაშა, 11 ქულა დააგროვა და... მეორე მეოთხედის სტარტზე ისევ დაიმტვრა, სავარაუდოდ, სეზონის ბოლომდე.

წესით, ეს სერიოზული ფსიქოლოგიური დარტყმა უნდა ყოფილიყო "გოლდენ სტეიტისთვის", მაგრამ ასე არ მოხდა, პირიქით, მესამე მეოთხედში სტუმრებმა ყველაზე დიდი უპირატესობა დააფიქსირეს - 14 ქულით გავიდნენ წინ.

დურანტის დანაკლისმა მაინც იჩინა თავი. მეოთხე მეოთხედის მეორე ნახევარში "ტორონტომ" 12:2 გაქცევა მოაწყო და ექვსი ქულით გავიდა წინ სირენამდე სამწუთნახევრით ადრე. ეს კანადელთა პირველი დაწინაურება იყო საწყისი მეოთხედის შემდეგ.

თითქოს, ამ გაქცევით "რეპტორზმა" გადაწყვიტა მატჩის, სერიისა და სეზონის ბედი, მაგრამ "გოლდენ სტეიტმა" მეტოქის სპურტს თავისი გაქცევით უპასუხა - სტეფ კარიმ და კლეი ტომპსონმა ზედიზედ სამი სამქულიანი ჩააგდეს, დაახლოებით ორ წუთში 9:0 გაიქცნენ და დამსახურებული გამარჯვებაც მოუტანეს საკუთარ გუნდს.

სერიის მეექვსე მატჩი თბილისის დროით, პარასკევს დილით გაიმართება.



ტორონტო-გ. სტეიტი 105:106
28:34, 28:28, 22:22, 27:22
ტ: ლეონარდი (26+12 მოხსნა+6 პასი), ლაური (18+6 პასი), მ. გასოლი (17+8 მოხსნა), სიაკამი (12), დენი გრინი (4) - სასტარტო; იბაკა (15+6 მოხსნა), ვანვლიტი (11), პაუელი (2).
გ-ს: კარი (31+8 მოხსნა+7 პასი), ტომპსონი (26+6 მოხსნა), დურანტი (11), დრეიმონდ გრინი (10+10 მოხსნა+8 პასი), იგუოდალა (5+4 დაფარება) - სასტარტო; კაზინსი (14+6 მოხსნა), ლუნი (4), კუკი (3), ბელი (2).
სერია: 3-2

1361
მკითხველის კომენტარები / 0 /
მსგავსი ამბები
რუბრიკის სხვა სიახლეები
;