[VIDEO] გრიგალავამ სპარტაკის ფორვარდებს გასაქანი არ მისცა. ქართველი მცველი რუსულ სიმბოლურსა და გრანდების ინტერესთა სფეროში

რუსული პრემიერლიგის მე-15 ტურის სიმბოლურ ნაკრებში გია გრიგალავა დაასახელეს. საქართველოს ნაკრების ნახევარმცველი ტურის თერთმეტ რჩეულ ფეხბურთელში სტატისტიკის საერთაშორისო ვებგვერდმა, "სოფასქორმა" შეიყვანა.

როგორც იცით, ტულის "არსენალმა" ჯანო ანანიძის "სპარტაკს" მოსკოვში 1:0 მოუგო. გრიგალავა, ტრადიციულად, "მეთოფეთა" ძირითად შემადგენლობაში იყო და შეუცვლელად იასპარეზა. ქართველმა მცველმა მოსკოველ თავდამსხმელებს გასაქანი არ მისცა და ეს სტატისტიკიდანაც ჩანს - "სოფასქორმა" მას 10-ბალიანი სისტემით 7,6 ქულა დაუწერა.

ტულელი მცველების კარგი თამაში კიდევ ერთმა სტატისტიკურმა გვერდმა - whoscored.com-მა დააფასა, სადაც "არსენალში" ყველაზე მაღალი შეფასება მცველებს ჰქონდათ, მათ შორის კი გამორჩეული ისევ და ისევ გრიგალავა იყო - 7,5 ქულა.

მიმდინარე სეზონში "არსენალში" გრიგალავამ 15-დან 13 მატჩი (თან ყველა შეუცვლელად) ჩაატარა და 1 გოლი გაიტანა, ტურის სიმბოლურ ნაკრებში საქართველოს ნაკრების მცველი მიმდინარე სეზონში მეოთხედ მოხვდა.

2019 წელს თუ რომელიმე ფეხბურთელმა გამოიჩინა თავი სტაბილურობით და მაღალ დონეზე ითამაშა, მათ შორის ერთ-ერთი უთუოდ გრიგალავაა. რუსულ ლიგაში წარმატებული თამაშით, მან ხანგრძლივი პაუზის შემდეგ საქართველოს ნაკრების ძირითად შემადგენლობაში დაბრუნებაც მოახერხა. ირლანდიასა და დანიასთან გამოჩნდა, რომ გრიგალავა ერთ-ერთი ყველაზე საიმედო და ბრძოლისუნარიანი მცველია, ვისაც კი ბოლო წლებში "ჯვაროსნების" ფორმა მოურგია.

რაც მთავარია, ის ვლადიმირ ვაისმა ის მისთვის ბუნებრივ პოზიციაზე, ცენტრალურ მცველად დააყენა. გრიგალავა ბავშვობიდან ამ პოზიციაზე თამაშობდა, საქართველოს ნაკრებში კი მარცხენა მცველად აყენებდნენ, რაც მისთვსის უცხო როლია და ცხადია, თავის გამოჩენას ვერ ახერხებდა. რუსული პრემიერლიგის სიმბოლურ ნაკრებშიც სწორედ ამ ამპლუაში დაასახელეს.

შემთხვევითი არ არის, რომ გრიგალავა ამჟამად ყველაზე ძვირად ღირებულ ქართველ ფეხბურთელთა ხუთეულშია - "ტრანსფერმარკტის" შეფასებით, მისი პირობითი ღირებულება 1,75 მილიონი ევროა. გრიგალავას უსწრებენ მხოლოდ საბა კვირკველია ("ლოკომოტივი", 10.0 მლნ ევრო), გიორგი ჩაკვეტაძე ("გენტი", 9.0), დავით ხოჭოლავა ("შახტარი", 5.0) და გიორგი ქვილითაია ("გენტი", 2.5).

ბოლო ინფორმაციებით, გრიგალავათი "არსენალზე" ბევრად უკეთესი კლუბები დაინტერესდნენ. "ლელომ" შეიტყო, რომ 29 წლის ქართველს რუსეთის პრემიერლიგის სამეულის გუნდში იწვევენ. რამდენად რეალურია ეს ტრანსფერი, უახლოეს პერიოდში გამოჩნდება. მაგრამ პრობლემა ის არის, რომ გრიგალავას "არსენალთან" კონტრაქტი 2021 წლის 30 ივნისამდე აკავშირებს და მასში გაცილებით მეტ თანხას ითხოვენ, ვიდრე "ტრანსფერმარკტი" ასახელებს...

1364
მკითხველის კომენტარები / 0 /
მსგავსი ამბები
რუბრიკის სხვა სიახლეები
;