[VIDEO] დაწერეთ: ეს მატჩი მალხაზმა მოიგო!.. რუსეთის პრემიერლიგის ისტორიაში საუკეთესო მატჩის გმირი ქართველია!

რუსულმა გამოცემა championat.com-მა იქაური საფეხბურთ ჩემპიონატების ისტორიიდან 10 საუკეთესო მატჩი გაიხსენა. ამ ათეულში კი 3 ისეთი მატჩია, რომელშიც გმირი თუ ანტიგმირი ქართველი იყო, საუკეთესო კი მალხაზ ასათიანი აღიარეს...

10. მფრინავი ოქრიაშვილის მაკრატელა

კრასნოდარი-ზენიტი 2:1
2016 წლის 27 ნოემბერი, XV ტური

მე-10 ადგილზე გავიდა "კრასნოდარისა" და სანკტ-პეტერბურგის "ზენიტის" მატჩი, რომელიც კრასნოდარელებმა 2:1 მოიგეს. საინტერესოა, რომ მასპინძლები 92-ე წუთამდე აგებდნენ, მერე ანგარიში გაათანაბრეს, ხოლო 94-ე წუთზე თორნიკე ოქრიაშვილმა ფანტასტიკური "მაკრატელათი""კრასნოდარს" 3 ქულა და ისტორიაში ყველაზე დასამახსოვრებელი მოგება მოუტანა.

"თავის ახალ სტადიონზე "კრასნოდარმა" "ზენიტთან" "მანჩესტერ იუნაიტედი"-"ბაიერნის" ლეგენდარული ფინალის რიმეიკი შეასრულა. თორნიკე ოქრიაშვილის "მაკრატელა" ახლაც გემახსოვრებათ. ნოემბრის იმ საღამოს "კრასნოდარი" რუსეთის ჩემპიონატში პირველი გუნდი გახდა, რომელმაც დამატებულ მე-2 წუთზე აგებდა და არა მხოლოდ წონასწორობის აღდგენა, არამედ გამარჯვებაც მოახერხა", - წერს championat.com.

4. რევიშვილის გუნდის ფიასკო თუ რაღაც სხვა...

მორდოვია-ცსკა 4:6
2015 წლის 20 სექტემბერი, IX ტური

"სარანსკის მოკრძალებული სტადიონზე "მორდოვიამ" და მოსკოვის ცსკა-მ ნამდვილი შოუ დადგეს, რომელაც ამ გუნდების გულშემატკივრები ვალიდოლის გარეშე ვერ უყურებდნენ... მატჩის დასრულების შემდეგ ორივე მწვრთნელმა აღიარა, რომ მათ კარიერაში ასეთი რამ არასოდეს ყოფილა. ცსკა რუსეთის ჩემპიონატში მეორე კლუბი გახდა მოსკოვის "ლოკომოტივის" შემდეგ, რომელიც 0:3 აგებდა, მაგრამ საბოლოოდ, მაინც მოიგო", - ვკითხულობთ championat.com-ის განმარტებაში.

ამ შეხვედრაში თანაგუნდელების შეცდომებისა თუ "მაიმუნობებისთვის" ყველაზე მძიმე დარტყმა "მორდოვიას" ქართველმა მეკარემ, საქართველოს ნაკრების ყოფილმა გოლკიპერმა ნუკრი რევიშვილმა მიიღო. თამაშს სათადარიგოთა სკამიდან ადევნებდა თვალს მამუკა კობახიძე, რომელიც ასევე სარანსკელთა რიგებში ირიცხებოდა.

1. ასათიანის საჩემპიონო ბრწყინვალება

ლოკომოტივი-სპარტაკი 4:3
2007 წლის 23 სექტემბერი, XXIV ტური

პირველ ადგილზე გავიდა მოსკოვის "ლოკომოტივისა" და "სპარტაკის" მატჩი, რომელიც 2007 წელს გაიმართა და "რკინიგზელებმა" მალხაზ ასათიანის გოლით 4:3 მოიგეს.

"შესაძლოა, რუსეთის ჩემპიონატის ამ მატჩს ვერცერთი თამაში ვერ შეედრება დაძაბულობით, ინტრიგით, დრამატულობით და პლუს ამას - ფეხბურთის ხარისხით. "ჩერკიზოვოში" გუნდებმა გულშემატკივრებს ნამდვილი თრილერი აჩუქეს გამაოგნებელი ფინალი - ასათიანმა გადამწყვეტი გოლი თავით მე-4 დამატებულ წუთზე გაიტანა. თამაშის დასრულების შემდეგ, "ლოკომოტივის" და სერბეთის ნაკრების მცველმა ბრანისლავ ივანოვიჩმა გამარჯვების გოლის ავტორი შეაქო და ჟურნალისტებს სათაურიც უკარნახა: "დაწერეთ, რომ მატჩი მალხაზმა მოიგო". გოლის ავტორმა თავად ირონიულად თქვა, რომ ბურთი ურალოდ თავში მოხვდა", - წერს championat.com.

6459
მკითხველის კომენტარები / 0 /
მსგავსი ამბები
რუბრიკის სხვა სიახლეები
;