[VIDEO] დიდი ჩხუბის უცნობი სლოვაკური ვერსია და აუცილებელი კითხვა: რატომ გააძევეს სლოვაკების მეკარეთა მწვრთნელი?

რა მოხდა ნიტრაში, სადაც ევროპის ახალგაზრდული ჩემპიონატის შესარჩევ ციკლში საქართველოს ნაკრები სლოვაკეთთან 2:3 დამარცხდა? არბიტრმა 5 წითელი ბარათი გამოიყენა, აქედან 2 - მოთამაშეებს უჩვენა, ხოლო 3 - საადარიგოთა სკამზე მსხდომ, რომლებმაც ერთმანეთში ჩხუბეს...

თუ რა მოხდა რეალურად, ამის თაობაზე ჯერ ზუსტი პასუხი არ არის, მაგრამ მიახლოებით სურათი მაინც ცნობილი გახდა. მატჩის ბოლოს, დამატებულ მეორე წუთზე, როდესაც ანგარიში 3:2 იყო, აუტის მოწოდებისას გიორგი კუციას სლოვაკებმა ხელი შეუშალეს. თავად კუცია იხსენებს, რომ ბურთის აღებისას, სლოვაკების მეკარეთა მწვრთნელმა უკნიდან ხელი ჰკრა და ბურთი რომ აიღო, ფეხი გამოსდო და ბურთი წაართვა.

სწორედ ამან გამოიყვანა წყობიდან საქართველოს ახალგაზრდული ნაკრების მთავარი მწვრთნელი გია ცეცაძე. მას მასპინძელი გუნდის მეკარეთა მწვრთნელი და ბოლოს მთავარი მწვრთნელი ადრიან გულაც "გაექაჩნენ"...

საბოლოოდ, არბიტრმა წითელი ბარათი აჩვენა ცეცაძეს, ჩვენი სათადარიგოებიდან კიდევ ერთს და მეტოქე გუნდის მეკარეთა მწვრთნელ პაველ კამეშს - ინციდენტი სწორედ ამ უკანასკნელის საქციელმა გამოიწვია.

მომხდარზე სხვაგვარი განმარტება გააკეთეს სლოვაკეთის ფეხბურთის ფედერაციის ოფიციალურად საიტზე.

"როცა ანგარიში 3:2 იყო, გიორგიკუცია აუტს აწოდებდა. მაგრამ ის მცველებმა შეაჩერეს. ამის შემდეგ სლოვაკეთის მწვრთნელის ასისტენტმა შეცვლის განხორციელება გადაწყვიტა. უსიამოვნება ამ დროს მოხდა და ქართველების მწვრთნელის გაღიზიანება გამოიწვია, რის გამოც გია ცეცაძემ წითელი ბარათი მიიღო", - წერია სლოვაკეთის ფეხბურთის ფედერაციის ოფიციალურ გვერდზე.

სლოვაკების  21-წლამდელთა მთავარმა მწვრთნელმა ადრიან გულამ ინციდენტზე შემდეგი თქვა: "ეპიზოდი კარგად არ დამინახავს, თუმცა ვიცი, რომ რაღ?ც მოხდა".

გამოცემა "სპორტსკიმ" თამაშზე წერილი შემდეგი სათაურით გამოაქვეყნა - "მასობრივი შეტაკებები და წითელი ბარათები"... აქ მოთხრობილია ქართველთა აგრესიულობაზე, მაგრამ რა დააშავა სლოვაკთა მეკარეების მწვრთნელმა, რომელიც გააძევეს, ამაზე არაფერი წერია. მაშ რა გამოდის? ტყუილად ხომ არ გააძევებდნენ?!

"როგორც კი ანგარიში 2:3 გახდა, ქართველებმა იგრძნეს, რომ თამაშის გადარჩენა შეიძლებოდა და სწრაფად გადაწყვიტეს ბურთის აუტიდან შემოტანა. თუმცა, ბურთი დროულად ვერ მიიღეს. ამან სათადარიგოთა სკამზე მყოფთა შორის ჯერ მკვეთრი სიტყვიერი დაპირისპირება გამოიწვია, შემდეგ - შეტაკებები. მისი მთავარი გმირი იყო სტუმართა მთავარი მწვრთნელი გიორგი ცეცაძე და ქართველთა ჯგუფის კიდევ ერთიწევრი. ისინი სლოვაკეთის სათადარიგოებს მიეჭრნენ. მსაჯმა მათთან ერთად წითელი ბარათი სლოვაკეთის მეკარეების მწვრთნელ პაველ კამეშსაც აჩვენა", - წერს გამოცემა.

"ბიჭებმა მითხრეს, რომ ბურთი ფეხებშუა გაატარეს, მაგრამ მოწინააღმდეგეს შეეხო. მსგავსი რამ მოხდა გერმანიის ბუნდესლიგაში, კერძოდ - ფრანკფურტში. მე შორს ვიდექი, რადგან პირველ ტაიმში არბიტრმა ყვითელი ბარათი მიჩვენა",- განმარტა ადრიან გულამ, რომლის თქმითაც ინციდენტში არ მონაწილეობდა.

მოედანზე მყოფ სლოვაკ ფეხბურთელებს ეს მომენტი არ გამოეპარებოდათ, როცა ქართველების ემოციებმა იფეთქა. ამასთან, ისინი კონკრეტულად ვერ ამბობენ, ეს რამ გამოიწვია.

"ეს დაპირისპირება არ დამინახავს. მწვრთნელებმა გვითხრეს, რომ მოედანზე დავრჩენილიყავით. ასეთ ვითარებაში ემოციები ყველამ უნდა მოთოკოს", - ამბობს სლოვაკების ფეხბურთელი მარტინ გამბოში, რომელმაც გოლი გაგვიტანა.

ვითარება უფრო დეტალურად კრისტიან ჰერცმა აღწერა, რომელიც ამ დროისთვის შეცვლილი იყო: "რაც მოხდა, ეს უკვე ემოციების შედეგი იყო. მათ გაიტანეს და იგრძნეს შანსი, ამიტომ ვითარება დაიძაბა. ამან გამაკვირვა, რადგან ეს იყო ჩვეულებრივი მომენტი - ჩვენ მათ ბურთი არ მივეცით, მაგრამ ქართველ მოთამაშეს არავინ შეხებია. ამ დროს საქართველოს ნაკრები მთელი გუნდით ჩვენკენ გამოიქცა. საბედნიეროდ, ამან შედეგზე არ იმოქმედა" .

"სპორტსკი" წერს: "მატჩის დასასრულს სათადარიგოთა ბანაკებს შორის დაპირისპირება მოხდა და სამი კაცი გააძევეს. ქართველების მთავარმა მწვრთნელმა ამ გადაწყვეტილების შემდეგ მეოთხე მსაჯს შეაფურთხა დაშესაძლოა, ამის გამო დამატებით დაისაჯოს".

2833
მკითხველის კომენტარები / 1 /
ლადო
0
ძალიან ცუდათ იქცევით სლოვაკების ვერსიები კიარა ქართული მხარის სიმართლე დაწერეთ ნუ შეგყავთ ხალხი შეცდომაში ასეთი მშიშრები როგორხართ რო დაწეროთ სლოვაკები მოიქცენ უღირსად მოიძიოთ ის კადრი სადაც ასახულია ეს მომენტი მაგრამ თქვენ ფეხებზე გკიდიათ მოწინააღმდეგე თვითმხილველების მოსაზრებებს ბეჭდავთ და უკვე 2 დღეა არცერთმა არ დაწერეთ სიმართლე
მსგავსი ამბები
რუბრიკის სხვა სიახლეები
;