[VIDEO] დინამომ ლოკომოტივთან ზავით დაიწყო. არგენტინელმა სუპერკომბინაცია დააგვირგვინა

თურქულ შეკრებაზე მყოფმა "დინამომ" პირველი ამხანაგური მატჩი გამართა. თბილისურ კლუბს მეტოქეობა პლოვდივის "ლოკომოტივმა"  გაუწია. გუნდებმა თამაში აქტიურად და ხისტად დაიწყეს. პირველი სახიფათო შეტევა მე-18 წუთზე დინამოელებმა განახორციელეს - ლევან კუტალია გაიჭრა მეტოქის კარისკენ და ბურთის მეკარისთვის თავზე გადაგდებაც დააპირა, თუმცა არ გამოუვიდა.

სამაგიეროდ, მომდევნო შეტევა შედეგიანი გამოდგა - გიორგი კუხიანიძის ზუსტი გადაცემის შემდეგ მარჯვენა ფლანგიდან ლევან შენგელია საჯარიმოში შეიჭრა, ჩააწოდა და არგენტინელმა ანტონიო როხანომ ანგარიში გახსნა.

თამაში იმავე რიტმში გაგრძელდა, 25-ე წუთზე "დინამო" სტეპან სიკაჩმა იხსნა. ცოტა ხანში ფრან კაბრია, რომელიც მთელი მატჩის განმავლობაში აქტიური იყო, დაუსხლტა ვიზავის, მეტოქის კარისკენ გაიჭრა, მაგრამ მცველმა წესების დარღვევით შეაჩერა. მსაჯმა წითელი ბარათი კი გამოიყენა, თუმცა, შეთანხმების მიხედვით, გუნდებმა თამაში სრული შემადგენლობით გააგრძელეს.

მე-40 წუთზე "ლოკომოტივმა" გაითამაშა კომბინაცია, რომლის შედეგად ანგარიში გათანაბრდა. ამას ორიოდე წუთში დმიტრო ივანისენიას შორეული დარტყმა და გოლი მოჰყვა - "დინამო" კვლავ დაწინაურდა.

მეორე ტაიმის დასაწყისიდან ზაურ სვანაძემ ცვლილებები განახორციელა, თამაშის კი რიტმი კი არ შეცვლილა. 55-ე წუთზე დინამოელეთა სახიფათო კომბინაციას ესპანელი კაბრია ტექნიკური დარტყმით აგვირგვინებდა, მაგრამ მეკარემ ბოლო წამს ბურთი კუთხურზე მოიგერია.

სვანაძის შეგირდებმა კიდევ შექმნეს მომენტები, თუმცა აკაკი შულაიამ, მიხეილ ერგემლიძემ და ლევან კუტალიამ შანსები გამოიყენეს. ბოლო ათ წუთში მეტოქემ ორი სახიფათო შეტევა განახორციელა. პირველ შემთხვევაში დინამოელთა მეკარე ხოსე პერალესმა იხსნა გუნდი, მერე კი თბილისელთა კარში დაინიშნა პენალტი, რომელიც გოლად იქცა. საბოლოოდ - 2:2.

დინამოელთა შორის არ უთამაშიათ მხოლოდ ნიკა ნინუასა და ბაქარ ქარდავას, რომელთაც მცირე ტრავმები აწუხებთ.  

"დინამო": სიკაჩი (30. მამარდაშვილი/60. პერალესი), რუხაია, მეჯუბი (53. გაბიტაშვილი), კობოური (66. ქაფიანიძე), იაშვილი (46. ძოწენიძე), ივანისენია (46. პაპავა), კუხიანიძე (46. ზარია), შენგელია (56. შულაია), კაბრია, კუტალია, როხანო (58. ერგემლიძე).

მომდევნო მატჩს დინამო 1 თებერვალს, სუბოტიცას (სერბეთი) "სპარტაკთან" გამართავს.

ყოველდღიური სპორტული გაზეთი "ლელო"
1335
მკითხველის კომენტარები / 0 /
მსგავსი ამბები
რუბრიკის სხვა სიახლეები
;