[VIDEO] ევროპალიგა. ფოლა 1:2 ჩიხურა: ჩიხურამ ფოლას შემოუტრიალა. ბრავო ჩიხურა, ბრავო ფრუიძე! [ვრცელი მიმოხილვა]

ფოლა 1
ჩიხურა 2

1:0 სინანი (22-პენ), 1:1 სარდალიშვილი (59), 1:2 კორიფაძე (86-პენ)

ფოლა (4-1-4-1): კაბრალი - სედრიკი, ბერნარდი, კლაინი, მერში - ბრუნო - სეიდი, სინანი (88. ოსარიო), მუარემოვიჩი, კორალი (86. ზაკი) - კარნონი (76. დრიფი)
სათადარიგოები: მურა, ჰაჯი, ოსარიო, მონტეირო, ჰიმი 
მწვრთნელი: ჯეფ შტრასერი

ჩიხურა (4-4-2): ჰამზიჩი - კორიფაძე, მაისაშვილი, მამასახლისი, ჩიკვაიძე - ლეკვთაძე (77. ფანცულაია), მარკოზაშვილი, ჩიტეიშვილი, არდაზიშვილი (65. ჩიხლაძე) - სარდალიშვილი, დეკანოიძე (90. კაშია)
სათადარიგოები: მწყერაშვილი, კამლაძე, ერგემლიძე, მეგრელიშვილი 
მწვრთნელი: სოსო ფრუიძე

გაფრთხილება: სეიდი (67), სინანი (88) - ჩიკვაიძე (1), დეკანოიძე (56), არდაზიშვილი (58)
არბიტრი: რ. გაბაროვი (აზერბაიჯანი)

ბრავო ჩიხურა, ბრავო ფრუიძე!

საჩხერის “ჩიხურას” ევროთასებზე საქართველო არასოდეს შეურცხვენია. ასე მოხდა ამჯერადაც. ეს იმის მიუხედავად, რომ სოსო ფრუიძემ ვერც ამჯერად გააძლიერა გუნდი ისე, როგორც სურდა. საჩხერელებმა ერთადერთი ტრანსფერი განახორციელეს - თბილისის “ლოკომოტივიდან” რატი არდაზიშვილი დაიმატეს.

“ჩიხურამ” ძალიან რთული თამაში მოიგო ლუქსემბურგში და ეს უკვე ძალიან კარგია. მით უმეტეს, ლუქსემბურგული ფეხბურთი გვარიან პროგრესს განიცდის. ამ შედეგისთვის თითოეულ საჩხერელ ფეხბურთელს დიდი მადლობა ეკუთვნის. 

საკამათო არავისთვის უნდა იყოს, რომ ამ წარმატების მთავარი შემოქმედი სწორედ ფრუიძეა - კაცი, ვინც აგერ მერამდენე ფორმაციის “ჩიხურა” ააშენა. იმერლებს ქება ეკუთვნით იმადაც, რომ აგებდნენ და თამაში შემოატრიალეს.

მაშინაც კი, როცა “ფოლა” თერთმეტმეტრიანით დაწინაურდა, იქმნებოდა შთაბეჭდილება, რომ საჩხერელები ამ შეხვედრას შემოატრიალებდნენ. აშკარა იყო იმერელთა უპირატესობა ტაქტიკურ და ფიზიკურ მომზადებაში.

არადა, თავიდან “ფოლა” დაწინაურდა. დაცვაში ელემენტარული უყურადღებობა გაშვებულ გოლად დაგვიჯდა. თავი სინანმა გამოიჩინა. ლუქსემბურგის ნაკრების შემტევმა ზუსტად შეასრულა 11-მეტრიანი.

მეორე ტაიმში კი ყველაფერი ფრუიძის სცენარით წარიმართა და ეს საბოლოო შედეგშიც აისახა. ჯერ იყო და, დავით მაისაშვილის თავურის შემდეგ ხარიხადან ასხლეტილ ბურთს “ჩიხურას” ლიდერმა მიხეილ სარდალიშვილმა დაამატა, მერე კი, თამაშის დასრულებას ბევრი რომ აღარ აკლდა, გიორგი კორიფაძის მიერ პენალტის ნიშნულიდან დარტყმულმა უწია მიზანს.

რა თქმა უნდა, საქმის პირველი და გვარიანი ნაწილი გაკეთდა, მაგრამ საქართველოში გასამართი შეხვედრის წინ მოდუნება არავითარ შემთხვევაში არ შეიძლება.

ყოველდღიური სპორტული გაზეთი "ლელო"
4198
მკითხველის კომენტარები / 0 /
მსგავსი ამბები
რუბრიკის სხვა სიახლეები
;