[განახლებული] ეროვნული ლიგა. დინამო (ბთ) 0-2 ტორპედო. ჰაერშიც, მიწაზეც... [VIDEO]

დინამო (ბთ) - ტორპედო 0:2
05.03. ბათუმი. ანგისას ბაზა
0:1 აზაცკი (17. წიქარიძის პასით), 0:2 ზივზივაძე (45. დოლიძის პასით)
დინამო (4-2-3-1): ალავიძე - მელიავა, ფაცაცია, გადრანი, ჩალაძე - მამუჩაშვილი, ტეიდი (46. გაფრინდაშვილი), მანჯგალაძე - რამოსი (60. საბანაძე), თევდორაძე - . ჭანტურია (46. ილურიძე)
სათადარიგოები: გოშაძე, ცაცკრიალაშვილი, ჯანელიძე, გაგოშიძე
მწვრთნელი: გია გეგუჩაძე
ტორპედო (4-2-3-1): ქვილითაია - სტიეპოვიჩი, აზაცკი, კობახიძე, გეგეჭკორი - ცინცაძე, გიგაური - დოლიძე (75. ქიმაძე), წიქარიძე (62. კაპანაძე), ქავთარაძე - ზივზივაძე (61. ჭიჭინაძე)
სათადარიგოები: კვასხვაძე, ნებიერიძე, ხურცილავა, რიჩარდ ლუკა
მწვრთნელი: კახა ჩხეტიანი
გაფრთხილება: კობახიძე (84)
არბიტრი: . ვადაჭკორია

ტურის ერთ-ერთ ცენტრალურ შეხვედრას ინტრიგა ნამდვილად არ აკლდა. დავიწყოთ იქედან, რომ ერთმანეთს ძველი მეტოქეები ხვდებოდნენ. მეორე ფაქტორი: გია გეგუჩაძე და კახა ჩხეტიანი თავის დროზე ერთად მუშაობდნენ და ეჭვგარეშეა, ჩხეტიანმა ბევრი ისწავლა გამოცდილი კოლეგისა და უფროსი მეგობრისაგან...

ნამდილი საფეხბურთო გარემო

გარდა ამისა, საინტერესო იყო, რა დასკვნებს გამოიტანდნენ გუნდები პირველი ტურის შეხვედრებიდან. "ტორპედომ" ბოლნისის "სიონს" მოუგო, მაგრამ დაცვაში არადამაჯერებელი თამაში აჩვენა, ბათუმის "დინამომ" კი გასვლითი შეხვედრა წააგო მოქმედ ჩემპიონ "საბურთალოსთან".

სანამ უშუალოდ თამაშის მსვლელობაზე გადავიდოდეთ, ვთქვათ, რომ არ უთამაშია ბათუმელთა ყველაზე ვარსკვლავურ ახალწვეულს, გიორგი ნავალოვსკის. მას უკვე შემდეგი ტურისთვის უნდა ველოდოთ...

ცვლილებები ორივე გუნდის შემადგენლობაში მოხდა. მთავარი კი ის იყო, რომ ბათუმში საქართველოს ჩემპიონატის უმაღლესი ლიგა დაბრუნდა. მასპინძლებს პირველი წუთიდანვე ქომაგთა დიდი მხარდაჭერა ჰქონდათ. ქომაგმა კი ტრიბუნაზე ცარიელი ადგილი არ დატოვა. ის კი არა, ფეხზეც ბევრი იდგა მოედნის გარშემო...

მოკლედ, ბათუმში ნამდვილი საფეხბურთო გარემო იყო...

ჰაერის მეფე

პირველი მომენტი "ტორპედომ" შექმნა. გიული მანჯგალაძე გადაცემისას შეცდა. ბუდუ ზივზივაძემ ნოდარ ქავთარაძეს გაუჭრა პასი, თუმცა ამ უკანასკნელს მიხეილ ალავიძემ დაასწრო.

მე-13 წუთზე "დინამო" აშკარა გოლს გადაურჩა. კუთხური თენგიზ წიქარიძემ მოაწოდა. ჰაერში ყველას ოლექსანდრ აზაცკიმ აჯობა და მძლავრი თავურით სცადა გატანა - ოდნავ ააცილა კარს.

მალე სტუმრებს მორიგი შანსი მიეცათ. ზივზივაძემ მახვილგონივრულად ითამაშა, მაგრამ ალავიძემ არ გაატანინა. სულ მალე კი "ტორპედომ" დიდი უპირატესობა გოლში ასახა. განმეორდა წიქარიძის კუთხური და აზაცკის თავური, რომელიც ამჯერად უზადო აღმოჩნდა და "ტორპედო" წინა გაიჭრა - 1:0.

ბათუმელებმა პირველი მომენტი მე-20 წუთზე შექმნეს. "სტანდარტის" შემდეგ გაბრიელ რამოსი რომ უფრო დროულად გარკვეულიყო სიტუაციაში, გოლი ალბათ გარდაუვალი იქნებოდა - ბრაზილიელმა უხეიროდ დაარტყა.

26-ე წუთზე ალავიძემ დიდებული "სეივი" შემოგვთავაზა. მათე ცინცაძემ ჯარიმა ეშმაკურად დაარტყა. ერთ-ერთი ბათუმელი ბურთს უნებლიედ საკუთარ კარში ჭრიდა. თითქოს ნაღდი გოლი იყო, მაგრამ "დინამოს" მეკარე თითის წვერებით მისწვდა ბურთს.

მალევე საქმეში ჩართვა "ტორპედოს" მეკარე მაქსიმე ქვილითაიასაც მოუხდა - ვლადიმერ მამუჩაშვილის დარტყმის შემდეგ მან ურთულესი ბურთი მოიგერია. მასპინძლებს კარგი შეტევა გამოუვიდათ.

უშედეგო შტურმი და ბუდუ

ტაიმის ბოლოს "დინამო" მოწინააღმდეგის ნახევარზე დამკვიდრდა. რამდენიმე შემთხვევაში "ტორპედოს" კართან ვითარება დაიძაბა, მაგრამ აჭარელთა შეტევებს შედეგი არ მოჰყოლია. კარგი შანსი ჰქონდა რომან ჭანტურიას - იტალიაში გამობრძმედილმა შემტევმა არაზუსტად დაარტყა.

"დინამოს" შეტევებს ხშირად აკლდა სიმწვავე, დამატებულ დროში კი "ტორპედომ" "მკვლელი" კონტრშეტევა განახორციელა - გრიგოლ დოლიძემ კარგად შეაცურა ბურთი მეკარის საჯარიმოში, სადაც ზივზივაძე ახლო ძელთან შესანიშნავად გაერკვა სიტუაციაში და ბურთი შორეული კუთხისკენ აჭრა - 2:0!

ჩხეტიანმა დააწყნარა

მეორე ტაიმი გია გეგუჩაძემ ორმაგი ცვლილებით დაიწყო. გიორგი ილურიძემ და თორნიკე გაფრინდაშვილმა ჭანტურია და ბენჯამენ ტეიდი ჩაანაცვლეს. გამოცდილი მწვრთნელი მართალი იყო - ამ დუეტიდან ვერცერთმა ვერ გამოავლინა თავისი საუკეთესო თვისებები...

მომენტი ისევ "ტორპედომ" შექმნა. "დინამოს" ფეხბურთელები 11-მეტრიანს ითხოვდნენ. ქუთათურებმა კი უსწრაფესი კონტრშეტევა განახორციელეს. წიქარიძის დარტყმა ოდნავ ასცდა ალავიძის კარს.

ამის მერე ქვილითაიას ჯერი დადგა. მან ჯერ რამოსს არ გაატანინა, მერე კი, იმავე შეტევაში,  გაფრინდაშვილს აუღო ურთულესი ბურთი. ეს იყო და, ჩხეტიანმა ორმაგი შეცვლით დააწყნარა ვითარება. თამაშის ბოლომდე მნიშვნელოვანი აღარაფერი მომხდარა. სულ ბოლოს კი ქუთათურთა საჯარიმოში ერთ-ერთ მცველს თითქოს ხელზე მოხვდა ბურთი, მაგრამ მსაჯმა თამაში არ შეაჩერა. "ტორპედომ" დამსახურებულად მოიგო და უდანაკარგოა ორი ტურის შემდეგ.

ყოველდღიური სპორტული გაზეთი "ლელო"
1040
მკითხველის კომენტარები / 0 /
მსგავსი ამბები
რუბრიკის სხვა სიახლეები
;