[VIDEO] ეროვნული ლიგა. ბათუმელთა პირველი, თბილისელთა მეორე... და ალავიძის სასწაულები

დინამო (თბ)-დინამო (ბთ)       0:1
10.03. თბილისი. დინამო არენა
0:1 გადრანი (12. მანჯგალაძის პასით)
დინამო თბ (4-4-2): პერალესი - იაშვილი, მეჯუბი, მონხილი, ნოჩე - შულაია, კუხიანიძე (60. ნინუა), ივანისენია (78. ზარია), შენგელია - კარბია, როხანო (66. კუტალია).
სათადარიგოები: სიკაჩი, კობოური, ქარდავა, პაპავა
მწვრთნელი: ფელის ვისენტე
დინამო ბთ (4-2-3-1): ალავიძე - მელიავა, გადრანი, გაგოშიძე, ჩალაძე - მამუჩაშვილი, მანჯგალაძე - ჯანელიძე (86. ცაცკრიალაშვილი), ილურიძე (46. თევდორაძე), რამოსი - საბანაძე (72. გაფრინდაშვილი)
სათადარიგოები: გოშაძე, ტეიდი, ჭანტურია, ფაცაცია
მწვრთნელი: გია გეგუჩაძე
გაფრთხილება: გადრანი (20), ჩალაძე (23), მანჯგალაძე (26), რამოსი (47), მელიავა (71), მეჯუბი (72)
გაძევება: მელიავა (84. დინამო ბთ)
არბიტრი: . კიკაჩეიშვილი

ძველი მეტოქეების შეხვედრა დიდ ინტერესს იწვევდა. ორივე "დინამოს" საკმარისად ჰქონდა დასამტკიცებელი. ეს განსაკუთრებით ბათუმელებზე ითქმის, რომლებმაც ჩემპიონატის დაწყების შემდეგ აქამდე გამართული ორივე შეხვედრა ისე წააგეს, რომ გოლი არ გაუტანიათ. თავის მხრივ, ბოლნისის "სიონთან" განცდილი საგარეო მარცხის შემდეგ რეაბილიტაცია თბილისის "დინამოსაც" სჭირდებოდა...

გადრანმა ყოფილი გუნდი დასაჯა

ორივე გუნდის შემადგენლობაში წინა ტურთან შედარებით იყო ცვლილებები. "დინამოს" კი დააკლდა დისკვალიფიცირებული კაპიტანი გუჯა რუხაია, ვინც ბოლნისურ მატჩში გააძევეს მინდვრიდან. მოკლედ, უშეღავათო ბრძოლისთვის ყველანაირი პირობა იყო შექმნილი.

პირველად მინდორზე მდგომარეობა მე-7 წუთზე დაიძაბა. ლევან შენგელია მარჯვენა ფლანგზე კარგად დაუსხლტა მეურვეს და სახიფათოდ ჩააწოდა. დასწრებაზე თამაში ანტონიო როხანომ სცადა, თუმცა არგენტინელმა ცენტრფორვარდმა თამაშის წესი დაარღვია მეკარე მიხეილ ალავიძის წინააღმდეგ.

იქვე, გიორგი ჯანელიძე ცდილობდა გატანას, თუმცა ბათუმელთა კაპიტნის მიერ დარტყმული ბურთი კარს ასცდა. მეკარე პერალესი სიტუაციას აკონტროლებდა.

მე-12 წუთზე კი ბათუმელებმა ამ შეხვედრაშიც და ჩემპიონატშიც ანგარიში გახსნეს. გიული მანჯგალაძის მიერ ჩაწოდებული კუთხურის შემდეგ დმიტრო ივანისენიამ გადრანი "დაკარგა" და ამ უკანასკნელმაც მძლავრი თავურით გაუტანა ყოფილ კლუბს.

ალავიძის სასწაულები

შემდეგი სახიფათო მომენტი თბილისელებისა იყო. "დინამოს" შორის საუკეთესო ლევან შენგელიას წინააღმდეგ თამაშის წესი დაირღვა. სტანდარტული თავად დაზარალებულმა შეასრულა და ალავიძეს ვერ აჯობა.

ტაიმის ბოლო 10 წუთი "დინამომ" შეტევაში გაატარა. შენგელია ძალიან სახიფათოდ ურტყამდა, მაგრამ ალავიძემ იყოჩაღა, შემდეგ კი ისევ ბათუმელთა მეკარის ჯერი დადგა. ტაიმის ბოლოს ულამაზესი ეპიზოდი ვიხილეთ - როხანო თავით გზავნიდა ბურთს ბათუმელთა კარში, მაგრამ ალავიძემ არანორმალური რეაქციის ხარჯზე იხსნა თავისიანები.

პირველ ტაიმში სტუმართა გამოცდილმა მეკარემ მართლაც რომ დიდებულად ითამაშა. ის რომ არა, ბათუმის "დინამო" შესვენებაზე ერთბურთიანი აქტივით ნამდვილად არ  გავიდოდა.

56-ე წუთზე "დინამომ" კინაღამ შეაგდო. ფრან კარბია მახვილი კუთხიდან ცდილობდა გატანას, მაგრამ გადრანმა უკანასკნელ მომენტში შეძლო ცარიელი კარიდან ბურთის გამოტანა. მას რომ არ ევაჟკაცა, ბურთი ან თვითონ შეგორდებოდა კარში, ან როხანო დაამატებდა შედეგიანად.

67-ე წუთზე, ყველასთვის მოულოდნელად, შენგელიამ მარჯვენათი "გაისროლა", მაგრამ ჩანდა, ალავიძე ელოდა მოვლენათა ასეთ განვითარებას და მოიგერია კიდეც ბურთი.

გაფრინდაშვილს რომ გაეტანა...

თამაშის დასრულებამდე 10 წუთით ადრე ბათუმელებს ყველაფერი უნდა დაესრულებინათ. აბდელ მეჯუბი შეცდა. რამოსმა პაუზა დაიჭირა და საგოლედ უპასა თორნიკე გაფრინდაშვილს, რომლის მის მიერ დარტყმული ბურთი ზემოდან გადასცდა პერალესის კარს.

"დინამო" ძირითადად სტანდარტებიდან ცდილობდა სახიფათო მომენტების შექმნას. ლევან კუტალიამ თავურით სცადა გატანა, მაგრამ ბურთი ზემოდან გადასცდა ბათუმელთა კარს. მერე აჭარლებს მეორე ყვითელი ბარათისთვის კიჭი მელიავა გაუძევეს...

91-ე წუთზე ალავიძემ მორიგი სასწაული შემოგვთავაზა. ეს მას შემდეგ, რაც მეჯუბის უძლიერესი თავური რაღაც მანქანებით მოიგერია. იქვე, კუტალიამ ვერ გამოიყენა კარგი მომენტი.

თბილისის "დინამომ" ზედიზედ მეორე შეხვედრა წააგო, ბათუმელებმა კი პირველი გამარჯვება იზეიმეს მიმდინარე ეროვნული ლიგაში.

ყოველდღიური სპორტული გაზეთი "ლელო"
790
მკითხველის კომენტარები / 0 /
მსგავსი ამბები
რუბრიკის სხვა სიახლეები
;