[განახლებული] ეროვნული ლიგა. სიონი 2:1 დინამო (თბ). კერკეტიც, კირკიტაც... [VIDEO, იყო თუ არა პენალტი]

სიონი-დინამო (თბ)  2:1
06.03. ბოლნისი. თამაზ სტეფანია
0:1 ივანისენია (28. შენგელიას პასით), 1:1 უგულავა (43-პენ), 2:1 ისიანი (69. კირკიტაძის პასით)
სიონი (4-2-3-1): ზარქუა - ტვილდიანი, თომაშვილი, აფაქიძე, სუხიაშვილი - ხმალაძე, თარხნიშვილი - . კირკიტაძე, სიხარულია (69. რაჟამაშვილი), . ისიანი (79. ქიქავა) - უგულავა (90. მანაგაძე)
სათადარიგოები: . ისიანი, ხეცურიანი, ხვადაგიანი, მესხი, რაჟამაშვილი
მწვრთნელი: თემურ შალამბერიძე
დინამო (4-4-2): სიკაჩი - რუხაია, მონხილი, მეჯუბი, ნოჩე (75. კობოური) - შენგელია, ივანისენია (59. პაპავა), ქარდავა, შულაია (46. იაშვილი) - კარბია, როხანო
სათადარიგოები: პერალესი, ზარია, კუხიანიძე, ნინუა
მწვრთნელი: ფელის ვისენტე
გაფრთხილება: რუხაია (14), ნოჩე (36), თარხნიშვილი (73), როხანო (73), ისიანი (73)
გაძევება: რუხაია (43. დინამო)
არბიტრი: . ყრუაშვილი

მატჩის ოქმებს რომ გავეცანით, პირველ რიგში თვალში გვეცა თბილისის "დინამოს" სამწვრთნელოშტაბის გადაწყვეტილება. "ჩიხურასთან" შეხვედრის არაერთი მონაწილე შეიცვალა. ჩვენი სუბიექტური თვალსაზრისით, სათადარიგოთა სკამზე აღმოჩდნენ ის მოთამაშეები, რომლებმაც ბოლომდე ვერ გაამართლეს მოლოდინი.

თუმცა არის მეორე მომენტიც: "დინამოს" შტაბი როტაციის მეშვეობით ცდილობს, ბოლომდე გაერკვეს ყველა ფეხბურთელის შესაძლებლობაში...

რაც შეეხება "სიონს", პირველ ტურში "ტორპედოსთან" დაძაბულ ბრძოლაში წაგებული (2:3) თამაშის შემდეგ თემურ შალამბერიძემ ერთადერთი ტიტულარი ჩაანაცვლა - დავით რაჟამაშვილის ადგილი ზვიად სიხარულიამ დაიკავა...

ზარქუას ბენეფისი და შეცდომა

როგორც მოსალოდბელი იყო, მატჩი თბილისის "დინამოს" უპირატესობით დაიწყო. ფელის ვისენტეს გაწვრთნილი გუნდი უარს ამბობდა ბურთის ხანგრძლივ კონტროლზე და ბედს სწრაფ თამაშში ეძებდა.

გავრისკავთ და ვიტყვით, რომ პირველი ტაიმის პირველ ნახევარში "დინამო" ანგარიშს გახსნიდა, რომ არა თორნიკე ზარქუას შესანიშნავი თამაში. "სიონის" მეკარემ სამჯერ იხსნა თავისიანები. განსაკუთრებით რთული ბურთი მოიგერია მან ფრან კარბიას დარტყმის შემდეგ.

მაგრამ მალე ზარქუამ შეცდომაც დაუშვა. კარბიამ კარგად გადააწოდა ანტონიო როხანოს, თუმცა არგენტინელმა შემტევმა ერთი შეხებით დარტყმის ნაცვლად მეურვეების მოტყუება დაიწყო და ეპიზოდმა სიმწვავე დაკარგა.

შენგელია-ივანისენია!

საქმეს ისეთი პირი უჩანს, ლევან შენგელია "დინამოს" ლიდერად ყალიბდება. წინა ტურში დუბლის ავტორმა შენგელიამ ახლა საგოლე გადაცემა მიითვალა. კუთხურიდან მის მიერ მოწოდებულ ბურთს ერთ-ერთმა დინამოელმა თითქოს ოდნავ შეუცვალა მიმართულება და დმიტრო ივანისენიამ თავით ცარიელ კარში გადაგზავნა ბურთი. "დინამო" დაწინაურდა.

"სიონმა" პირველად შეტევისთვის პირველი ტაიმის ბოლოსკენ მოიცალა. კარგი კონტრშეტევა ვილი ისიანმა დაასრულა დარტყმით, თუმცა ეს დარტყმა სუსტი გამოდგა.

მონხილის შეცდომის ფასი

41-ე წუთზე მინდორზე ვითარება შეიცვალა. აბსოლუტურად უწყინარ სიტუაციაში ვიქტორ მონხილმა ბურთის თამაშში დატოვება სცადა. მაგრამ ის დავით კირკიტაძემ მოიგდო, ფლანგზე გაილაღა და კარის წინ გასწვრივი გადაცემა გააკეთა. როგორც არბიტრმა მიანიშნა, საჯარიმოში თამაშის წესები დაირღვა "ბოლო იმედის" ჯარიმისთვის მინდვრიდან გუჯა რუხაია გააძევა, 11-მეტრიანი კი ზუსტად შეასრულა ჯაბა უგულავამ.

ისეთი გოლი იყო, რომელიც ერთმა კონკრეტულმა ფეხბურთელმა "მოიგონა". თანაც, "დინამო" კაცნაკლული დარჩა. ტაიმის ბოლომდე მონხილმა დაშვებული შეცდომის გამოსწორება სცადა და ძალიან სახიფათოდ შეასრულა სტანდარტული, თუმცა - უშედეგოდ.

სულ სხვანაირი სცენარით

მეორე ტაიმი სულ სხვანაირი სცენარით დაიწყო და ამაში გასაკვირი არაფერი იყო. მეტობაში დარჩენილმა "სიონმა" მთელი გუნდით შეუტია და კინაღამ გაიტანა. მასპინძელთა შორის საუკეთესო დავით კირკიტაძემ შესანიშნავად უპასა ზვიად სიხარულიას, რომლის დარტყმა სტეპან სიკაჩმა მოიგერია. იქვე, მოლდოველმა კიპერმა არც უგულავას გაატანინა.

მალევე, ანზორ სუხიაშვილმა და ისიანმა დიდოსტატური "კედელი" გაითამაშეს - "დინამო" გოლისაგან დაცვაში საუკეთესოდ გამრჯე ნოჩემ იხსნა.

ვილის შედევრი

მას შემდეგ, რაც "დინამოს" რიგებში გიორგი პაპავა გამოჩნდა, თამაშის სურათი კიდევ ერთხელ შეიცვალა. საქართველოს ყველაზე ტიტულოვანმა კლუბმა უფრო "ზემოდან" თამაში დაიწყო. ერთხელაც დამტკიცდა, რომ ამ უნივერსალის ადგილი მაინც უფრო მინდვრის ცენტრშია...

იქვე, ბაქარ ქარდავამ დაარტყა, მაგრამ ბურთი ასცდა ზარქუას კარს. მალევე "სიონის" შესრულებით მინი-შედევრი ვიხილეთ - კირკიტაძემ შესანიშნავი პასით "დინამოს" მთელი დაცვა "მოჭრა", ისიანმა კი მახვილი კუთხიდან ერთი შეხებით შეასრულა - 2:1!

77-ე წუთზე მეორე შედევრი მზადდებოდა. შენგელიამ შესანიშნავი, ძალიან ეშმაკური დარტყმით სცადა გატანა, მაგრამ ზარქუამ მართლაც რომ დიდებულად ითამაშა და "სიონის" კარს საფრთხე აარიდა.

დასკვნის მაგიერ

"სიონის" გამარჯვება დამსახურებულია. ფეხბურთში ზოგადად დიდია შეცდომის ფასი და ხშირად იგებს ის, ვინც ამ შეცდომას უკეთ იყენებს. ძალიან მაღალ დონეზე ითამაშეს თორნიკე თარხნიშვილმა, ლევან ხმალაძემ და ვილი ისიანმა. დავით კირკიტაძემ კი... გავრისკავ და ვიტყვი - სულაც კარიერის მატჩი ჩაატარა.

ყოველდღიური სპორტული გაზეთი "ლელო"
1216
მკითხველის კომენტარები / 0 /
მსგავსი ამბები
რუბრიკის სხვა სიახლეები
;