[VIDEO] ეროვნული ლიგა. შინდაგორიძის SUPERგოლები, დინამოს მორიგი მარცხი და... რევოლუცია?

"საბურთალომ" 2:0 დაამარცხა თბილისის "დინამო" და ერთი დღით დაკარგული ლიდერობა დაიბრუნა. "დინამო" კი ზედიზედ მესამედ დამარცხდა, რამაც გუნდში, შეიძლება, რევოლუციური ძვრები გამოიწვიოს.

ამ თამაშს მართლაც რომ უდიდესი მნიშვნელობა ჰქონდა ორივე გუნდისთვის. “საბურთალოს” ლიდერობის დაბრუნება ჰქონდა გულში ამოჭრილი, “დინამოს” კი ბოლოდროინდელი ცუდი სერიის შეწყვეტა...

თამაშამდე ქართულ საფეხბურთო კულუარებში ისმოდა ხმები, რომ “საბურთალოსთან” მატჩში დამარცხების შემთხვევაში, “დინამოს” სამწვრთნელო შტაბში შესაძლოა ცვლილებები განხორციელებულიყო...

სიფრთხილემ თავი არ აიტკივა

იოლი სავარაუდო იყო, რომ გუნდები ფრთხილად დაიწყებდნენ ამ შეხვედრას და ერთმანეთს თავქუდმოგლეჯილები არ შეუტევდნენ. საბოლოოდ, ასეც მოხდა. თამაშის დაწყებისთანავე ცხადი გახდა, რომ “დინამოს” მთავარი მიზანი ამ შეხვედრაში არწაგება იყო.

ერთი, რომ ჩისკო მუნიოსმა დატვირთა მინდვრის ცენტრი და ეს სავსებით გასაგები იყო, რადგან “საბურთალოს” საუკეთესო ძალები სწორედ მინდვრის ამ მონაკვეთშია თავმოყრილი. ეს გასაგები იყო, თუმცა ცენტრში დაცვითი სტილის მოთამაშეები ჭარბობდნენ შემქმნელებს. მაგალითად, აშკარად გამოკვეთილი “ჩამშლელები” არიან ბაქარ ქარდავა და დმიტრო ივანისენია, ნიკა ნინუასაც არაერთხელ უთამაშია გამოკვეთილ საყრდენად...

პირველი ნახევრის განმავლობაში სიტუაცია სულ რაღაც ორჯერ დაიძაბა. ორივე შემთხვევაში “საბურთალოს” ფეხბურთელები აქტიურობდნენ. ბურთის ფლობა საქართველოს მოქმედი ჩემპიონის სასარგებლოდ იყო. გამოსარჩევი გახლდათ შეხვედრისა და, ალბათ, ტურის საუკეთესო ფეხბურთელის, ლაშა შინდაგორიძის მიერ შექმნილი მომენტი, როცა დინამოელთა მეკარე ხოსე პერალესი ადგილზე დახვდა ბურთს.

“დინამო” თამაშს სისწრაფესა და კონტრშეტევებზე აგებდა. საქართველოს ყველაზე ტიტულოვანმა გუნდმა მთელი ტაიმის განმავლობაში ერთი ხეირიანი კომბინაცია გაათამაშა და, ბედის ირონიით, იმ ეპიზოდშიც თამაშგარე მდგომარეობა დაფიქსირდა...

შინდაგორიძის ტაიმი

მეორე ტაიმი “საბურთალოს” უპირატესობით დაიწყო და ასევე ჩამთავრდა. გიორგი ჭიაბრიშვილის გუნდმა ძალიან გამართული ფეხბურთი ითამაშა, ისეთი ფეხბურთი, რომელსაც ამ გუნდისგან ველით კარსმომდგარ ჩემპიონთა ლიგის საკვალიფიკაციო ეტაპზე.

რამ განაპირობა საბურთალოელთა ასეთი უპირატესობა? ჩვენი აზრით, უპირველეს ყოვლისა იმან, რომ სრული დატვირთვით ამუშავდა გუნდის წინა ხაზი, რომელსაც გეგა დიასამიძე კი აკლდა, მაგრამ თავისი პოტენციალით “საბურთალოს” ეს რგოლი მაინც ერთ-ერთი საუკეთესოა საქართველოში. 

ნებისმიერ უპირატესობას ანგარიშში ასახვა სჭირდება და სწორედ ეს ურთულესი მისია ითავა ლაშა შინდაგორიძემ. ჯერ იყო და, ხარიხას დააძგერა ბურთი, მერე კი ორი ულამაზესი გოლი შეაგდო. ეს იყო ისეთი გოლები, რომელთაც ხელს მსოფლიო ფეხბურთის ნებისმიერი ვარსკვლავი მოაწერდა...

ძველი საფეხბურთო ჭეშმარიტებაა - მეორე ტაიმს იგებს მწვრთნელი. თუ ეს ასეა, მაშინ ბარაქალა ჭიაბრიშვილს, ვინც მეორე ნახევარში მაგრად მოამატებინა გუნდს და აშკარად დაჩაგრა დინამოელი კოლეგები. ამ მოგებით “საბურთალომ” ლიდერობა დაიბრუნა.

კითხვები, რომელიც პასუხს ითხოვს

მკითხველი დაგვეთანხმება - “დინამოს” ბოლოდროინდელი თამაში კითხვის ნიშანებს ტოვებს. გუნდი ვერ აჩვენებს იმ ფეხბურთს, რომელსაც მისგან ელიან. მეტიც, თამამად შეიძლება ითქვას, რომ “დინამო” ძალიან ცუდ ფორმაშია.

მეორე ტაიმში, როცა “საბურთალომ” თამაშს მოუმატა, “დინამოს” არანაირი არგუმენტი არ აღმოაჩნდა ამის საწინააღმდეგოდ. ცუდ ფორმაში არიან გუნდის ლიდერები. ზოგადად, გუნდს არ ეტყობა მწვრთნელის ხელი.

ვნახოთ, ჩაერევა თუ არა კლუბის პრეზიდენტი რომან ფიფია და იქნება თუ არა ცვლილებები თბილისური კლუბის სამწვრთნელო შტაბში.

თ მ ფ წ ბ ქ
1. საბურთალო 14 10 0 4 30:21 30
2. დინამო (ბთ) 14 9 1 4 22:14 28
3. ტორპედო 14 8 2 4 24:18 26
4. ჩიხურა 14 5 7 2 20:11 22
5. დინამო (თბ) 14 6 2 6 25:18 20
6. სიონი 14 6 2 6 18:30 20
7. დილა 14 5 2 7 12:13 17
8. ლოკომოტივი 14 5 0 9 17:22 15
9. ვიტ ჯორჯია 14 3 2 9 7:16 11
10. რუსთავი 14 2 4 8 14:26 10

ბომბარდირები
ჯ. უგულავა (სიონი) 8
ბ. ზივზივაძე (ტორპედო) 8
ლ. შინდაგორიძე (საბურთალო) 8
მ. სარდალიშვილი (ჩიხურა) 7
ლ. კუტალია (დინამო თბ) 7

ყოველდღიური სპორტული გაზეთი "ლელო"
1581
მკითხველის კომენტარები / 0 /
მსგავსი ამბები
რუბრიკის სხვა სიახლეები
;