[განახლებული] ეროვნული ლიგა. ლოკომოტივი 1-3 საბურთალო. ჩემპიონის დამაჯერებელი გამარჯვება [VIDEO]

ლოკომოტივი-საბურთალო    1:3
05.03. თბილისი. მიხეილ მესხი (სათ)
1:0 სიხარულიძე (11), 1:1 შინდაგორიძე (16-პენ), 1:2 შინდაგორიძე (63. დიასამიძის პასით), 1:3 როლოვიჩი (70. დიასამიძის პასით)
გამოუყენებელი პენალტი: დიასამიძე (56. მეკარე)
ლოკომოტივი (3-1-4-2): ბულისკერია - ანდრონიკაშვილი (10. ძებნიაური), გურეშიძე, . ჭანტურია - შონია - უბილავა, სამურკასოვი (78. . კობახიძე), . კირკიტაძე, არდაზიშვილი - ჯიქია (67. ინჯგია), სიხარულიძე.
სათადარიგოები: . შეროზია, გვალია, კიკაბიძე, კომახიძე
მწვრთნელი: ლაშა ჭაღიაშვილი
საბურთალო (4-2-3-1): მიგინეიშვილი - მალი, მარგველაშვილი, კაკუბავა, ჩაბრაძე (78. თევზაძე) - ტერა (57. როლოვიჩი), გორგიაშვილი - შინდაგორიძე, დიასამიძე, გი - დვალიშვილი (69. ცნობილაძე).
სათადარიგოები: შელიხოვი, ჯინჯოლავა, გვარაძე, ალთუნაშვილი
მწვრთნელი: გიორგი ჭიაბრიშვილი
გაფრთხილებები: გურეშიძე (55), გი (58), ძებნიაური (67), ბულისკერია (90+3)
არბიტრი: . ნინუა

"საბურთალომ" მეორე ტურშიც გაიმარჯვა. ამჯერად, საქართველოს მოქმედმა ჩემპიონმა თბილისურ დერბიში დამაჯერებლად მოუგო "ლოკომოტივს"...

სამეულის არყოფნა არ დაეტყო

ზედიზედ მეორე მატჩია, "საბურთალოს" არც შემადგენლობაში და არც განაცხადში არ არიან ლუკა ლაკვეხელიანი, ვაგნერ გონსალვეში და გიორგი კოხრეიძე - საქართველოს მოქმედი ჩემპიონის სამი საკვანძო მოთამაშე.

აშკარაა, რომ სუპერთასზე ქუთაისის "ტორპედოსთან" წაგების  შემდეგ მათი თამაშით "საბურთალოს" მთავარი მწვრთნელი გიორგი ჭიაბრიშვილი უკმაყოფილო დარჩა.

უცნაურია, მაგრამ ამ მართლაც კარგი და საინტერესო მოთამაშეების არყოფნა გუნდს მაინც არ დაეტყო და თბილისურ დერბიში "ლოკომოტივთან", რომელიც ბოლო წლების საფეხბურთო ცხოვრების ერთ-ერთ გამორჩეულ მოვლენად იქცა, მოქმედმა ჩემპიონმა ძალიან კარგი ფეხბურთი აჩვენა.

ატლეტიკოდან დაბრუნებული...

თამაში სულ რაღაც 6 წუთის დაწყებული იყო, როცა "ლოკომოტივის" მარჯვენა მცველი სანდრო ანდრონიკაშვილი დაშავდა. ის შეეცადა, მოედანზე დარჩენილიყო და გუნდს დახმარებოდა, მაგრამ ეს შეუძლებელი აღმოჩნდა - 19 წლის ფეხბურთელს ტერფი დაუზიანდა და მოედნის ნაადრევად დატოვება მოუხდა.

როგორც გვითხრეს, ანდრონიკაშვილის ტრავმა საშიში არ არის. "ლოკომოტივში" იმედოვნებენ, რომ ის მოედანს შემდეგ ტურში დაუბრუნდება.

ეს ის ფეხბურთელია, რომელიც თბილისელთა ორკვირიან ესპანურ შეკრებაზე ევროპული ფეხბურთის ერთ-ერთი გრანდის, მადრიდის "ატლეტიკოს" სკაუტებმა რომ შენიშნეს და დუბლშემადგენლობაში გასინჯვაზე მიიწვიეს. ანდრონიკაშვილი მადრიდულ კლუბში 27 თებერვლიდან 1 მარტამდე იმყოფებოდა.

სინჯების შემდეგ მადრიდელები გადაწყვეტენ, მიიწვიონ თუ არა ნიჭიერი ქართველ მცველი ზაფხულში.

იღბლიანი დასაწყისი და სწრაფი პასუხი

დედაქალაქურ დერბიში "საბურთალო" ბურთის გაკონტროლებასა და სათამაშო უპირატესობის მოპოვებას საწყის წუთებშივე შეეცადა და ეს გამოუვიდა კიდეც. თუმცა ანგარიში "ლოკომოტივმა" გახსნა. დაცვაში ლევან კაკუბავა შეცდა, რომელმაც ბურთის მეკარისთვის დატოვება სცადა. მასპინძელთა ამ შეცდომით ირაკლი სიხარულიძემ ისარგებლა და ახლო მანძილიდან ანგარიში გახსნა.

2017 წლის საუკეთესო ბომბარდირმა და თავდამსხმელმა თავი ზედიზედ მეორე ტურში გამოიჩინა. ლაშა ჭაჭიაშვილის გუნდი უკეთეს დასაწყისს ვერც ინატრებდა...

ასეთი უსიამოვნო დასაწყისის მიუხედავად, "საბურთალოს" ფეხბურთელები არ დაიბნენ და მეტოქეს სწრაფი პასუხი გასცეს. "ლოკომოტივის" საჯარიმოში კარგად ითამაშა გეგა დიასამიძემ, რასაც სანდრო გურეშიძის მიერ ხელით თამაში მოჰყვა. არბიტრმა დანიშნა პენალტი, რომელიც ლაშა შინდაგორიძემ გოლად აქცია - 1:1.

ისეთი თამაში იყო, "ლოკომოტივი"-"საბურთალოს" ბოლო წლების დაპირისპირებას სხვებისგან სანახაობით რომ გამოარჩევს - ბურთი მოედნის ცენტრში არ ჩერდებოდა.

მეორე ნახევარში მოედანზე სურათი არ შეცვლილა - "საბურთალომ" მეტოქეს საკუთარი თამაში მოახვია თავს და გადამწყვეტი უპირატესობა მოიპოვა.

წამგებიანი თამაში

56-ე წუთზე ჩემპიონებმა მეორე პენალტის დარტყმის უფლება მოიპოვეს - შინდაგორიძის დარტყმა ხელზე ისევ გურეშიძეს მოხვდა, მაგრამ დიასამიძემ ეს 100-პროცენტიანი შანსი ვერ გამოიყენა - ბურთი მეკარე დემეტრე ბულისკერიას ნადავლად იქცა. "ლოკომოტივმა" თამაშის გადარჩენის იმედი შეინარჩუნა...

მაგრამ საბურთალოელებმა მასპინძელთა იმედებს ცივი შხაპი გადაასხეს. კლასში მათი უპირატესობა იგრძნობოდა, ბურთს უკეთ აგორებდნენ, ფლანგებს უკთ იყენებდნენ, კართან უფრო სწრაფად მიდიოდნენ და დაცვაში თავისუფალ სივრცეებს უფრო იოლად პოულობდნენ. "ლოკომოტივის" მოთამაშეებს კი შეტევის განვითარება უჭირდათ და წინ გადაცემების ნაცვლად, ერთმანეთს უკან ეძებდნენ - წამგებიანი თამაში იყო.

ძალიან აქტიური იყო ტრავმის შემდეგ მოედანზე დაბრუნებული შინდაგორიძე, რომელიც  არ გაჩერებულა და დაცვას ძალიან ბევრ პრობლემას უქმნიდა. 63-ე წუთზე დიასამიძემ მას შეტევა ერთი შეხებით გაუგრძელა. შინდაგორიძემ ძლიერად დაარტყა. ბურთს დავით უბილავა გადაეფარა, მაგრამ... გოლი მაინც გავიდა - 1:2.

ეს სიმბოლური იყო - უმნიშვნელოვანესი გოლის და დუბლის ავტორი საუკეთესო გახლდათ დიასამიძესთან ერთად, რომელმაც, თავის მხრივ, ორი საგოლე პასი მიითვალა.

67-ე წუთზე დიასამიძემ გასაოცარი გადაცემით მეკარესთან პირისპირ დვალიშვილი დატოვა, მაგრამ ბულისკერიამ მასპინძლები კიდევ ერთხელ გადაარჩინა.

კარგი შენაძენი

"საბურთალომ" ორბურთიანი სხვაობით დაწინაურებაც მოახერხა:  შეტევა ნიკოლოზ მალიმ წამოიწყო და საჯარიმოში გაუგრძელა დიასამიძეს, რომელიც მცველს იოლად გასცდა და კარის წინ ოგნიენ როლოვიჩს უპასა. ჩერნოგორიელმა თავდამსხმელმა ახლო მანძილიდან ზუსტად დაარტყა - 1:3.

აღსანიშნავია, რომ მან ზედიზედ მეორე მატჩში მოახერხა თავის გამოჩენა და ორივე შემთხვევაში ეს შეცვლაზე გააკეთა. ფაქტია, რომ როლოვიჩი საკმაოდ კარგი შენაძენია.

ყოველდღიური სპორტული გაზეთი "ლელო"
747
მკითხველის კომენტარები / 0 /
მსგავსი ამბები
რუბრიკის სხვა სიახლეები
;