[VIDEO] ეროვნული ლიგა. 28 აღარ გამოვიდა, ტორპედო ლოკომოტივთან გაჩერდა

ტორპედო-ლოკომოტივი          0:2
09.03. ქუთაისი. რამაზ შენგელია
0:1 შონია (75. კირკიტაძის პასით), 0:2 კიკაბიძე (90+4)
ტორპედო (4-5-1): კვასხვაძე - გეგეჭკორი, . კობახიძე, აზაცკი, სტიეპოვიჩი (46. ქიმაძე) - დოლიძე, გიგაური, ცინცაძე (76. ჩაჩუა), წიქარიძე (56. კაპანაძე), ქავთარაძე - ზივზივაძე
სათადარიგოები: ქვილითაია, ჭიჭინაძე, ხურცილავა, რიჩარდ ლუკა
მწვრთნელი: კახა ჩხეტიანი
ლოკომოტივი (3-5-2): ბულისკერია - გურეშიძე, ნ. ჭანტურია, ძებნიაური - უბილავა, არდაზაშვილი (78. კიკაბიძე), შონია, სამურკასოვი (67. გვალია), თ. კირკიტაძე - ინჯგია (8. ჯიქია), სიხარულიძე.
სათადარიგოები: შეროზია, კომახიძე, . კობახიძე, ბუიღლიშვილი
არბიტრი: გიორგი ყრუაშვილი

ქუთაისის "ტორპედოს" საქართველოს ჩემპიონატსადა თასზე გასული წლის 23 ივნისის შემდეგ მარცხი არ ჰქონდა განცდილი. კახა ჩხეტიანის გუნდი ძალიან ახლოს იყო რუსთავის "ოლიმპის" რეკორდის გაუმჯობესებასთან, მაგრამქუთაისელთა 27-მატჩიანი წაუგებელი სერია თბილისის "ლოკომოტივმა" დაასრულა. ფავორიტად შერაცხილი "ტორპედო" საკუთარ მოედანზე ლაშა ჭაღიაშვილის საკმაოდ კარგად ორგანიზებულ გუნდთან დამარცხდა...

მატჩამდე რამდენიმე დღით ადრე გავრცელდა ინფორმაცია, რომ "ტორპედო" ფინანსურ კრიზისში იყო და გუნდს დაშლა ემუქრებოდა. მართალია, ასეთი აპოკალიფსური ვითარება არა, მაგრამ კულუარული ინფორმაციით, ქუთაისურ გუნდში გარკვეული ფინანსური პრობლემები მართლაც იყო. თუმცა, მატჩამდე "ტორპედოში" სახელფასო დავალიანებები გაისტუმრეს და ამ ეტაპისთვის კრიზისი ამით ამოიწურა...

კახა ჩხეტიანმა ბათუმის "დინამოსთან" მოგებული შემადგენლობიდან მხოლოდ მეკარე შეცვალა. "ლოკომოტივთან" ქუთაისელთა კარს კაპიტანი როინ კვასხვაძე იცავდა, რომელმაც საწყისი ორი ტური ავადმყოფობის გამო გამოტოვა. 

თბილისის "ლოკომოტივს" ტრავმირებული ალექსანდრე ანდრონიკაშვილი დააკლდათ, მატჩის დასაწყისში კი თბილისელებს უნიჭიერესი ახალგაზრდა შემტევი რევაზ ინჯგია დაუშავდათ, რომელმაც თამაშის გაგრძელება ვეღარ შეძლო და მის ნაცვლად თამაშში დავით ჯიქია ჩაერთო. სხვათა შორის, ჯიქია "ტორპედოსთან" მატჩში ერთ-ერთი საუკეთესო იყო, სისწრაფისა და ტექნიკის ხარჯზე სტუმართა შეტევებს კარგად ამწვავებდა...

მატჩი სანახაობრივი კუთხით და მომენტების სიმრავლით არ გამოირჩეოდა, თუმცა დაძაბულობა ბოლო წუთებამდე შენარჩუნდა. "ტორპედო" ვერ ბრწყინავდა, მაგრამ ქუთაისელებს რამდენიმე რეალური საგოლე მომენტი რომ არ გაეცუდებინათ, შესაძლებელი იქნებოდა, მატჩი სხვა სცენარით განვითარებულიყო.

სამი ურთულესი სეივი

"ტორპედომ" საწყისი წუთებიდანვე სცადა მეტოქის მარწუხებში მოქცევა. ქუთაისელები ბურთს აკონტროლებდნენ და შეტევებს ამზადებდნენ, თბილისელებს კი კონტრშეტევებზე ჰქონდათ აქცენტი გაკეთებული.

პირველ ტალღას სტუმრები იოლად გაუმკლავდნენ, თბილისელები დაცვაში საიმედოდ თამაშობდნენ და მასპინძლებს მათ საჯარიმოში შეღწევა უჭირდათ, ამიტომ, ქუთაისელებმა შორეული დარტყმებით სცადეს გოლის გატანა.

მერაბ გიგაურის უძლიერესი დარტყმის შემდეგ ბურთი მეკარე დემეტრე ბულისკერიამ ეფექტური "სეივით" მოიგერია. თანდათან ზეწოლა გაძლიერდა და რომ არა ბულისკერიას გმირობა, "ტორპედო" დაწინაურდებოდა.

"ლოკომოტივის" ახალგაზრდა მეკარემ  ერთ ეპიზოდში 3 ურთულესი ბურთიც მოიგერია - ჯერ, ბუდუ ზივზივაძეს არ გაატანინა ახლო მანძილიდან, ხოლო შემდეგ დამატებაზე მათე ცინცაძის დარტყმული ბურთი უკუაგდო, ბოლოს კი გრიგოლ დოლიძის დამატებულსაც გადაეღობა.    

პირველი სიგნალი

გამოუყენებელი მომენტის გამო  "ტორპედო" კინაღამ დაისაჯა. რატი არდაზიშვილის მიერ წამოწყებული შეტევისა და ჯიქიას ზუსტი გადაცემის შემდეგ ირაკლი სიხარულიძე ვალდებული იყო გაეტანა, მაგრამ ცარიელი კარის წინ ბურთი აეჭრა და დავით უბილავას მიუვიდა, რომელიც ახლო მანძილიდან ურტყამდა - ბურთი მცველს მოხვდა  და ქუთაისელები აშკარა გოლს გადაურჩნენ.

იქვე, სტუმრებმა საჯარიმოს გარედანაც შეამოწმეს როინ კვასხვაძის მზადყოფნა - ქუთაისელთა მეკარემ ბურთი მოიგერია. არდაზიშვილი კარგად წარმართავდა სტუმართა შეტევებს, ძალიან კარგი იყო მარცხენა ფლანგზე თორნიკე კირკიტაძე, რომელმაც მოგვიანებით საგოლე გადაცემა გააკეთა...

ცოტა ხნით სტუმრებმა უპირატესობაც მოიპოვეს და ქუთაისელთა ნახევარზე დამკვიდრდნენ. ტაიმის მიწურულს "ტორპედოს" შეეძლო ანგარიშის გახსნა, მაგრამ ოლექსანდრ აზაცკის თავურის შემდეგ კვლავ ბულისკერია გაისარჯა საიმედოდ.

შანსები ლოკომოტივმა უკეთ გამოიყენა

მეორე ტაიმში კახა ჩხეტიანმა ცვლილებებს მიმართა. ნიკოლა სტიეპოვიჩის ნაცვლად თამაშში გიორგი ქიმაძე ჩაერთო, მოგვიანებით, თენგიზ წიქარიძე თორნიკე კაპანაძით შეცვალა და ქუთაისელებმა ორი ფორვარდით გააგრძელეს თამაში.

"ელვას" კიდევ ერთხელ შეეძლო, მატჩის გმირი გამხდარიყო, მაგრამ იმ დროს, როცა ანგარიში 0:0 იყო, რეალური საგოლე შანსი ვერ გამოიყენა, ქავთარაძის გადაცემის შემდეგ კაპანაძე კარში ძალიან ახლოდან ურტყამდა, მაგრამ ბურთი ხარიხას სასწაულებრივ გადააცილა.

სამაგიეროდ, საგოლე შესაძლებლობა ხელიდან არ გაუშვა თეიმურაზ შონიამ, რომელმაც  კირკიტაძის ჩაწოდების შემდეგ ეფექტური თავურით დააწინაურა სტუმრები - 1:0. ქუთაისელებმა თამაშში გარდატეხის შეტანა ვერ მოახერხეს. ვერც ამბროსი ჩაჩუას გამოსვლამ შეცვალა ვითარება. ვერც თამაში დალაგდა, ნერვიულობამაც იმატა, ზივზივაძისა და კაპანაძის მისამართით მაღალმა ჩაწოდებებმა შედეგი ვერ გამოიღო...

არ გამოვიდა ბოლო შტურმიც, ეგ კი არა, მსაჯის მიერ დამატებულ უკანასკნელ წუთზე შეცვლაზე შესულმა ლუკა კიკაბიძემ ინდივიდუალური ოსტატობის ხარჯზე თავისუფლად "შეისეირნა"  ქუთაისელთა საჯარიმოში და გამოზომილი დარტყმით საბოლოო ანგარიში დააფიქსირა - 2:0.

ვინც მატჩს თვალი ადევნა, რამაზ შენგელიას სახელობის სტადიონის მოედნის საფარის სავალალო მდგომარეობას კარგად შეამჩნევდა. როგორც გავიგეთ, მალე ქუთაისის მთავარ არენაზე სარემონტო სამუშაოები დაიწყება, გამოიცვლება მოედნის საფარიც, ქუთაისის "ტორპედო" კი საშინაო მატჩებს ნეიტრალურ მოედანზე, სავარაუდოდ, სამტრედიაში ჩაატარებს

ყოველდღიური სპორტული გაზეთი "ლელო"
611
მკითხველის კომენტარები / 0 /
მსგავსი ამბები
რუბრიკის სხვა სიახლეები
;