[VIDEO] თენგიზ სულაქველიძე: ბელარუსთან ყველა კანკავასავით თუ დადებს თავს, მოგება გაგვიადვილდება!..

თბილისის "დინამოს" ლეგენდარული ნახევარმცველმა თენგიზ სულაქველიძემ საქართველოს პირველი არხის გადაცემა "ტაიმ აუტში", მის ყოფილ თანაგუნდელსა და ასევე ლეგენდარულ ვლადიმერ გუცაევთან და ჟურნალისტ გიორგი თვალაბეიშვილთან სტუმრობისას, საფეხბურთო სკოლები პრობლემებზე ილაპარაკა...

კარგი საფარისთვის წყლის პრობლემა უნდა მოგვარდეს

"20 წლის წინ საფეხბურთო აკადემია დავაფუძნე, სადაც გაიზარდნენ საქართველოს ნაკრების ყოფილი და ამჟამინდელი წევრები - საბა კვირკველია, დათო იმედაშვილი, ოთარ მარცვალაძე... მე დღეს ჩვენს სატკივარს შევეხები. ფეხბურთელები მოედანზე ვარჯიშობენ და იზრდებიან. კარგი საფარი რომ გვქონდეს, აუცილებელია, უპირველესად, წყლის პრობლემა მოგვარდეს. ეს მარტო ჩვენ არ გვეხება, ყველა საფეხბურთო სკოლის სატკივარია. 20 ტონა წყალი მაინცაა საჭირო, მოედანი დღეში ორჯერ რომ მორწყა. ეს თანხებთანაა დაკავშირებული, ჩვენ კი მიზერული შემოავლები გვაქვს და ამას ვერ ვწვდებით. არ ვამბობ, რომ საფეხბურთო  სკოლები გადასახადისგან საერთოდ უნდა გაგვათავისუფლონ, მაგრამ ისეთი ოდენობის ფიქსირებული გადასახადი დააწესონ, რომლის გადახდასაც შევძლებთ. აკადემიაში ბევრი მოედანი გვაქვს და დიდი ხარჯია. მადლობა ფეხბურთის ფედერაციას, რომელმაც შესანიშნავი მოედანი გვაჩუქა. ის ყოველწლიურად აფინანსებს სკოლებს, რაც აქამდე არ ყოფილა. მე წელს კიდევ მექნება საშუალება, რომ სფფ-ს დახმარებით ორი მინისტადიონი გავაკეთო", - თქვა თენგიზ სულაქველიძე საუბრის დასაწყისში.

ვლადიმრ გუცაევი: "ამ თემას კიდევ შევეხებით, ვეტერანები შევიკრიბებით, წერილს დავწერთ და ფეხბურთის ფედერაციის მეშვეობით, გავაგებინებამ პრობლემას მთავრობას, რომელიც ფეხბურთს ეხმარება და, ალბათ, კიდევ უფრო დაეხმარება - ვთხოვოთ, რომ ამაშიც დახმაროს".

არის თუ არა ფეხბურთი კვლავ სპორტის ნომერი პირველი სახეობა?

სულაქველიძემ მწვრთნელების კვალიფიკაციაზეც ილაპარაკა: "ჩვენ გვაქვს ხელშეკრულება თბილისის "დინამოსთან" და ჩვენი აზრდილები იქ მიდიან. ძალიან მნიშვნელოვანი მწვრთნელების კვალიფიკაცია.  მწვრთნელს ლიცენზია თუ არ აქვს, მას არ მივიღებ. ჩვენს აკადემიაში უკვე A ლიცენზიის მქონე 4 მწვრთნელია, რაც ბევრს ნიშნავს. კიდევ ორი კურსებს გაივლის და A ლიცენზიას მიიღებს. ცოდნას დიდი მნიშვნელობა აქვს. თანამედროვე ფეხბურთში ბევრი რამ შეიცვალა და ბავშვიც უკეთ გაიზრდება".

გუცაევი: "დღეს ბავშვთა ფეხბურთმართლაც ბევრი რამ შეიცვალა. ბელგიაში დათვალეს - როცა 9-10 წლის ბავშვებს 11x11-ზე ათამაშებენ, თითოეული ბავშვი საშუალოდ 3-4-ჯერ ეხება ბურთს. ეს ძალიან ცოტაა, ამიტომ ბავშვებს ათამაშებენ 2x2-ზე, 3x3-ზე, 4x4-ზე, 5x5-ზე, ხოლო 13 წლი რომ ხდება, უკვე 7x7-ზე, ბურთთან მეტი შეხებით ინდივიდუალურად უფრო ძლიერები რომ გაიზარდონ. ჩვენ ქუჩაში ვთამაშობდით და არც მწვრთნელი გვყავდა, არც მსაჯი, მთელი დღე ფეხბურთს ვთამაშობდი. დღეს კი ინოვაციების დროა, ბავშვები კომპიუტერებს უზიან და ფეხბურთზე ნაკლებად დადიან".

სულაქველიძე: "პატარა მოედნები ამიტომაა საჭირო, რომ ბავშვებს სათამაშო ადგილი ჰქონდეთ. ამიტომაც ვაკეთებთ და, ალბათ, სექტემბრისთვის მზად მექნება".

არის თუ არა დღეს საქართველოში ფეხბურთი კვლავ სპორტის ნომერი პირველი სახეობა? ვეტერანების თქმით, ძველებური ბუმი აღარ არის.

სულაქველიძე: "რა თქმა უნდა, მაინც პირველი სახეობაა, მაგრამ რაგბმ ბევრი მიიზიდა, კალათბურთმა, ჭიდაობამაც და ისე აღარ არის, როგორც ადრე - ბუმი აღ არის".

გუცაევი: "ბავშვი უყურებს, რა შედეგი აქვს ფეხბურთს და სხვა სახეობებს. დღეს რაგბში სანაკრებო თამაშებს ვიგებთ. სულ მსოფლიო თასზე გავდივართ და, რა თქმა უნდა, ამიტომაც ბევრი გარბის რაგბში. ფეხბურთს სერიოზული წარმატებები რომ ჰქონდეს, როგორც ჩვენ დროს იყო, ისევ ფეხბურთზე შევლენ. ახლა არჩევანის საშუალება აქვთ და ადრინდელთან შედარებით, ფეხბურთზე უფრო ნაკლებად შედის ბავშვი".

წინათგრძნობა მაქვს, რომ ბელარუსებს მოვუგებთ!..

"დინამოს" ლეგენდებმა ერთა ლიგის ნახევარფინალურ შეხვედრაზეც ილაპარაკეს, რომელიც 26 მარტს თბილისში გაიმართება და რომელშიც საქართველოს ნაკრები ბელარუსს დაუპირისპირდება.

გუცაევი: "26 მარტის თამაში ერთ-ერთი ყველაზე მნიშვნელოვანი თამაშია. ეს იშვიათი შანსია, რომ ბელარუსს მოვუგოთ და თუ ფინალში გავედით, მერე იმ მატჩის მოგებით ევროპის ჩემპიონატზე მოვხდეთ. 31 მარტს თბილისში ჩრდილოეთ მაკედონიასა და კოსოვოს შორის მოგებულს ველოდებით. თენგიზ, ჩვენ რითი შეგვძლია, ბელარუსს მოვუგოთ?".

სულაქველიძე: "ბრძოლის გარეშე, მოგება წარმოუდგენელია, მაგრამ წინათგრძნობა მაქვს, რომ თუ ყველა წამყვანი მოთამაშე ფორმაში იქნება, მოვუგებთ. სხვაგვარად, ევროპის ჩემპიონატზე მოხვედრა ძნელი იქნება. ისე, მანამდე კარგი იქნებოდა, ამხანაგური შეხვედრა ჩაგვეტარებინა. მაგრამ ის ხალხი თუ არ გამოუშვეს, ვინც ბელარუსთან უნდა ითამაშოს, ამხანაგურ მატჩს აზრი ეკარგება".

გუცაევი: "ფეხბურთელებს მოტივაცია არ სჭირდებათ, რადგან წინ ისეთი რამ ელოდებათ... ეს მორალურადაც წელში გაგვმართავს და ფინანსურადაც, რადგან უეფა განვითარებისთვის თანხებს დარიცხავს და იქნებ, მერე დამოკიდებულება კერძო სპონსორებმაც შეცვალონ. ჩვენი კლუბების ბიუჯეტები სხვებთან შედარებით სასაცილოა. 200-300 ათას ბევრი გუნდი ერთ შეკრებაზე ხარჯავს. ჩვენთან კი მიზერული თანხები იხარჯება. ამიტომ კარგი იქნება, ერთა ლიგაზე ამ ბარიერს თუ გადავლახავთ. ისე, თენგოს ვეთანხმები - ბელარუსამდე ამხანაგური მატჩი კარგი იქნებოდა. მაგრამ ეტყობა, ამ უთამაშებლობასაც თავისი მიზეზი აქვს".

სულაქველიძემ საქართველოს ნაკრების კაპიტანზე ილაპარაკა: "ჯაბა კანკავა ნამდვილი პროფესიონალია! კაცი ამდენი ხანი რომ ითამაშებს, მისასალმებელია. ღირსეულადაც თამაშობს. ბელარუსთან ასეთი ფეხბურთელები რომ იქნებიან და ყველა ბოლომდე თავს დადებს, მოგება გაგვიადვილდება".

სუპერთასის მფლობელებიც ვიქნებოდით...

რატომ აღარ წამოვიდნენ ისეთივე თაობები, როგორებიც ადრე მოდიოდნენ? ამაზე საკუთარი აზრი გადაცემის ერთ-ერთმა წამყვანმაც გამოხატა:

"ეს თაობები საბჭოთა კავშირში გაიზარდნენ. რაც არ უნდა უარყოფითი აზრი გვქონდეს საბჭოთა კავშირზე, ეს ძალიან მაღალი დონის ჩემპიონატი იყო. ფაქტობრივად, ქვეყნები თავის გუნდებს უმაღლეს ლიგაში ათამაშებდნენ. იქ იყო აზერბაიჯანის, სომხეთის, ყაზახეთის, უკრაინი ნაკრებები - მათ 7 გუნდი ჰყავდათ და ნებისმიერი მოთამაშე კიევის "დინამოში" მჰყავდათ. ჩვენ კი ვთამაშობდით ქუთაისის, აფხაზეთის, აჭარის, თბილისის ხარჯზე. ევროპის თასი რომ ავიღეთ, დასაფასებელი იმიტომაც იყო, რომ არც ერთი ლეგიონერი არ გვყავდა და მილიონებად არავინ გვიყიდია. "ლივერპულმა" ჩვენთან სუპერთასის მატჩზე უარი რომ თქვა, უეფას ტექნიკური წაგება უნდა ჩაეთვალა და ახლა ევროპის სუპერთასის მფლობელებიც ვიქნებოდით", - თქვა გუცაევმა.

ქინქლაძის მოლოდინში...

ვლადიმერ გუცაევმა "ტაიმ აუტის" მსვლელობისას განაცხადა, რომ შემდეგ ხუთშაბათს გადაცემის სტუმარი იქნება გიორგი ქინქლაძე.

"ექსკლუზიურად "პირველი არხის" გადაცემის სტუმარი იქნება საქართველოს ერთ-ერთი ყველაზე საყვარელი ფეხბურთელი, რომელიც არავის ინტერვიუს არ აძლევს და არც ერთ ტელევიზიასა თუ გაზეთში არ ყოფილა. როდესაც მან შეიტყო, რომ "პირველ არხზე" ვართ და გადაცემას ვუძღვებით, სიამოვნებით დაგვთანხმდა - ეს ფეხბურთელია გიორგი ქინქლაძე. მან დიდი კვალი დატოვა და არა მხოლოდ ქართულ ფეხბურთში - "მანჩესტერ სიტიში" დღემდე იძახიან, რომ ასეთი ლეგიონერი არ ჰყოლიათ. ხალხს უყვარს, მისი აზრი აინტერესებთ ნაკრებზე, ბავშვებზე, ფეხბურთის მომავალზე... ძალიან სამწუხაროა, ასეთი ფეხბურთელი პრესასა და ტელევიზიაში არ გამოდის. მე გიოს ამაზე ველაპარაკე და სტუმრობაზე დაგვთანხმდა", - განაცხადა გუცაევმა გადაცემის ბოლოს.

https://1tv.ge/video/tengiz-sulaqvelidze-stumrad-vova-gucaevtan-taimauti/

4146
მკითხველის კომენტარები / 0 /
მსგავსი ამბები
რუბრიკის სხვა სიახლეები
;