[VIDEO] თორნიკე შენგელია: როცა პატარა ვიყავი, ერთი ოცნება მქონდა...

ფიბა-ს ოფიციალურმა საიტმა ვრცელი, საინტერესო ინტერვიუ გამოაქვეყნა საქართველოს კალათბურთელთა ნაკრების კაპიტან თორნიკე შენგელიასთან. გთავაზობთ მის სრულ თარგმანს.

შენგელია VS შერმადინი... საამაყო მატჩი: 21 თოკოს, 18+11 გიოს

"შენგელიას ახსოვს თავისი ბავშვობის უდარდელი დღეები საქართველოში. ის თამაშობდა კალათბურთს და მთელი გულით უყვარდა იგი. ის ასევე, პერიოდულად, უყურებდა ეროვნული ნაკრების თამაშებს. ერთ მშვენიერ დღესაც, წარმოიდგინა, რომ მასაც შეეძლო საქართველოს ნაკრებში მოხვედრა, თამაშის წინ მოედანზე თანაგუნდელებთან ერთად გასვლა ეროვნული ჰიმნის სიმღერა.

"როცა პატარა ვიყავი და თამაშების წინ ეროვნულ ჰიმნს ვუსმენდი, ჟრუანტელი მივლიდა და ოცნებად მქონდა, იქ ვყოფილიყავი და ჩემი ქვეყნის სახელი დამეცვა, - ამბობს თორნიკე შენგელია, - და ახლა, როცა ნაკრების წევრი ვარ, ოცნება ამიხდა, ეს ისეთი გრძნობაა, სიტყვებით ვერ აღწერ".
თითქმის სრული დეკადაა, შენგელია საქართველოს ეროვნული ნაკრების ლიდერია. მან ითამაშა 3 ევრობასკეტზე, ასევე მონაწილეობა მიიღო 2019 წლის მსოფლიოს ჩემპიონატის საკვალიფიკაციო ტურნირში. იგი ამბობს, რომ ნაკრების მაისურის ტარება დაბერების საშუალებას არ იძლევა. მაგალითად, შენგელიამ რომ გაიგო, საქართველო მომავალი ევრობასკეტის ჯგუფურ ეტაპს უმასპინძლებდა, ადრენალინის ჭარბი რაოდენობა მიიღო.
"გრძნობა, რომელიც განვიცადეთ, როცა ევრობასკეტის მასპინძლობის შესახებ პირველად გავიგეთ, ქართველი ხალხისთვის აღმაფრთოვანებელი იყო, - იხსენებს შენგელია, - ეს მნიშვნელოვანი მოვლენაა არა მხოლოდ ჩემთვის და მოთამაშეებისთვის, არამედ ყველასთვის ჩვენს ქვეყანაში".

ეს ეხება ახალგაზრდებსაც, რომლებიც ბაძავენ შენგელიას და სურთ გაჰყვნენ მის გზას, ითამაშონ დიდი კალათბურთი და დაიცვან ქვეყნის სახელი. "ესაა მოტივაცია და ჩემს შთაგონებას ისინიც წარმოადგენენ, რადგან მეც ვიყავი მათ ადგილზე".

ევრობასკეტის მასპინძლობა ძალიან კარგია ქვეყნისთვისა და ევროვნული ნაკრებისთვის. ბოლო 2 ევროპის ჩემპიონატს ჯამში 8 ქვეყანამ უმასპინძლა. თამაშები როცა მიმდინარეობს, გულშემატკივრები ან დარბაზში არიან, ან პირდაპირ ეთერში ქომაგობენ თავიანთ ნაკრებს. კალათბურთელებისთვის ძალიან ბევრს ნიშნავს შინ თამაში.

"ევროპის ჩემპიონატის საქართველოში ჩატარება ძალიან მნიშვნელოვანია ახალგაზრდობისთვის, მაღალი დონის თამაშებზე დასწრება, უშუალოდ ტრიბუნაზე ყოფნა,- ამბობს თორნიკე შენგელია, - ბოლო 4 ევრობასკეტზე მონაწილეობა არა მხოლოდ კალათბურთისთვის, არამედ მთლიანად ქართული სპორტისთვის იყო ფასეული. პირველად საქართველომ ევროპის ჩემპიონატზე 2011 წელს ითამაშა, როცა მონაწილეთა რიცხვი 16-დან 24-მდე გაიზარდა.

"ევრობასკეტზე გასვლა დიდად დაგვეხმარა, - განაგრობს შენგელია, - კალათბურთისთვის ყოველთვის იყო დრო, მაგრამ ჩვეულებრივ, მისი ბრწყინვალება ზაფხულობით იგრძნობოდა ხოლმე. თუმცა მას შემდეგ, რაც საქართველო პირველად გავიდა ევრობასკეტზე, კალათბურთი ჩვენს ქვეყანაში პირველი თუ არა, სპორტის ერთ-ერთი პირველი სახეობა გახდა. სტატისტიკურად, ძალიან ბევრმა ახალგაზრდამ დაიწყო კალათბურთზე სიარული".

შენგელიას თქმით, არაფერია მის კარიერაში ისეთი, რაც საქართველოსთვის თამაშს გაუთანაბრდება: "ულაპარაკოდ, ჩემი საუკეთესო მოგონება ისაა, როცა კალათბურთის ფედერაციისგან პირველად მივიღე ეროვნული ნაკრების შეკრებაზე მიწვევა. ეს იყო სუპერსასიხარულო და უბედნიერესი დღე ჩემს ცხოვრებაში. შთაგონებული ვიყავი გუნდელებით და მსურდა, გავმხდარიყავი იმ ნაკრების წევრი, რომელიც ბოლომდე, საფინალო სირენამდე იბრძოდა. როცა გვერდში იმდენი უდიდესი მოთამაშე გყავს, როგორიც ზაზა ფაჩულია, ვიქტორ სანიკიძე, მანუჩარ მარკოიშვილი, გიორგი ცინცაძეა - არ მინდა ვინმე გამომრჩეს - დღის ბოლოს ფიქრობ, რომ არა მხოლოდ რომელიმე მათგანია შენი მოტივატორი, არამედ, ყველანი ერთად, როგორც ერთი მთლიანი გუნდი".

შენგელია ნაკრებში იყო, როცა საქართველოს ნაკრებმა ხმაურით შეაბიჯა ევრობასკეტზე 2011 წელს. 2013 წელი თორნიკემ ტრავმის გამო გამოტოვა და აღმავლობით ჩაატარა 2015 და 2017 წლების ჩემპიონატები.

შემადგენლობაში დანაკლისი იყო ალბათ ის მიზეზი, რამაც საქართველოს ოთხივე ევრობასკეტზე პოზიცია შეურყია: "ევრობასკეტი ერთ-ერთი ტურნირია, რომელშიც მოკლე დროში საკმაოდ ბევრი მატჩის გამართვა გიწევს და ამიტომ საჭიროა იმის ფუფუნება გქონდეს, რომ გრძელი სკამით ყველაფერი დააბალანსო. უმეტესწილად, ჩვენ ევროპის ჩემპიონატებზე 7-8 კალათბურთელით ვთამაშობდით. საქართველოს ნაკრებში, რა თქმა უნდა, გვყავდა კიდევ მოთამაშეები, რომლებიც მზად იყვნენ, მოედანზე თავი გაეწირათ და უმაღლეს დონეზე ეთამაშათ, მაგრამ, სამწუხაროდ, მათ ამის შანსი არ მისცემიათ. აღსანიშნავია, რომ ტურნირის სპეციფიკა კიდევ უფრო ინტენსიური ხდება და მოთამაშეებისგან უდიდეს პროფესიონალიზმს მოითხოვს, რათა ყოველდღიურად მეტი და მეტი ენერგიის გაღება იქნეს შესაძლებელი.

ჩვენ ბევრი მნიშვნელოვანი მატჩი წავაგეთ, თუმცა ბევრიც მოვიგეთ. ბოლო ევრობასკეტზე (თელ ავივში) დავამარცხეთ ლიეტუვა და მასპინძელი ისრაელის ნაკრები".

2015 წელს, საქართველოს ნაკრები მერვედფინალში გავიდა და საფრანგეთის ქალაქ ლილში ლიეტუვის ნაკრებს დაუპირისპირდა. ეს გახლდათ იონას მაჩიულისის საუკეთესო სანაკრებო მატჩი, რომელმაც 34 ქულა ჩაუგდო ქართველებს და ლიეტუვას 85:81 გაამარჯვებინა.

2017 წელს, იტალიამ დიდ ბრძოლაში, 71:69 სძლია საქართველოს ჯგუფური ეტაპის სასიცოცხლოდ მნიშვნელოვან მატჩში, რისი წყალობითაც მოახერხა პლეი ოფში გასვლა. "რომ შევადაროთ იმ დროის საქართველოს და იტალიის ნაკრებები, სხვაობა გრძელ სათადარიგოთა სკამშია, რომელსაც ჩვენი მეტოქე ფლობდა" - იხსენებს შენგელია.

ის შემართება და ბრძოლისუნარიანობა, რაც საქართველომ გამოავლინა გასულ წლებში, გვაფიქრებინებს, რომ ამ ნაკრებს ნებისმიერი მეტოქის დამარცხება შეუძლია.

"როცა ყველა მოთამაშე მწყობრში გვყავს, დარწმუნებული ვარ, იმის ძალა შეგვწევს, ნებისმიერი მეტოქე დავამარცხოთ, - აცხადებს შენგელია, - არ მინდა მიკერძოებულად ჟღერდეს, მაგრამ ასეთი გრძნობა მაქვს. ჩვენ ეს არაერთელ დავამტკიცეთ წარსულში და მზად ვართ, მომავალშიც დავამტკიცოთ".

მომავალ ევრობასკეტზე საქართველოს მასპინძლის სტატუსი ექნება.

"ყოველთვის განსაკუთრებულია საკუთარი გულშემატკივრების წინაშე თამაში, რომ გადავხედოთ ისტორიას, კარგად დავინახავთ, რომ საქართველოს ნაკრები ბევრად შედეგიანია, როცა სახლში თამაშობს და ამიტომ, ეს უპირატესობა უნდა გამოვიყენოთ. მიუხედავად იმისა, რომ ჩვენ გასულ 4 ევრობასკეტზე საკმაოდ ძლიერ შემადგენლობას ვუყრიდით თავს, ყველაფერი უნდა გავაკეთოთ საიმისოდ, რომ მომავალი ჩემპიონატი იყოს ყველაზე შედეგიანი.

მიმაჩნია, რომ ის ბირთვი, რომელიც გასულ დეკადაში იცავდა ჩვენი ნაკრების ღირსებას, საქართველოს ისტორიაში საუკეთესო იყო, თუმცა პერსპექტიული თაობაც მოდის. გვყავს არაერთი დიდებული ახალგაზრდა, რომელსაც შეუძლია ეროვნული ნაკრების რიგების შევსება. ამ პროცესს დრო დასჭირდება, შესათამაშებლად და გუნდის შესაკრავად მუშაობა, მრავალი თამაშის გამართვა იქნება საჭირო, თუმცა სამომავლოდ, ამ მიზნის მიღწევა სრულებით შესაძლებელია".

2128
მკითხველის კომენტარები / 1 /
status quo
4
Tornike,Tu ginda saqarTveloSi gulSematkivrebis pativiscema ar gakargo,rusul gundSi nu gadaxval.
მსგავსი ამბები
რუბრიკის სხვა სიახლეები
;