[VIDEO] თუშიშვილის საოცარი ილეთი ძიუდოს საერთაშორისო ფედერაცამაც აღიარა...

მოგეხსენებათ, მსოფლიოს, ევროპისა და მეორე ევროპული თამაშების ჩემპიონმა გურამ თუშიშვილმა (+100) ხელის ტრავმით გამოწვეული ხანგრძლივი შესვენების შემდეგ სამიოდ დღის წინ დიუსელდორფში იჭიდავა „დიდ მუზარადზე“ და წარმატებითაც: დამაჯერებლად დაამარცხა ყველა მეტოქე და დამსახურებულად გახდა ამ ფრიად პრესტიჟული შეჯიბრების გამარჯვებული. არადა, შეჯიბრება მართლაც რომ წარმომადგენლობითი და სერიოზული გამოდგა - 115 ქვეყნის 659 ძიუდოისტი გამოდიოდა.

თუშიშვილის გარდა, იქ ასევე დიდი წარმატებით გამოვიდა ახალგაზრდა ტატო გრიგალაშვილი, ვინც 81 კილოგრამში შემოგვთავაზა სასიამოვნო სიურპრიზი: წინასწარ შეხვედრებში მსოფლიოს ორ ჩემპიონთან (მათ შორის ერთი იაპონელი ტაკანორი ნაგასე იყო) დამაჯერებელი გამარჯვების შემდეგ ფინალში რუსთა ოლიმპიური ჩემპიონი ხასან ხალმურზაევიც დაამარცხა და ისიც ჩემპიონი გახდა. გარდა ამისა, ჩვენი ნაკრების ანგარიშზე კიდევ ორი მედალია - თითო ვერცხლი და ბრინჯაო. ვერცხლი ევროპის ჩემპიონმა, მსოფლიოს მესამე პრიზიორმა ვაჟა მარგველაშვილმა (66) მოიპოვა, ბრინჯაოს კი ევროპის ბრინჯაოს მედალოსანი ბექა ღვინიაშვილი (90) დაეუფლა.

გურამ თუშიშვილმა ტურნირზე ბევრი დასამახსოვრებელი ორთაბრძოლა ჩაატარა, და ბევრი ლამაზი ილეთიც შემოგვთავაზა, ერთი მათგანი კი ტურნირის 15 საუკეთესო გდებათა ჩამონათვალშიც შევიდა. მან მესამე წრეში - მერვედფინალში ტაჯიკი შაკარმამად მირმამადოვი ჩინებული ამოსმულით ამოატრიალა და სწორედ ეს გდება გამოარჩიეს - ჩამონათვალში ის მეოთხე ადგილზე გავიდა.

აქვე იმასაც გეტყვით, რომ ჩვენი გუნდის ნაწილი უკვე დაბრუნდა გერმანიიდან, ნაწილი კი იქვე დარჩა ერთობლივ შეკრებაზე და ორ დღეში ჩამოვა საქართველოში. ამის შემდეგ გუნდი თბილისში გააგრძელებს მზადებას თბილისის „დიდი პრიზისთვის“, რომელიც მარტის ბოლოს გაიმართება.

4727
მკითხველის კომენტარები / 0 /
მსგავსი ამბები
რუბრიკის სხვა სიახლეები
;