[VIDEO ისტორია] გელა დარსაძე "ატლანტა ჰოქსის" წინააღმდეგ თბილისის სპორტის სასახლეში

1988 წლის ზაფხულში NBA-ის ერთ-ერთი წამყვანი გუნდი "ატლანტა ჰოქსი" ჩამოვიდა საბჭოთა კავშირში ამხანაგური მატჩების ჩასატარებლად. პირველი შეხვედრა საკავშირო ნაკრებთან 25 ივლისს თბილისის სპორტის სასახლეში გაიმართა.

ლევან მოსეშვილის თხოვნით, ალექსანდრ გომელსკიმ მასპინძელთა გუნდის შემადგენლობაში მცირე ხნით ათამაშა გელა დარსაძე, რომელიც მთელი თვის უვარჯიშებელი იყო. ის მატჩი საბჭოელებმა 84:85 დათმეს. მერე ამერიკელებმა ვილნიუსსა და მოსკოვშიც გამართეს ორთაბრძოლები, მაგრამ გომელსკის დარსაძე გუნდში არ მიუწვევია.

არადა, იმავე წელს პარდუბიცეში ხუთთა ტურნირზე, სადაც "დინამომ" მე-3 ადგილი დაიკავა, გელა დარსაძე საუკეთესო კალათბურთელად დაასახელეს. ჟურნალისტ დათო თავართქილაძის შეკითხვაზე, გული ხომ არ გწყდებათ, საბჭოთა კავშირის ნაკრებში რომ ვერ ითამაშეთო, გელას გულახდილად უთქვამს:

"როცა სპორტულ კარიერას ვიწყებდი, რა თქმა უნდა, ვოცნებობდი ევროპისა და მსოფლიოს ჩემპიონატებზე, ოლიმპიადებზე. ერთხელ ვიყავი ნაკრებთან ერთად შეკრებაზე საბერძნეთში, მაგრამ გომელსკიმ საბოლოოდ მაინც ვერ გაბედა, არჩევანი შეეჩერებინა გელა დარსაძეზე. კურტინაიტისი, ხომიჩუსი, ვალტერსი ჩემზე მაღლა იდგნენ. მე კი ნაკრებში თამაშის პრაქტიკა არ გამაჩნდა, თორემ აუცილებლად შევძლებდი ღირსეულად გამოსვლას საბჭოთა კავშირის პირველ გუნდში".

გელა დარსაძე - აი, ვინ დაამშვენებდა დღევანდელ ნაკრებს!

დავუბრუნდეთ "ატლანტა ჰოქსის" სტუმრობას თბილისში. გუნდს წვრთნიდა მაიკ ფრატელო, რომელსაც 2000-იან წლებშიც მოუწია საქართველოში ჩამოსვლა. ამჯერად უკვე უკრაინის ნაკრების მთავარი მწვრთნელის სტატუსით.

- ცეცხლოვანი ცეკვები ვნახე, ძალიან საინტერესო იყო საქართველოში სტუმრობა. მოგეხსენებათ, "ატლანტაც" ჯორჯიის შტატის გუნდია. ასე რომ ორივე ჯორჯია დიდებულია, - ეს მაიკ ფრატელოს სიტყვებია.

თბილისურ მატჩში მონაწილეობა მიიღო ამჟამად ცნობილმა მწვრთნელმა დოკ რივერსმა, რომელთანაც ზაზა ფაჩულიას თბილი დამოკიდებულება აქვს. ასევე ითამაშა "ატლანტა ჰოქსის" ლეგენდამ დომინიკ უილკინსმა.

4453
მკითხველის კომენტარები / 5 /
ბახვა
0
ტყუილებს რატომ წერთ??? დომინიკ უილკსონი ანტლანტა ჰოუკს საბჭოეთში არ ჩამოყოლია, შესაბამისად არც თბილისში არ უთამაშია.
alex
1
უილკინსი არ იყო თბილისში!
მსგავსი ამბები
რუბრიკის სხვა სიახლეები
;