[VIDEO] ისტორია დაწერილია: საქართველომ სერებთი დაამარცხა!

საქართველოს კალათბურთელთა ნაკრებმა ისტორიული გამარჯვება მოიპოვა - სერბეთი მისსავე მოედანზე 94:90 დაამარცხა. ეს იყო ევრობასკეტი 2021-ის საკვალიფიკაციო ეტაპის მეორე მატჩი. ქართველებს სერბეთთან აქამდე ოთხი შეხვედრა ჰქონდათ გამართული. ანგარიში საყაიმო იყო - 2:2. საგულისხმოა, რომ ჩვენმა გუნდმა ორი ამხანაგური მატჩი მოიგო, ხოლო ორი ოფიციალური წააგო. ამჯერად ნავსი გატყდა და მეტოქე ოფიციალურ თამაშშიც დავამარცხეთ, თანაც სერბეთში.

წინაისტორია

დავიწყოთ მცირე განმარტებით. საქართველო 2021 წლის ევრობასკეტის მასპინძელია, თუმცა მაინც თამაშობს შესარჩევ ეტაპზე. ჩვენს ჯგუფში მოხვდნენ სერბეთი ფინეთი და შვეიცარია. საქართველო ევროპის ჩემპიონატზე უკვე გასულია, შესაბამისად ჩვენი ჯგუფიდან ევრობასკეტზე ჩვენი გამოკლებით ორი საუკეთესო გავა. ამ ორი საგზურისთვის იბრძვიან სერბეთი, შვეიცარია და ფინეთი. მათ ჩვენთან მოგება-წაგებები სათვალავში ეთვლებათ, ამიტომ მაქსიმალურად ბოლომდე იბრძვიან "ჯვაროსნების" წინააღმდეგ.

თავის მხრივ, ქართველებისთვის უცხოა მოედანზე გასვლა და ვინმესთვის რამის დათმობა. ამიტომ, მიუხედავად სხვადასხვა მიზნებისა, შვეიცარიასთანაც ბოლო წამებამდე დაძაბული მატჩი ვითამაშეთ და სერბეთთანაც. სხვათა შორის, სლავებმა წინა ტურში ფინეთში ისეთი სხვაობით მოიგეს, სკანდინავიელები საკუთარი გულშემატკივრის წინაშე შეარცხვინეს - 80:58. ქართველებმა კი შვეიცარიასთან ოვერტაიმში 96:88 მოიგეს. დავინახეთ ჩვენი გუნდის ბევრი მინუსი. თუნდაც ამ ორი თამაშის შედეგის გათვალისწინებით ბელგარდულ მატჩში ფავორიტად სერბები ითვლებოდნენ.

სტარტი

შეხვედრის დასაწყისი თითქოს ლოგიკური გამოდგა - იგრო კოკოშკოვის გაწვრთნილმა სერბეთის ნაკრებმა ქულა ქულას მიაყოლა, პერიმეტრიდანაც აგდებდა, ფარქვეშიდანაც და საშუალო დისტანციიდანაც. შედეგად, მერვე წუთზე მასპინძლები 24:10 დაწინაურდნენ.

საქართველოს ნაკრების სასტარტოში მწვრთნელმა ილიას ზუროსმა დააყენა გიორგი ცინცაძე, მერაბ ბოქოლიშვილი, დუდა სანაძე, ბექა ბურჯანაძე და გიორგი შერმადინი. მასპინძლებს ჩვენც შევუწყეთ ხელი - არაერთი შეცდომა დავუშვით, თუმცა პირველივე ათწუთეულში გამოჩნდა, რომ სერბეთი სულაც არ იყო "აუღებელი ციხესიმაგრე". 

ნებისმიერი მწვრთნელი დიდი სიფრთხილით არჩევს ძირითად ხუთეულს, რეზერვში კი თითო "დამრტყმელ ძალას" მაინც ინახავს. მაგალითად, 2006 წელს გორდონ ჰერბერტს ოქროს სათადარიგოდ ვიქტორ სანიკიძე ჰყავდა, იგორ კოკოშკოვს 2010 წელს - მანუჩარ მარკოიშვილი, ხოლო წლეულს ილიას ზუროსი თამაშს ქართველებით იწყებს და სათადარიგოთა სკამიდან ამერიკელი თად მაკფადენი შემოჰყავს.

ის კი მერამდენე მატჩია - ამართლებს!

შემობრუნება

მეორე პერიოდში საქართველოს ნაკრებმა თამაში შემოატრიალა, რაშიც დიდი როლი სწორედ მაკფადენს მიუძღოდა. მოედანზე არ იყვნენ გამოცდილი სასტარტოები, გიორგი ტურძილაძეს, გიორგი კორსანტიას და რატი ანდრონიკაშვილს კი ჯერ არა აქვთ იმის გამოცდილება ასეთი დონის თამაში შენგელიასავით თავზე აიღონ და გუნდს გამარჯვებისკენ გაუძღვნენ. ასეთ სიმაღლეზე მათ აქამდე არ უთამაშიათ, თუმცა დიდი მონდომებისა და ენერგიის ხარჯზე სასტარტოების არყოფნაში ანგარიში კი არ შეინარჩუნეს, არამედ სხვაობაც შეამცირეს და მეორე რაუნდიდან თანაბარი თამაში გაჩაღდა.

სათადარიგოებთან ერთად მოედანზე იყო თად მაკფადენი, რომელიც გამთამაშებლის ფუნქციებს ასრულებდა. სწორედ თადმა დაგვანახა, რა ფასი აქვს გამთამაშებელს, რომელსაც პასის გაცემაც დროულად შეუძლია, სამქულიანის ჩაგდებაც ხელეწიფება, თამაშის დალაგებაც და ფარქვეშ შესვლაც. როდესაც ასეთი პლეიმეიქერი გრძნობს, რომ თამაშის მოგება მასზეა დამოკიდებული, კიდევ უფრო იხსნება და სარგებლიანობა საოცრად მატულობს. ასე იყო 2017 წელს სერბეთში - დიქსონმა 36 ქულა რომ ჩააგდო, ასე იყო გიორგი ცინცაძე "ტარტუ როკში" და ევრობასკეტი 2013-ზე...

ასე იყო მაკფადენიც სერბეთში - 6-დან 5 ორქულიანი, 11-დან 4 სამიანი, 11-დან 11 საჯარიმო ჩააგდო, 7 პასი მიამატა და მატჩი 33 ქულით დაასრულა.

მზადება დარტყმისთვის

მწვრთნელმა ილიას ზუროსმა სერბეთში გამგზავრების წინ თქვა - ტურძილაძე შვეიცარიასთან დებიუტანტი იყო და ძალიან ნერვიულობდა, სერბეთში კი შანსი მიეცემაო... გიორგიმ შანსი მშვენივრად გამოიყენა, ისე ითამაშა, როგორც ამას თსუ-ში აკეთებს - თავისუფლად უტევდა, იბრძოდა, აგდებდა. რაც მთავარია, მის ყოფნაში მწვრთნელს ნამდვილად არ უფიქრია - მალე შევიყვანო შერმადინიო.

სწორედ ტურძილაძის მაგალითზე შეგვიძლია ვთქვათ, რომ სათადარიგოებმა საკმარისზე კარგად დაასვენეს სასტარტოები და გადამწყვეტ მომენტში, როცა თამაშის ბედი წყდებოდა, თითოეული ქართველი (მაკფადენიც უკვე ჩვენიანია) საკმარისი ენერგიით თამაშობდა. 

ასეთ დროს კი სროლის სიზუსტე მატულობს. ამას სტატისტიკაც ადასტურებს. თად მაკფადენის სიზუსტეზე უკვე მოგახსენეთ; გიორგი შერმადინმა 14-დან 9 ორქულიანი, 6-დან 5 საჯარიმო ჩააგდო და 16 ქულას 11 მოხსნა მიამატა; ბექა ბურჯანაძემ 5-დან 3 ორქულიანი და 6-დან 5 საჯარიმო გამოიყენა; მიხეილ ბერიშვილმა კი 2-დან 2 სამქულიანი ჩააგდო...

გადამწყვეტი წუთები

შვეიცარიასთან მატჩის მიმოხილვაში ბევრი ვწერე მეტიქეზე. ეს ლოგიკურიც იყო, მანამდე ჩვენთვის უცნობმა შვეიცარიელებმა ბევრი კითხვის ნიშანი გაგვიჩინეს. მათთან შეხვედრის შემდეგ ბექა ბურჯანაძემ გვითხრა - მთავარია, ჩვენი თამაში ვუჩვენოთ, რას იზამს მეტოქე, ეს მეორეხარისხოვანი იქნებაო. ასეც მოხდა - ყველას კარგად მოგვეხსენება, რომ სერბეთს ერთთავად ნიჭიერი კალათბურთელები ჰყავს, გუნდურადაც თამაშობს და ყველას შეუძლია პერიმეტრიდანაც კარგად შეტევა და სამწამიან ზონაშიც ზუსტი თამაში, დაცვაზე ხომ ლაპარაკი ზედმეტია. თუმცა ნამდვილად ვერ ვიტყვით, რომ სერბეთმა საკუთარი თამაში მოგვახვია. ამიტომაც მის თამაშზე ბევრი სალაპარაკო არ არის. 

პირველ წუთებზე ქართველებმა მეტოქე წინ საკუთარი შეცდომებისა და პირველი წუთების დაძაბულობის გამო გაუშვეს. შემდეგ უკვე მთელი ჩვენი გუნდი ზუროსის დავალებებს კარგად ასრულებდა და მეთოდურად ამცირებდა სხვაობას. მესამე პერიოდის ბოლოს მასპინძლებს ანგარიშიც გავუთანაბრეთ, ხოლო მეოთხეში ანგარიშში სხვაობა აიწონა-დაიწონას პრინციპით მერყეობდა.

როგორ განვითარდა მოვლენები გადამწყვეტ მომენტში, ქრონოლოგია მოგვითხრობს:

სერბეთი-საქართველო

4:19 - ბურჯანაძე 1+1 (81:78)

3:47 - მაკფადენი 3ქ (81:81)

3:34 - იარამაცი 3ქ (84:81)

3:00 - ავრამოვიჩი 2ქ (86:81)

2:15 - სანაძე 3ქ (86:84)

1:54 - ავრამოვიჩი 1+1 (88:84)

1:39 - ბერიშვილი 3ქ (88:87)

1:09 - შერმადინი 2ქ (88:89)

0:56 - რადულიცა 2ქ (90:89)

0:40 - მაკფადენი 3ქ (90:92)

0:06 - მაკფადენი 1+1 (90:94)

94:90 - მეორე გამარჯვება ევრობასკეტის შესარჩევ ეტაპზე. მომდევნო ფანჯარა ნოემბერშია - საქართველო ჯერ ფინეთში ითამაშებს, შემდეგ შვეიცარიაში.

3013
მკითხველის კომენტარები / 1 /
იგორი
0
ფინელები "სკანდინავიელები" არ არიან
მსგავსი ამბები
რუბრიკის სხვა სიახლეები
;