[VIDEO] ისტორიული გამარჯვება: შენგელია ესპანეთის ჩემპიონია

30 ივნისი ისტორიული დღეა - საქართველოს ნაკრების კაპიტანი, თორნიკე შენგელია ესპანეთის ჩემპიონი გახდა. მისმა "ბასკონიამ" ფინალში "ბარსელონა" 69:67 დაამარცხა.
საჩემპიონო თასი თოკომ ჩაიბარა, ეს ლოგიკურიც იყო - ის ხომ "ბასკონიას" კაპიტანია, ამავე დროს შენგელია ერთ-ერთი მთავარი ფაქტორი გახლდათ "ბასკონიას" გამარჯვებისა. გადამწყვეტ მომენტში მან მნიშვნელოვანი სამქულიანი ჩააგდო. ასევე ღირებული ექვსი ქულა მიითვალა (ორი სამიანით) ბოლო წუთებზე საქართველოს ნაკრების ნატურალიზებულმა ამერიკელმა მეტ ჯენინგმა.

ფინალში თორნიკეს სტატისტიკა ასეთი იყო: 33 წუთი, 14 ქულა, 4 მოხსნა, 2 პასი, 2 ჩაჭრა, 2 დაფარება. არ უნდა დაგვავიწყდეს, რომ თოკომ დიდი როლი ითამაშა "ბარსას" ლიდერის, ნიკოლა მიროტიჩის შეჩერებაში. ნიკოლამ მეხუთე ფოლი სწორედ თოკოსთან ბრძოლაში მიიღო.

მეტ ჯენინგმა 20 წუთში 8 ქულა მიითვალა. "ბასკონიას" ბომბარდირი ლუკა ვილდოსა გახდა, რომელმაც 17 ქულა ჩააგდო.

თორნიკეს უშუალო კონკურენტმა მიროტიჩმა 25 წუთში 8 ქულა და 1 მოხსნა მოაგროვა. მისი მონაგარის სიმწირის მიზეზი ქართველი ფორვარდი იყო. შეგახსენებთ, რომ ესპანეთის ლიგის სიმბოლურ ნაკრებში საუკეთესო მძიმე ფორვარდის ადგილი სწორედ მიროტიჩმა დაიკავა, შენგელია მეორე ხუთეულში მოხვდა. ფინალში კი ჩვენიანმა დაამტკიცა, რომ სადღეისოდ მიროტიჩზე სასარგებლო კალათბურთელია.

ნამატჩევს თორნიკე კალათზე ავიდა და, როგორც კაპიტანს შეშვენის, ბადე ჩამოჭრა. ეს გახლდათ "ბასკონიას" მეოთხე გამარჯვება ესპანეთის ჩემპიონატში. რეკორდსმენი "რეალია" - 34.

2634
მკითხველის კომენტარები / 0 /
მსგავსი ამბები
რუბრიკის სხვა სიახლეები
;