[VIDEO] კოპა ამერიკა 2019. ბრინჯაო არგენტინას, წითელი მესის...

არგენტინის ნაკრებმა III ადგილისთვის მატჩში 2:1 დაამარცხა ჩილე, მეხუთედ მოიგო "კოპა ამერიკის" ბრინჯაო და აქ შეიძლებოდა, გვეთქვა, რომ რაღაცნაირად გული მოიფხანა წინა ორ ფინალში დამარცხებისთვის-თქო, მაგრამ ეს მაინც არ იყო რევანში - ბრინჯაო არ არის იმ სინჯის მედალი, რისთვისაც "ალბისელეტე" ბრაზილიაში ჩავიდა...

მაგრამ, ასე იყო თუ ისე, ლიონელ სკალონის გუნდმა მოიგო და შიგადაშიგ კარგი ფეხბურთიც ითამაშა. ეგებ ეს მაინც გამოდგეს ნუგეშად მომავლისთვის. როგორც ლიონელ მესიმ ბრძანა ბრაზილიასთან წაგებული ნახევარფინალის შემდეგ - გუნდი შენების პროცესშია!

პაულო დიბალას გააქვს მეორე გოლი ჩილეს კარში


არგენტინა-ჩილე ტიპური სამხრეთამერიკული მატჩი იყო - ბევრი ჯარიმით (39, ანუ ჯარიმა დაახლოებით ყოველ 2.5 წუთში), წითელ-ყვითლით, კამათითა და ნერვების ჭიდილით. 35-ე წუთზე მოედნიდან გააძევეს მესი და ჩილელთა მცველი გარი მედელი. თითქოს, ეპიზოდი არ იყო ისეთი, ჩხუბი რომ უნდა გამოეწვია, მაგრამ... მესი კარიერაში მეორედ გააძევეს და პირველ შემთხვევაშიც ეს იყო არგენტინის ნაკრების მაისურით...

თუმცა მანამდე მესიმ მოასწრო სერხიო აგუეროსთვის საგოლე პასის გაკეთება, მერე კი თავი გამოიჩინა პაულო დიბალამ, ვისაც ასისტენტობა ჯოვანი ლო სელსომ გაუწია. ჩილემ საპაუხო გოლი არტურო ვიდალის პენალტით გაიტანა.

519
მკითხველის კომენტარები / 0 /
მსგავსი ამბები
რუბრიკის სხვა სიახლეები
;