[VIDEO] კოპა ამერიკა 2019. როცა სუარესიც უარესია... დამარცხდა გუნდი, რომელსაც 3 გოლი არ ჩაუთვალეს

“კოპა ამერიკაზე” ნახევარფინალისტები გამოვლინდნენ. ერთ-ერთი წყვილი ბრაზილია-არგენტინაა, სამხრეთამერიკული და, თამამად ვიტყოდით, მსოფლიო ფეხბურთის კლასიკათაგანი! 

სამწუხაროდ, ერთ-ერთი ვერ იქნება ფინალში და ამის მიზეზი ის არის, რომ არგენტინის ნაკრები ჯგუფიდან მეორე ადგილით გავიდა და გზად ბრაზილიას გადაეყარა...

თუმცა ამას ახლა აღარ აქვს მნიშვნელობა. მეორე ნახევარფინალში კი ყველა ურუგვაის გასვლას ელოდა, მაგრამ... ასე არ მოხდა - ვიდეორეფერისგან “დაჩაგრულმა” ოსკარ ტაბარესის გუნდმა ნახევარფინალის ბილეთი პენალტების სერიაში პერუს “დაუთმო”.

...პერუს, რომელიც ასევე ლატარიაში გამარჯვებულ ჩილეს დაეჭიდება ფინალში გასასვლელად და აქამდე რომაა საქმე მისული, უკვე დიდი მიღწევაა არგენტინელი მწვრთნელის, რიკარდო გარეკას გუნდისთვის...

ვენესუელა-არგენტინა 0:2
გოლები: 0:1 მარტინესი (10), 0:2 ლო სელსო (74)
ვენესუელა (4-1-4-1): ფარინესი - ერნანდესი, კანსელორი, დელ პინო (56. სოტელდო), როსალესი (83. სეიხასი) - მორენო - მურილიო, ერერა, რინკონი, მაჩისი (71. მარტინესი) - რონდონი
არგენტინა (4-1-3-2): არმანი - ფოიტი, პეცელა, ოტამენდი, ტალიაფიკო - პარედესი - დე პაული, მესი, აკუნია (68. ლო სელსო) - მარტინესი (64. დი მარია), აგუერო (85. დიბალა)

არგენტინის ნაკრებმა მატჩი ისე დაიწყო, როგორც ნამდვილ ფავორიტს შეჰფერის. პირველ ტაიმში “ალბისელესტეს” უპირატესობა აშკარა იყო. ერთადერთი, არგენტინელთა ქომაგებს გულში ხინჯად ის თუ დარჩებოდათ, რომ კვლავ ვერ აჩვენა საკადრისი თამაში ლიონელ მესიმ...

სამაგიეროდ, ძალიან კარგი იყო “ინტერის” შემტევი ლაუტარო მარტინესი. მან ულამაზესი ქუსლურით გახსნა ანგარიში მას შემდეგ, რაც სერხიო აგუერომ ძლიერად დაარტყა ვენესუელელთა კარისკენ. არგენტინელებს კიდევ ჰქონდათ რამდენიმე მომენტი, მაგრამ მეტის გატანა ვეღარ შეძლეს.

წინა მატჩებისგან განსხვავებით, ლიონელ სკალონის გუნდი მეტს ცდილობდა შეტევაში, ბოლივიელი არბიტრი კი მთელი ტაიმის განმავლობაში სტვენდა და ყვითელ ბარათებს აფრიალებდა...

მეორე ტაიმი ისევ ლაუტარო მარტინესის აქტიურობით დაიწყო. მისი დარტყმული ბურთი ძელმა აისხლიტა... ეს იყო და, უპირატესობა მთლიანად ვენესუელამ ჩაიგდო ხელში, თუმცა მხოლოდ ერთხელ დაარტყა კარში - რონალდ ერნანდესს მეკარე პაკო არმანიმ არ გაატანინა.

არგენტინელთა მეორე გოლი კი შეცვლაზე შესულმა ჯოვანი ლო სელსომ შეაგდო მას შემდეგ, რაც აგუეროს დარტყმული მეკარემ ძალიან ცუდად მოიგერია.
ამრიგად, არგენტინის ნაკრები გავიდა “კოპა ამერიკის” ნახევარფინალში, სადაც 3 ივლისს (04:30 ჩვენი დროით) ბრაზილიას შეხვდება. ფინალი ნახევარფინალში! - სწორედ ესაა.

ლატარია  ბრაზილიისთვის

ბრაზილია-პარაგვაი 0:0, პენ 4:3
ბრაზილია (4-3-3): ალისონი - დანი ალვეში (85. პაკეტა), ტიაგო სილვა, ფელიპე ლუიში (46. ალექს სანდრო), მარკინიუში - კოუტინიო, ალანი (71. ვილიანი), არტური - ფირმინო, გაბრიელ ჟეზუში, ევერტონი
პარაგვაი (4-5-1): ფერნანდესი - პირისი, გომესი, ალონსო, ბალბუენა - არსამენდია (61. ვალდესი) პერესი (74. როდრიგო როხასი), ორტისი, ალმირონი, სანჩესი (78. ესკობარი) - გონსალესი
გაძევება: ბალბუენა (58. პარაგვაი)

ბრაზილიის ნაკრებმა, მართლაც რომ ბეწვის ხიდზე გაიარა, მაგრამ, საბოლოო ჯამში, მაინც აჯობა პარაგვაის 11-მეტრიანების სერიაში. “სელესაოს” უამრავ გულშემატკივარს ნერვები ერთხელაც დააწყდა.
არადა, პარაგვაიმ ჯგუფური ეტაპი სასწაულად დაძლია - საკმარისი იყო, ბოლო ტურში იაპონიასა და ეკვადორს ფრედ არ ეთამაშათ, რომ ვერაფრით გავიდოდა პლეი ოფში...

ბრაზილიასთან მეოთხედფინალის პირველ ნახევარში ბრძოლა თანაბარი იყო. ტიტეს გუნდს რამდენიმე ნახევარმომენტი ჰქონდა. უნდა გამოვარჩიოთ ფელიპე კოუტინიოს მიერ სახიფათოდ დარტყმული ბურთი, რომელმაც მიზანს ვერ უწია. ყველაზე ახლოს კი გოლთან პარაგვაელი დერლიზ გონსალესი იყო, ვისაც მეკარე ალისონმა არ გაატანინა.

დაიწყო მეორე ტაიმი და პარაგვაი კაცნაკლული დარჩა. ჩილელი არბიტრი ჯერ პენალტს ნიშნავდა მათ კარში, მაგრამ მერე გადაიფიქრა და “ბოლო იმედის” ჯარიმისთვის პარაგვაელებს “ვესტ ჰემის” მცველი, ფაბიან ბალბუენა გაუძევა.

ამის შემდეგ ბრაზილიამ არაერთი მომენტი გაფლანგა, რამაც შედეგად მოიტანა ის, რომ შეხვედრის დასრულების შემდეგ გუნდებმა პენალტების სერიაში სცადეს ბედი. საფეხბურთო ლატარიაში უფრო ბრაზილიას გაუმართლა. პარაგვაელთაგან ვერ შეაგდეს გომესმა და გონსალესმა, ბრაზილიელთაგან კი რობერტო ფირმინომ ააცილა მიზანს. გადამწყვეტი დარტყმა “სიტის” შემტევმა გაბრიელ ჟეზუშმა შეასრულა და ბრაზილია ნახევარფინალში გაძვრა.
ამ გამარჯვების მიუხედავად, “სელესაოს” ქომაგი ძველებურად უკმაყოფილოა. გუნდი ვერ აჩვენებს იმ თამაშს, რასაც მისგან ელიან. შეხვედრის დასრულების შემდეგ ბრაზილიელთა დამრიგებელმა ტიტემ ყველაფერი მინდვრის ცუდ ხარისხს (ამაზე “ლელომ” წინა ნომერში ვრცელი წერილი შემოგთავაზათ) გადააბრალა.

“აბსურდია ის, რომ ასეთ ცუდ მინდორზე მოგვიხდა თამაში. ეს არ არის პირველი შემთხვევა და ასე გაგრძელება აღარ შეიძლება”, - თქვა მწვრთნელმა.

ჩილეს დამსახურებული ნახევარფინალი

კოლუმბია-ჩილე 0:0, პენ 4:5
კოლუმბია (4-3-3): ოსპინა - მედინა, მინა, სანჩესი, ტესილიო - ურიბე (67. კარდონა), ბარიოსი, კუადრადო - მარტინესი (81. დიასი), ფალკაო (77. საპატა), ხამესი

ჩილე (4-3-3): არიასი - ისლა, მედელი, მარიპანი, ბოსეჟური - არანგისი, პულგარი, ვიდალი - ფუენსალიდა (75. პავესი), ვარგასი, ალექსის სანჩესი
“კოპა ამერიკის” მოქმედმა გამარჯვებულმა ჩილემ თერთმეტმეტრიანების სერიაში მოუგო კოლუმბიას და გავიდა ნახევარფინალში. წყვილის ფავორიტად ბევრი კოლუმბიას მიიჩნევდა, მაგრამ თითქოს გადაბერებულმა ჩილემ მეტოქეზე უკეთესად ითამაშა.

მარტო ის რად ღირს, რომ ამ შეხვედრაში ჩილელებს 2 გოლი არ ჩაუთვალეს - ჯერ ჩარლზ არანგისს, რომელმაც მეკარის შეცდომის შემდეგ შეაგდო, მერე კი არტურო ვიდალმა იზეიმა ტყუილად. არგენტინელმა არბიტრმა ნესტორ პიტანამ ჩათვალა, რომ ვიდალის თანაგუნდელმა გილერმო მარიპანმა გოლამდე ხელით ითამაშა...

...11-მეტრიანებში 4:4 იყო, როცა უილიამ ტესილიომ ააცილა. ალექსის სანჩესმა კი შეაგდო და ჩილელი გულშემატკივრები უსაზღვროდ გაახარა. შეიძლება ითქვას, კოლუმბია კარლუს კეირუშის დაცვითი სქემების ტყვეობაში დარჩა...

როცა სუარესიც  უარესია...

ურუგვაი-პერუ 0:0, 4:5 პენ
ურუგვაი (4-4-2): მუსლერა - გონსალესი, ხიმენესი, გოდინი, კასერესი - ნანდესი (57. ტორეირა), ბენტანკური, ვალვერდე (90. სტუანი), დე არასკაეტა - სუარესი, კავანი
პერუ (4-1-4-1): გალიესე - ადვინკულა, აბრამი, სამბრანო, ტრაუკო - ტაპია - კარილიო (75. გონსალესი), ფლორესი, იოტუნი, კუევა (85. რუდიალესი) - გერერო

პერუ ნახევარფინალშია, ურუგვაი კი სახლში. ძალიან უცნაური მატჩი გამოვიდა, რომელშიც ურუგვაი უპირატესობას ფლობდა, მაგრამ არაერთი მომენტი გაფლანგა და 11-მეტრიანების სერიაშიც უკეთ პერუ გამოიყურებოდა. შესაბამისად, ეს საბოლოო შედეგზეც აისახა.

მატჩის დასრულების შემდეგ ურუგვაის ნაკრები მსაჯთა ბრიგადას შემოსწყრა. როგორი საქმეა, ვიდეორეფერიმ ოსკარ ტაბარესის გუნდს 3 გოლი არ ჩაუთვალა - ამაოდ დაშვრნენ ხიორხიან დე არასკაეტა, ლუის სუარესი და ედინსონ კავანი.

სადაც სამართალი იყო, ურუგვაის მაინც ძირითად დროში უნდა გადაეწყვიტა თამაშის ბედი, მაგრამ ვერ შეძლო. განსაკუთრებით კარგი მომენტები გაანიავა კავანიმ. პენალტების სერიაში კი ერთადერთი არაზუსტი დარტყმა შესრულდა და ბედის ირონიით, ამ დარტყმის ავტორიც ურუგვაელთა მთავარი ვარსკვლავი სუარესი გახლდათ - მან მეკარეს ვერ აჯობა.

მაშ ასე, “კოპა ამერიკა 2019-ის” ნახევარფინალური განრიგი ასეთია:

ოთხშაბათი, 3 ივლისი
ბრაზილია-არგენტინა  04:30
ხუთშაბათი, 4 ივლისი
ჩილე-პერუ  04:30

2550
მკითხველის კომენტარები / 0 /
მსგავსი ამბები
რუბრიკის სხვა სიახლეები
;