[VIDEO] მარადონა, პელე, ბეკენბაუერი... ლეგენდები მღერიან!

ფეხბურთში, მით უფრო თანამედროვე ეტაპზე ძალიან ცოტა დრო რჩება არასაფეხბურთო თემებისთვის და ფეხბურთებს უჭირთ თავისი პროფესიის გარდა სხვა საქმით დაკავება. აქედან გამომდინარე, მათი გატაცება ამა, თუ იმ საქმიანობით ნამდვილად მისასალმებელია.

ფეხბურთელების საკმაოდ დიდ ნაწილს მუსიკა უყვარს, ხშირად უსმენს მას და თავისუფალ დროს კონცერტებსაც ესწრება. მაგრამ მათ რიცხვში არცთუ ბევრია ისეთი, თავად რომ უცდია ემღერა, ან რომელიმე ინსტრუმენტზე დაუკრავს.
მათ შორის კი რომლებიც პუბლიკის წინაშე კონცერტზე წარმდგარან, მუსიკალურ ვიდეოკლიპში მიუღიათ მონაწილეობა, ან ინსტრუმენტზე დაუკრავთ - თვით ფეხბურთის ლეგენდებიც არიან.

გვინდა წარმოგიდგინოთ ლეგენდარული ფეხბურთელების მუსიკალური კომპოზიციები, რომლებიც ბევრს ალბათ არ მოუსმენია, თუმცა დააინტერესებს.

პელე
იმ ცნობილ ფეხბურთელებზე საუბარი, რომლებსაც უშუალო შეხება აქვთ მუსიკასთან - ფეხბურთის მეფით დავიწყოთ.
პელეს დიდი სიყვარული მუსიკისადმი ბევრი გულშემატკივარისთვის ალბათ აქამდე უცნობი ამბავია, არადა წარმოიდგინეთ იგი ამით ისეა გატაცებული, რომ ბევრი სიმღერის ავტორი გახლავთ! მის კომპოზიციებს მშობლიურ ბრაზილიაში თურმე ხშირად ასრულებენ.

აღსანიშნავია, რომ ედსონ არანტესი ერთხანს მალავდა თავის გატაცებას და მოგვიანებით, როცა გაამჟღავნა - ამ ამბის დაფარვის მიზეზი ასე ახსნა: "არ მინდოდა საზოგადოებას ერთმანეთთან შეედარებინა ფეხბურთელი პელე და მუსიკოსი პელე. ჩემი საფეხბურთო ტალანტი ღმერთის საჩუქარია, ხოლო მუსიკა მხოლოდ ჰობი".

პელეს მიერ გამოშვებული ალბომი Gინგა, მის სამშობლოში ერთობ პოპულარულია. ფეხბურთის მეფე მუსიკას სამბას, ჯაზსა და ბოსა ნოვას სტილში წერს და ასრულებს.



დიეგო მარადონა
ემილ კუსტურიცას ფილმი მარადონა საქართველოშიც ბევრს გვინახავს. იქ ერთ ეპიზოდში თვითონ დიეგოც მღერის. არგენტინელის ფანებისთვის მარადონას შესრულებით სიმღერაც შესაძლოა უაღესად სასიამოვნო მოსასმენია და ის სხვა დროსაც რომ მისულიყო მიკროფონთან, ქომაგები პელეს და მარადონას მხოლოდ საფეხბურთო კი არა სამუსიკო კლასის შედარებაზეც ბევრს იმსჯელებდნენ, თუმცა კუსტურიცას ფილმში დიეგოს შეხება მუსიკასთან მისი ცხოვრების თითქმის იშვიათი გამონაკლისია. ისე კი სიმღერა ერთობ ემოციური და კარგი გამოუვიდა არგენტინელ ფეხბურთელს. დიეგო თავად ნაკლებად მღერის, თორემ მუსიკას მსმენელის ამპლუაში ხშირად მიმართავს სიმშვიდის მოსაპოვებლად.

ფრანც ბეკენბაუერი
მუსიკის დიდი სიყვარულით გამოირჩევა კაიზერ ფრანციც. ბეკენბაუერს მუსიკა ჯერ კიდევ 60-იან წლებში იტაცებდა. ფრანცმა რამდენიმე ალბომიც გამოსცა, რომელშიც მეგობრობასა და სიყვარულზე მღეროდა. ცნობილია მისი შესრულებით კომპოზიცია "კარგ მეგობრებს არასოდეს დავკარგავთ", რომელსაც გერმანელი ფეხბურთელი მეგობრების გარემოცვაში ასრულებს.

კაიზერ ფრანცი სიჭაბუკეში სერიოზულადაც ფიქრობდა მუსიკოსის კარიერაზე, მაგრამ მერე ეს სურვილი ნელ-ნელა დაცხრა და მთელი არსებით ჩაერთო ფეხბურთში, სადაც უდიდესი ტალანტის მქონე გერმანელი მობურთალი მსოფლიოში ცნობილ სპორტსმენად იქცა. ბეკენბაუერი 90-იანი წლების შუა ხანებამდე სიამოვნებით ასრულებდა პატრიოტულ სიმღერებსაც, რითაც საბრძოლო შემართებას მატებდა გერმანიის ეროვნული გუნდის წევრებს.



კევინ კიგანი
ბეკენბაუერის მომდევნო თაობის კიდევ ერთი პოპულარული ფეხბურთელი, ინგლისელი კევინ კიგანი ვიხილეთ მომღერლის ამპლუაში აქტიური სპორტული კარიერისას. 1979 წელს ტელესივრცეში გამოჩნდა ვიდეორგოლი Head Over Heels in Love, რომელშიც ვოკალისტად "პუდელის" მეტსახელით ცნობილი კიგანი მოგვევლინა.

კევინი მაშინ "ჰამბურგის" შემადგენლობაში ასპარეზობდა და სხვათაშორის სტაჟიან გულშემატკივრებს კარგად ახსოვთ, რომ თბილისში იმყოფებოდა. მაშინ ჩემპიონთა თასის გათამაშებიდან "ლივერპულის" გამომთიშავი თბილისის "დინამო" სწორედ "ჰამბურგმა" დაამარცხა და ერთი გოლი თვითონ ახალგამომცხვარმა მომღერალმაც გაუტანა "დინამოელებს".

საინტერესოა, რომ ერთი სიმღერა პირადად კევინს იმ ხანად უაღესად პოპულარული ჯგუფის "სმოუკის" ლიდერმა კრის ნორმანმაც დაუწერა. საერთოდ კი კიგანს სამი სოლო ალბომი აქვს გამოშვებული მისი ფირფიტების მილიონამდე ოდენობაა გაყიდული!



პეტერ ჩეხი
ფეხბურთელები მუსიკაში არა მხოლოდ თავის ვოკალურ შესაძლებლობებს ავლენენ. ლონდონის "ჩელსის" გოლკიპერი პეტერ ჩეხი შესანიშნავად უკრავს ბარაბნებზე. ჩეხურ ჯგუფ "ედი სტოილოვთან" ერთად მას რამდენიმე კომპოზიციაც აქვს ჩაწერილი. პეტერმა კონტინენტის 2012 წლის საფეხბურთო ჩემპიონატის წინ გამართულ კონცერტზე ვროცლავში (პოლონეთში) მშვენივრად შეასრულა ლეგენდარულ როკ-ჯგუფ "ნირვანას" ჰიტის Like teen spirit-ის პარტია დრამზე.


რუდ გულიტი
წარმატებული გამოდგა სამუსიკო კარიერა მფრინავი ჰოლანდიელი რუდ გულიტისთვის. მას ჯერ პროფესიონლური კონტრაქტისთვისაც არ მოეწერა ხელი, რომ ბას-გიტარაზე უკრავდა ერთ-ერთ ჰოლანდიურ რეგ ჯგუფში. სწორედ რეგის სტილი იტაცებს გულიტს მუსიკაში. 1984 წელს რუდმა ალბომიც გამოცა. პროფესიული საფეხბურთო კარიერის დაწყების შემდეგ, მართალია მას გაცილებით ცოტა დრო რჩებოდა არასაფეხბურთო თემებისთვის, მაგრამ სამოყვარულო დონეზე მაინც იცლიდა სამუსიკოდ.

გულიტმა მონაწილეობა მიიღო ჯგუფ "სამხრეთ აფრიკას" ალბომის ჩაწერაში, რომელიც აპარტეიდის წინააღმდეგ ბრძოლას ეძღვნებოდა. სიმღერა ჰიტად იქცა და სხვადასხვა ქვეყნის ჰიტ აღლუმებში გამოჩნდა. 1988 წელს ჰიტად იქცა აგრეთვე სპეციალურად ჰოლანდიის ეროვნული გუნდის მიერ კონტინეტის ჩემპიონატის მოგებისადმი მიძღვნილი სიმღერა Wij Houden Van Oranje. თუმცა ამას უკვე მხოლოდ გულიტი კი არა "ნარინჯისფერთა" ეროვნული გუნდის მთელი შემადგენლობა ასრულებდა.



გლენ ჰოდლი და კრის უოდლი
დუეტი ჩაწერეს 80-იანი წლების ცნობილმა ინგლისელმა ფეხბურთელებმა გლენ ჰოდლმა და კრის უოდლიმ და მათ მიერ გამოცემულმა სინგლმა Diamond Lights ინგლისურ ჩარტებში ოცეულში იპოვა ადგილი. ინგლისურ ჰიტ აღლუმში ოცეულში მოხვედრა იოლი სულაც არაა და შესაბამისად აღნიშნული შედეგის ჩვენება ჰოდლის და უოდლის დუეტისთვის დიდი მიღწევა იყო.

საფეხბურთო დუეტის სამუსიკო საქმიანობა მისაბაძი ცოტა ხანში მთელი გუნდისთვის აღმოჩნდა. კერძოდ, "ლივერპულმა" ჩაწერა კომპოზიცია Anfield Rap, სადაც ვოკალურ პარტიას გუნდის თავდამსხმელი ჯონ ოლდრიჯი და ჰავბეკი სტივ მაკმაჰონი ასრულებენ. ეს კომპოზიცია ბრიტანულ ჩარტებში მესამე პოზიციამდე აღზევდა - აი ეს მართლა სერიოზული მიღწევა იყო.



პოლ გასკოინი
ჩვენი თემა აბა ექსცენტრიული გაზას გარეშე როგორ ჩაივლის? პოლ გასკოინმა თავისი ვოკალური შესაძლებლობები სამსჯავროზე 1990 წელს ნიუკასლურ ჯგუფ Lindisfarne-თან ერთად გამოიტანა. მათ ჩაწერეს კომპოზიცია Fog On The Tyne - მხიარული სიმღერა მსუბუქი თემით. მომდევნო პროექტი პოლს გაცილებით ცნობილ პოპ-ჯგუფ "ნიუ ორდერთან" ერთად ჰქონდა. ამ ჯგუფმა გაზასთან და ინგლისის ნაკრების რამდენიმე წევრთან ერთად შეასრულა სიმღერა World In Motion, რომლის ტექსტიც სკანდალური გამოდგა და პოპულარობასაც არ დაუყოვნებია. გასკოინის გარდა ბექ - ვოკალს ასრულებდნენ ჯონ ბარნსი, კრის უოდლი, ჯონ მაკმაჰონი და სხვები.

&&&
ჩვენ ძირითადად ძველი თაობის ლეგენდარულ ფეხბურთელებზე გავამახვილეთ თქვენი ყურადღება. რასაკვირველია მუსიკას თანამედროვე საფეხბურთო სამყაროს წარმომადგენელი მობურთალებიც სწყალობენ. ეს გასაკვირი სულაც არაა, რადგან ფეხბურთი და მუსიკა საკმაოდ ახლოს დგანან იმ თვალსაზრისით, რომ ორივეგან შეგვიძლია მაღალ კლასზე, უდიდეს საშემსრულებლო ოსტატობაზე საუბარი.

დიეგო მარადონას, ლიონელ მესის, ან კრიშტიანო რონალდოს დრიბლინგს ბევრისთვის ისეთივე სიამოვნება მოაქვს როგორც ჯონ ბონემის დრამერულ კლასს, ფრედი მერკურის უმაგრეს ვოკალს, ან რიჩი ბლექმორის პარტიას გიტარაზე.

3250
მკითხველის კომენტარები / 1 /
სოსო
0
ჰოდლის და უოდლის მიერ შესრულებული სიმღერა,ასოციაციურად ძალიან მაგონებს იმავე პერიოდში გამოსულ "სეკრეტ სერვისის" კომპოზიციას.რომლის აბსოლიტური ასლიც 90 იან წლებში მოვისმინე რუსების შესრულებით. მუსიკისა და ტექსტის ავტორიც კი გამოაცხადა რადიო "მაიაკმა",რა თქმა უნდა რუსული გვარ სახელები იყო.ერთი სიტყვით,მოიპარეს მთლიანი სიმღერა.
მსგავსი ამბები
რუბრიკის სხვა სიახლეები
;