[თავისუფალი ჭიდაობა. განახლებული. VIDEO+ანალიზი] ქართული ფინალები და მასობრივი ჩხუბი ხალიჩაზე ქართველების მონაწილეობით!

სტამბოლის სპორტის ოლიმპიურ სასახლეში ამ უქმეებზე გამართული იაშარ დოგუს ხსოვნის წლევანდელი ტურნირი მედლებზე და წარმატებაზე მეტად უფრო სკანდალით დაგვამახსოვრდება: 79 კილოგრამის ნახევარფინალური პაექრობა ზურაბ ერბოწონაშვილსა და უკრაინელთა ჩეჩენ ხასან ზაქარიევს შორის მასობრივი ჩხუბით დასრულდა, რომელშიც ორივე გუნდის სამწვრთნელო შტაბის წევრებიც ჩაერივნენ და ორთაბრძოლა რამდენიმე წუთით შეწყდა. შედეგად, ორივე მოჭიდავე მოხსნეს შეჯიბრებიდან, რამაც უფრო ჩვენ დაგვაზარალა - უკრაინელი ისედაც 5:8 აგებდა, ერბოწონაშვილმა კი მოგება, ფინალის საგზური და, მინიმუმ, ვერცხლის მედლის მოპოვების შანსი დაკარგა...

თუმცა ეს ტურნირი ჩვენთვის დიდად წარმატებული ვერც შედეგებით გამოდგა. მართალია, გიორგი იანტბელიძის შეგირდებმა 7 მედალი კი მოიპოვეს და ოთხ ფინალში იჭიდავეს, მაგრამ საბოლოოდ მაინც უჩემპიონოდ დავრჩით. ტურნირის ვიცე-ჩემპიონები სამტრედიელი ედემი ბოლქვაძე (65), ქუთაისელი გიორგი სულავა (74), ყაზბეგელი დავით მარსაგიშვილი (92) და მცხეთელი გივი მაჭარაშვილი (97) გახდნენ, ბრინჯაოს მედლებს კი თბილისელები - სანდრო ამინაშვილი (86), ირაკლი მწითური (92) და მცხეთელი ზურაბ ურთაშვილი (97) დაეუფლნენ. ბრინჯაოს მედლისთვის იჭიდავა გორელმა თეიმურაზ ვანიშვილმაც (61) და თბილისელმა დავით ფირუზაშვილმაც (92), თუმცა დამარცხდნენ და მეხუთეზე დარჩნენ. აქვე ისიც ვთქვათ, რომ ჩვენი გუნდი სტამბოლში გადახალისებული შემადგენლობით ჭიდაობდა - რამდენიმე წონაში გვაკლდნენ ლიდერები. მათ შორის გორელები - მსოფლიოს სამგზის და ევროპის ჩემპიონი, ოლიმპიური პრიზიორი გენო პეტრიაშვილი (125) და ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი (65).

ჩხუბით დასრულებული ნახევარფინალი

ამ ავბედით პაექრობაში თავიდან მეტოქე დაწინაურდა, თუმცა ერბოწონაშვილმა პირველი პერიოდი - 6:3 მოიგო. მეორე პერიოდიც ზაქარიევის უპირატესობით დაიწყო - ისევ ადვილად ჩაიყვანა დაბლა, და ანგარიში მინიმუმამდე შეამცირა: 5:6. ზაქარიევმა პრეტენზიები დასრულებამდე ნახევარი წუთით ადრე დაიწყო, თუმცა სრულიად უსაფუძვლოდ, რადგან, პიქირით - იმ  მომენტში ერბოწონაშვილს დასჭირდა ექიმთა დახმარება სახიდან სისხლის შესაჩერებლად. მონასტერი კი დასრულებამდე 6 წამით ადრე აირია: წაგების საფრთხით გახელებულმა ზაქარიევმა სახეში ხელი მიარტყა ერბოწონაშვილს. ამანაც ხურდა დაუბრუნდა და ლეიბზე ორივე მწვრთნელი შევარდა, ოღონდ არა თავისი შეგირდის დასაწყნარებლად, არამედ - ჩხუბში დასახმარებლად, მერე კი სამწვრთნელო შტაბის სხვა წევრები და სათადარიგოებიც ჩაებნენ მასობრივ დრამაში...

ასეთი აგრესია უფრო მეტად ზაქიევის მსგავს დამწყებ მოჭიდავეებს ახასიათებთ - მათთვის ხომ ნაკრებში დასამკვიდრებლად ყოველ ტურნირს დიდი მნიშვნელობა აქვს და ნებისმიერ წარუმატებლობას მტკივნეულად იღებენ. ამიტომ ჩვენებს უნდა გაეთვალისწინებინათ ეს გარემოება და პროვოკაციას მომზადებული უნდა შეხვედროდნენ - ამ ჩხუბით უფრო ერბოწონაშვილმა იზარალა, ვინც, მინიმუმ, ვერცხლის მედალი დაკარგა.

ბარემ აქვე გეტყვით, რომ ამ საბედისწერო პაექრობამდე ერბოწონაშვილმა თურქმენ ათამურატ ჩარლიევს და თურქ ომერ ფარუკს მოუგო.

ფინალებში ვერ ვიყოჩაღეთ

ჩვენმა ნაკრებმა პირველი მედლები პირველსავე ფინალურ დღეს მოიპოვა. ვერცხლის მედალოსანი ბოლქვაძე გახდა, ვინც საკვალიფიკაციო ეტაპზე აზერბაიჯანელი თურან ბაირამოვი 4:1 დაამარცხა, მერე კი ადგილობრივ ფალავანთან 2:2-ზე იმარჯვა. ნახევარფინალში საკმაოდ ძლიერ მეტოქეს, თურქ ევროპის სამგზის ჩემპიონ ჩინგისხან ერდოგანს (ოპან სატი) 3:2 სძლია, ფინალში კი აზერბაიჯანელ ალი რახიმზადესთან 1:4 წააგო.

პირველივე დღეს ასპარეზობდნენ 97-ის ფალავნებიც, სადაც ქართული ნახევარფინალი გაიმართა - მაჭარაშვილმა 2:1 მოუგო ურთაშვილს და ფინალში გავიდა, სადაც რუმინელ ალბერტ სარიტოვთან 2:6 წააგო. მანამდე მეოთხედფინალში მაჭარაშვილმა თურქმენი ზაიმუხამედ საფაროვი წმინდად, 10:0 დაამარცხა, ხოლო ურთაშვილმა თურქი ბაკი შახინი 2:1 დაჯაბნა. დამამშვიდებლის ფინალში ურთაშვილმა იმავე საფაროვს 13:6 სძლია.

სულავა საკვალიფიკაციოდან ჩაება ტურნირში, სადაც თურქ მუხამედ აკდენიზს 12:7 მოუგო, მეოთხედფინალში კი რუმინელი ზურაბ კაპრაევი 8:0 დაამარცხა. ნახევარფინალში მათ გზას უკვე ძლიერი თურქი - იაკუპ გორიც გაუყენა - 11:2, ფინალური პაექრობა კი ბულგარელთა კავკასიელ ალი-ფაშა უმარფაშაევთან 4:9 წააგო.

მარსაგიშვილმა საქართველოს ჩემპიონატის შემდეგ სტამბოლშიც აჯობა თანაგუნდელ კონკურენტებს და არა მხოლოდ შედეგით: ნახევარფინალში პირადი პაექრობა 3:0 მოუგო დავით ფირუზაშვილს. მანამდე აზერბაიჯანელ შამილ ზუბაიროვს 4:3 აჯობა, ფირუზაშვილმა კი პირველ პაექრობაში თურქმენი მეტოქე წმინდად, 10:0 დაამარცხა. სამაგიეროდ, ამ წონაში ბედისწერად გვექცა მეორე აზერბაიჯანელი - ასლანბეკ ალბოროვი: მან თავდაპირველად მწითურიც დაგვიმარცხა 1:2-ზე, ფინალში კი მარსაგიშვილმა ტრავმის გამო ვერ იჭიდავა. დამამშვიდებლის ფინალში მწითურმა თურქი ერხან ალაიჯი 3:2 დაამარცხა, ფირუზაშვილმა კი ზემოხსენებულ ზუბაიროვთან 5:7 წააგო.

61 კილოგრამში პირდაპირ წირვა გამოგვიყვანა თურქთა მომავალმა ჩემპიონმა ხამზა ალაჯამ: მან ჯერ ვანიშვილს მოუგო, მერე - ოთარ გოგავასაც. დამამშვიდებელში ჩვენები ერთმანეთს შეხვდნენ და ვანიშვილმა იმარჯვა, თუმცა ბრინჯაოსთვის პაექრობა ისევ თურქ რეჯეპ ტოპალთან 0:3 დამარცხდა.

70 კილოგრამში ორი  მონაწილე გვყავდა. ლევან ქელეხსაშვილმა საკვალიფიკაციოში თურქმენ ბატირ ბორიაკოვთან იმარჯვა, მერე კი თურქ ჰეიდარ იავუზთან წააგო. ამასობაში მსოფლიოს ჩემპიონმა ზურაბ იაკობიშვილმა ჯერ ერთ თურქს - მეხმეტ სოილერს კი სძლია, მაგრამ იქვე 5:5-ზე წააგო მეორე მასპინძელთან, სერვეტ ჯოშკუნთან და მერე ვერც დამამშვიდებელში ვეღარ გადავიდა. იქ ბრძოლა მხოლოდ ქელეხსაშვილმა გააგრძელა და თურქმენ ფერმან ხომადოვთან კი იმარჯვა, მაგრამ აზერბაიჯანელ აგახუსეინ მუსტაფაევთან წააგო.

ამინაშვილმა პირველივე პაექრობა წააგო თურქთა მომავალ ჩემპიონ სელიმ იაშართან და პირდაპირ ბრინჯაოსთვის ბრძოლის უფლება მიიღო, რაც კარგად გამოიყენა - ყაზახ ასლან ძიცოევს 4:1 მოუგო.

4919
მკითხველის კომენტარები / 0 /
მსგავსი ამბები
რუბრიკის სხვა სიახლეები
;