[VIDEO მიმოხილვა] ეროვნული ლიგა. ჩიხურა 4:1 დილა: ჩიხურას შინ დაბრუნება მოუხდა

ჩიხურა 4:1  დილა

26.06. ივანწმინდა. ცენტრალური 
1:0 ფანცულაია (8), 2:0 დეკანოიძე (22. სარდალიშვილის პასით), 2:1 ფორტესი (44), 3:1 მახარობლიძე (75. ჩიტეიშვილის პასით), 4:1 მახარობლიძე (88)
ჩიხურა (4-4-2): ჰამზიჩი - კორიფაძე, მაისაშვილი, კამლაძე, მეგრელიშვილი - დეკანოიძე (61. მახარობლიძე), მამასახლისი, ჩიხლაძე (84. ერგემლიძე), მარკოზაშვილი - სარდალიშვილი, ფანცულაია (69. ჩიტეიშვილი)
სათადარიგოები: მწყერაშვილი, კაპანაძე, იონანიძე
მწვრთნელი: სოსო ფრუიძე
დილა (3-2-3-2): ბეგაშვილი - ჩადუნელი, მირცხულავა, გიორბელიძე - რაზმაძე (77. სპანდერაშვილი), კუცია (71. ლემპტი) - ნონიკაშვილი (77. პაიმი), ნონდი, ფორტესი - გოშთელიანი, კუგბენია 
სათადარიგოები: ტიტვინიძე, მამულაშვილი, კერელეიშვილი, გაგნიძე 
მწვრთნელი: გიორგი დეკანოსიძე

გაფრთხილებები: კუცია (31)
არბიტრი: ჯ. ხორავა 

ხანგრძლივი შესვენების შემდეგ საჩხერის “ჩიხურა” საკუთარ სტადიონზე დაბრუნდა - სოსო ფრუიძის გაწვრთნილები ივანწმინდაში გორის “დილას” უმასპინძლებს. 

აღსანიშნავია, რომ ეროვნული ლიგის მიმდინარე სეზონში “ჩიხურას” საკუთარ მოედანზე არ უთამაშია და მშობლიურ კედლებში პირველი შეხვედრა გამართა. თუმცა, სტადიონზე საკმაოდ ცოტა მაყურებელი იყო, რაც ყველაზე მოულოდნელი აღმოჩნდა.

საჩხერულ გუნდს ორი მცველი დააკლდა - თბილისის “დინამოსთან” გაძევებული კაპიტანი შოთა კაშია და მარცხენა მცველი ლაშა ჩიკვაიძე. კაშიას არყოფნაში კაპიტნის სამკლავური ბოსნიელმა მეკარე დინო ჰამზიჩმა მოირგო.

კარგი ტაიმი

თამაში ძალიან საინტერესოდ დაიწყო და მეტოქეებმა თავიდანვე კარგი ფეხბურთი შემოგვთავაზეს. ანგარიში სწრაფად გაიხსნა. მარცხენა ფლაგზე შეტევა დავით მეგრელიშვილმა განავითარა, რომელმაც საჯარიმოსთან ბურთი მიშიკო სარდალიშვილს დაუგდო, მისი დარტყმული მეკარე გიორგი ბეგაშვილმა ცუდად მოიგერია, დამატებაზე კი ახლოდან ბადე გიორგი ფანცულაიამ შეარხია.

გორელებს ანგარიშის გათანაბრება გაშვებული გოლიდან სწრაფადვე შეეძლოთ. შეტევაში მარცხენა მცველი გურამ გიორბელიძე ჩაერთო და საჯარიმოში გურამ გოშთელიანი მოძებნა, რომელმაც ხუთიოდე მეტრიდან მისი თავური ჰამზიჩმა მოიგერია და საჩხერლები აშკარა გოლისგან იხსნა.
მე-13 წუთზე უკვე ლევან ნონიკაშვილმა შეუტია, მაგრამ მისი დარტყმა სუსტი გამოდგა და მეკარემ ბურთი იოლად აიღო.

გორელებმა მე-19 წუთზე სახიფათო ჯარიმის შესრულების უფლება მოიპოვეს - გიორგი კუციას დარტყმული ჯერ ერთ ძელს მოხვდა, მერე - მეორეს, იქ უკვე ჰამზიჩმა მოიგერია და შემდეგ ვითარება ოლეგ მამასახლისმა განმუხტა. 

გორელებმა მწვავედ შეუტიეს და დაცვა მოაშიშვლეს, რაც კონტრშეტევების მოყვარულმა სოსო ფრუიძის გუნდმა იდეალურად გამოიყენა: დემიკო ჩიხლაძემ მოედნის ცენტრში მეტოქეს ბურთი აართვა და შეტევა მარცხენა ფლანგზე სარდალიშვილს გაუგრძელა, მან კი კარის წინ უმეთვალყურეოდ დარჩენილი ბესიკ დეკანოიძე მოძებნა და 2:0.

28-ე წუთზე სარდალიშვილმა კარის წინ დეკანოიძე კიდევ ერთხელ მოძებნა და მას დუბლის შესრულება შეეძლო, მაგრამ დაახანა, მცველმა ხელი შეუშალა და ზუსტად ვერ დაარტყა.

გორელები ტაიმის ბოლო წუთებზე ისევ გამოცოცხლდნენ და სხვაობის შემცირებას ცდილობდნენ. ნონიკაშვილის შორეული დარტყმა ჰამზიჩმა მოიგერია, მაგრამ ალვინ ფორტესის “მოჭრილს” ვეღარაფერი მოუხერხა - 2:1. 

შესვენებამდე გორელებს გათანაბრებაც შეეძლოთ, როცა დავით მაისაშვილს საჯარიმოსთან გურამ გოშთელიანმა ბურთი აართვა, მაგრამ საჩხერელმა მცველმა ხელი მაინც შუეშალა და დარტყმა ძლიერი ვერ გამოდგა.

კიდევ ერთი შანსი დიდიე კუგბენაის ჰქონდა, რომელიც გოშთელიანმა მეკარესთან პირისპირ დატოვა, მაგრამ ტოგოელმა თავდამსხმელმა ასპროცენტიანი შანსით ვერ ისარგებლა - ჰამზიჩმა დარტყმაზე სწრაფად მოახერხა რეაგირება და გუნდი აშკარა გოლისგან იხსნა.

ისევ კონტრშეტევებზე

მეორე ნახევარი ანალოგიური სცენარით ვერ წარიმართა - მეტოქეებმა ბევრად ნაკლები მომენტი შექმნეს, რადგან უფრო ფრთხილად თამაშობდნენ. თავიდანვე გორელები უფრო მეტს და მწვავედ უტევდნენ. იყო სამწუთიანი გამონათება, როცა ჯერ ლევან ნონიკაშვილი ცდილობდა ჯარიმიდან ანგარიშის გათანაბრებას, მალე კი ალვინ ფორტესი, რომელიც კარიდან გამოსულ ჰამზიჩს ბურთს თავზე უგდებდა, მაგრამ მიზანს ვერც ერთმა ვერ მიაღწია. 

62-ე წუთზე გორელებს ანგარიშის გათანაბრება შეეძლოთ, მაგრამ ამოს ნონდის გადაცემით მეკარესთან პირისპირ დარჩენილმა გოშთელიანმა ჰამზიჩს ვერ აჯობა, დამატებაზე კი ფორტესს გადაეღობა და გუნდი აშკარა გოლებისგან იხსნა. გავიდა ერთი წუთი და საჩხერელები გოლს კიდევ ერთხელ გადაურჩნენ, როცა ჯარიმა ფორტესმა შეასრულა და ბადე გარედან შეარხია.

თუმცა, საჩხერელებმა “დილას” ისეთივე რამ გაუკეთეს, რაც პირველ ტაიმში და კონტრშეტევებზე გამოიჭირეს. 73-ე წუთზე სარდალიშვილს შეეძლო, “დილას” იმედებზე ცივი შხაპი გადაესხა - საჩხერელთა შემტევი საჯარიმოში ფლანგიდან შევარდა, მცველებს გაცდა და მახვილი კუთხიდან დაარტყა, მაგრამ სტუმრები მეკარე ბეგაშვილმა გადაარჩინა.

თუმცა, ეს ერთ წუთში შეცვლაზე შესულმა ბიძინა მახარობლიძემ შეძლო. უსწრაფეს შეტევაში გადამწყვეტი როლი რეზო ჩიტეიშვილმა ითამაშა, რომელმაც “მოჭრილი” გადაცემით ბურთი მცველებში გააძვრინა და საჩხერელთა თავდამსხმელი მეკარესთან პირისპირ დატოვა, მან კი კარი ერთი შეხებით აიღო - 3:1.
81-ე წუთზე დემურ ჩიხლაძის გადაცემის შემდეგ მახვილი კუთხიდან ისევ სარდალიშვილმა დაარტყა და ბურთი ძელს მოხვდა. მანვე კიდევ ერთხელ ბედი საჯარიმოს სიახლოვიდან სცადა და კარს ოდნავ ააცილა. 85-ე წუთზე კი სარდალიშვილმა მეკარესთან პირისპირ მიხეილ ერგემლიძე დატოვა და ბეგაშვილმა “დილა” აშკარა გოლს გადაარჩინა. 

თუმცა, საჩხერელებმა მაინც გაიტანეს მეოთხე გოლი - ეს მახარობლიძემ მოახერხა, რომელმაც საჯარიმოს სიახლოვიდან ზუსტად “გაისროლა” და დუბლი შეასრულა - 4:1.

ამის შემდეგ სხვაობის გაზრდას შეტევაში ჩართული საჩხერელთა ცენტრალური მცველი დავით მაისაშვილი ცდილობდა, მაგრამ ანგარიში აღარ შეცვლილა.

ხუთშაბათი, 27 ივნისი
სიონი-დინამო (თბ) 18:00
ბოლნისი. თამაზ სტეფანია. LIVE O2
63: +8 =5 -50, 38-155
I-II წრე: 2:1, 1:5
დისკვალიფიკაცია: ლევან ხმალაძე, თორნიკე თარხნიშვილი (ორივე სიონი) - ნიკა ნინუა (დინამო თბ)

რუსთავი-ვიტ ჯორჯია 21:00
რუსთავი. სფფ-ის აკადემია. LIVE O2
2: +1 =1 -0, 3-2
I-II წრე: 0:0, 3:2
დისკვალიფიკაცია: ლუკა იმნაძე (რუსთავი)

თ მ ფ წ ბ ქ

1. დინამო (ბთ) 20 12 3 5 33:20 39
2. საბურთალო 20 12 3 5 36:24 39
3. დინამო (თბ) 19 11 2 6 34:22 35
4. ტორპედო 20 10 4 6 42:31 34
5. ლოკომოტივი 20 9 2 9 25:23 29
6. ჩიხურა 20 6 8 6 28:22 26
7. დილა 20 6 4 10 22:26 22
8. სიონი 19 6 4 9 23:47 22
9. რუსთავი 19 3 6 10 21:34 15
10. ვიტ ჯორჯია 19 4 2 13 11:26 14

ბომბარდირები
ბ. ზივზივაძე (ტორპედო) 13
ლ. შინდაგორიძე (საბურთალო) 10
ლ. შენგელია (დინამო თბ) 9
ი. სიხარულიძე (ლოკომოტივი) 9
ბ. მახარობლიძე (ჩიხურა) 9
ლ. კუტალია (დინამო თბ) 8
გ. დიასამიძე (საბურთალო) 8
ჯ. უგულავა (სიონი) 8
ჯ. ფლამარიონი (დინამო ბთ) 8

ყოველდღიური სპორტული გაზეთი "ლელო"
713
მკითხველის კომენტარები / 0 /
მსგავსი ამბები
რუბრიკის სხვა სიახლეები
;