[VIDEO] მინსკი 2019. მსაჯის უნებლიე შეცდომა და შეგნებული ქმედება? ანუ შეეძლო თუ არა ბოლქვაძეს ოქროს მოგება

საქართველოს დელეგაცია მინსკში დღესაც ოქროს გარეშე დარჩა, თუმცა კი 3 მედალი მოვიპოვეთ - 1 ვერცხლი და 2 ბრინჯაო. სამწუხაროდ, ბერძნულ-რომაულ ჭიდაობაში ფინალში დამარცხდა და ვერცხლს დასჯერდა შმაგი ბოლქვაძე (67), ხოლო დავით ჩხარტიშვილი (60) მესამეზე გავიდა. კარატეში ბრინჯაოს გოგიტა არქანია დაეუფლა.

ამასთან, ჩვენმა ბერძენ-რომაელებმა კიდევ, მინიმუმ, ერთი ვერცხლი გაინაღდეს - დღესვე ფინალში გავიდა იაკობ ქაჯაია (130), ხოლო რევაზ ნადარეიშვილი (97) დამამშვიდებელ წრეშია გადასული და ბრინჯაოსთვის აგრძელებს ბრძოლას.

ბოლქვაძემ ფინალი 1:3 წააგო რუს ზაურ კაბალოევთან. ეს შეხვედრა დარბაზშივე იქცა განხილვის საგნად და ვეჭვობთ, კიდევ დიდხანს იქნება ასე. რუსების გარდა, უმეტესობის საერთო აზრია, რომ ეს შეხვედრა მსაჯმა გააფუჭა - მეორე ნახევარში რუსი უფრო იმსახურებდა გაფრთხილებას, ვიდრე - ბოლქვაძე, თუმცა არბიტრმა კი საპირისპიროდ განსაჯა.

თუმცა ვიყოთ ობიექტურები და ქართველმაც დააკლო ხელი. ჩემი აზრით, მსაჯმაც შეცოდა, მაგრამ ბოლქვაძესაც მეტი მართებდა.  დაახლოებით ამავე აზრის იყვნენ ლერი ხაბელოვი და ედიშერ მაჩაიძეც.

უმეტესობის აზრით, მეორე პერიოდში რუსი უფრო იმსახურებდა გაფრთხილებას, მაგრამ ჭიდაობაში დაუწერელი წესებიც მოქმედებს. თუმცა მთავარი პრინციპი მაინც ისაა, რომ შენი გასაკეთებელი შენ უნდა გააკეთო, მსაჯზე არ უნდა იყო დამოკიდებული. 

ბოლქვაძემ პირველი პერიოდი 1:0 მოიგო, როცა მეტოქე პასიურობისთვის ქულით დასაჯეს და ჩოქბჯენშიც დააყენეს, მაგრამ ბოლქვაძემ ვერ დაატრიალა. ვფიქრობ, მისი მთავარი მინუსიც ესაა - ჩოქბჯენში თვითონ ვერც დაატრიალა და მეორე პერიოდში თავიც ვერ დაიცვა.

ოღონდ, ყველაზე საწყენი ისაა, რომ შეხვედრის ბედი არა მისმა შეცდომამ, არამედ მსაჯის შეცდომამ თუ განზრახულმა ქმედებამ გადაწყვიტა - რუსმა ამით ქულაც ხომ მიიღო, მერე დაატრიალა, ანუ მსაჯის იმ ერთ ეპიზოდს 3 ქულა მოჰყვა.

არადა, პირველ პერიოდში რუსი იმ ქულის შემდეგაც უფრო პასიური იყო, მაგრამ თურმე მსაჯებში დაუწერელი კანონია, მეორედ არ გააფრთხილებს, თუ არ გარბიხარ ლეიბიდან. მაშინ მე რატომ მაფრთხილებ? თუნდაც თანაბარ ბრძოლაში, მაგრამ მეორე პერიოდშიც ბოლქვაძე უფრო აქტიური იყო.

თუმცა ახლა რაც უნდა ვილაპარაკოთ, ისტორიას ტაბლო რჩება და არა ჩვენი ნათქვამ-ნაწერი. ეგრე მსაჯი ტრიბუნებიდანაც ბევრი ამუნათეს ქართველმა ქომაგებმა, მაგრამ ამით რა!

ჩხარტიშვილსაც გაუჭირდა გამარჯვება რუმინელ რაზვან არნაუტთან და 3:3-ზე მოიგო.

როგორც გითხარით, ხვალ მორიგი ოქროს მოლოდინში ვართ და, იმედია, მორიგი გაწბილება არ გველოდება წინ, თუმცა ქაჯაიას გადამწყვეტი პაექრობა მასპინძელ კირილ ჰრიშჩანკასთან ელოდება, მასთან ბრძოლა კი არ იქნება იოლი. არა იმიტომ, რომ ბელარუსი აქამდე რაიმეთი გამორჩეულია, არამედ - მასპინძელია.

ქაჯაიამ ლიეტუველი რომას ფრიდრიკასი 4:0 დაამარცხა, აზერბაიჯანელ საბუჰი შარიათის კი 10:4 მოუგო. ნახევარფინალში ნორვეგიელ ოსკარ მარვიკს 2:0 აჯობა.

რევაზ ნადარეიშვილი პირველივე წრეში უპრინციპულეს მეტოქეს, სომეხთა ოლიმპიურ, მსოფლიოსა და ევროპის ჩემპიონ არტურ ალექსანიანთან დაძაბულ ბრძოლაში 1:2 დამარცხდა და მერე სანუგეშოში გადასვლის საშუალება მიეცა, სადაც ხვალ ავსტრიელ დანიელ გასტლს შეხვდება, ხოლო მოგების შემთხვევაში დამამშვიდებლის ფინალში რუს ალექსანდრ გოლოვინთან მოუწევს ჭიდაობა.

დღეს მედლის მოპოვების ყველანაირი შანსი დაკარგა რობერტ კობლიაშვილმა (87) - ბერძენ დემეტრიოს ცეკელიდისს წმინდად, 10:0 კი მოუგო, მაგრამ მერე ბელარუს რადზიკ კულიეუსთან 1:2 დამარცხდა. სამწუხაროდ, ბელარუსმაც წააგო უკრაინელ ჟან ბელენიუკთან და კობლიაშვილიც გამოვარდა.

დავით ჩხარტიშვილი: "ამ ტურნირზე უფრო მეტს ველოდებოდი, მაგრამ არ გამოვიდა, თუმცა მედლის მოპოვებით კმაყოფილი ვარ. თუმცა კი ბრინჯაოსთვის შეხვედრაში დაძაბული ბრძოლა მქონდა, მაგრამ მაინც შევძელი და გავიმარჯვე. მომავალში შევეცდები, უფრო უკეთ გამოვიდე. აქვე მინდა, ჩვენს ბიჭებბს წარმატება ვუსურვო ხვალინდელ ბრძოლებში".

6363
მკითხველის კომენტარები / 0 /
მსგავსი ამბები
რუბრიკის სხვა სიახლეები
;