[VIDEO] ნაწილი II: ყველა დროის 20 საუკეთესო გოლი - მეფის ბოლო შეხება ბურთთან

6. არჩი ჯემილი
11 ივნისი, 1978 წელი

მსოფლიო ჩემპიონატი. ჯგუფური ეტაპი
მენდოსა. „სან მარტინი“
შოტლანდია-ჰოლანდია 3:2
68-ე წუთი, 3:1

70-იანი წლების ბოლოს, შოტლანდიას თავის ისტორიაში საუკეთესო გუნდი ჰყავდა. ვარსკვლავების ნაკლებობას არ უჩიოდა (გრემ სუნესი, კენი დალგლიში...), გუნდიც შეთამაშებული იყო და საკონტროლო მატჩების შედეგებიც ოპტიმიზმის საფუძველს იძლეოდა. მაგრამ ბრიტანელებს სტარტი არ გამოუვიდათ:

პერუსთან წაგებამ და ირანთან ფრემ ალი მაკლეოდის გუნდი კატასტროფის წინაშე დააყენა. და მაინც, შოტლანდიელებმა შეძლეს კარის გაჯახუნება, როცა 70-იანი წლების ერთ-ერთი საუკეთესო გუნდი, ჰოლანდიის ნაკრები დაამარცხეს. მარჯვენა ნახევარმცველმა არჩი ჯემილმა იმ ჩემპიონატის ყველაზე ლამაზი გოლი გაიტანა: ერთი ფინტით ჰოლანდიელთა სამი მცველი მოატყუა და მეკარე იონგბლადს თავზე ლამაზად გადაუგდო ბურთი.

7. კარლოს ალბერტო
21 ივნისი, 1970 წელი

მსოფლიო ჩემპიონატი. ფინალი
მეხიკო. „აცტეკა“
ბრაზილია-იტალია 4:1
87-ე წუთი, 4:1

1970 წლის მსოფლიო ჩემპიონატი „ბრაზილიური ეპოქის“ მწვერვალად ითვლება. ბევრი სპეციალისტი მაშინდელ ნაკრებს ყველა დროის საუკეთესო გუნდად მიიჩნევს.

ძნელია ამ მოსაზრებას შეედავო: ბურთის ჯადოქრებმა მთელი ტურნირი ერთი ამოსუნთქვით ჩაატარეს, ხოლო ფინალური მატჩის ბოლო წუთებზე, მათმა კაპიტანმა კარლოს ალბერტომ დიდი ძახილის ნიშანი დაუსვა მექსიკაში ბრაზილიელთა გამოსვლას. ჟაირზინიომ ჟერსონისგან მარცხენა ფლანგზე მიიღო ბურთი, ცენტრისკენ გადაინაცვლა და პელე მონახა.

ეს იყო მსოფლიოს ჩემპიონატებზე მეფის ბოლო შეხება ბურთთან და ის მართლაც მეფური გამოდგა: რბილი პასი საჯარიმოში ჩარბენილ კარლოს ალბერტოზე, იმაზე უფრო ლამაზი გამოვიდა, ვიდრე თავად მცველის დარტყმა.

ამ გამარჯვებით, ბრაზილია მესამედ გახდა მსოფლიოს ჩემპიონი და სამუდამო მფლობელობაში გადაეცა ჟიულ რიმეს თასი - „ოქროს ქალღმერთი“. მოგვიანებით, ეს პრიზი მოიპარეს და დღეს, ბრაზილიის ფეხბურთის კონფედერაცია მხოლოდ მის ასლს ინახავს.

8. ფერენც პუშკაში
25 ნოემბერი, 1953 წელი

ამხანაგური მატჩი
ლონდონი. „უემბლი“
ინგლისი-უნგრეთი 3:6
22-ე წუთი, 1:3

ინგლისელებს უძლეველი უნგრელების შესახებ ბევრი რამ ჰქონდათ გაგებული და ფეხბურთის დამაარსებლებმა გადაწყვიტეს, თავისი ადგილი მიეჩინათ „გათავხედებულებისთვის“. მაგრამ, იმ მომენტში მოქმედმა ოლიმპიურმა ჩემპიონმა, უნგრეთის ნაკრებმა ყველაზე ხმაურიანი სენსაცია შემოგვთავაზა და კონტინენტის პირველი გუნდი გახდა, რომელმაც ინგლისი მისსავე მოედანზე დაამარცხა.

1:2-ზე ფერენც პუშკაშის მიერ გატანილი გოლი მატჩის კულმინაციად იქცა: მახვილი კუთხით მდგომმა, მან მოხდენილი ფინტით მოატყუა ინგლისელთა კაპიტანი ბილი რაიტი და უძლიერესად დაარტყა ახლო მაღალ კუთხეში.

სამშობლოში დაბრუნებულ უნგრეთის ნაკრებს 100 ათასი ადამიანი დახვდა. მაგრამ ერთი წლის შემდეგ, ამავე ადამიანებს აღარ ჰქონდათ ზეიმის საბაბი: ფეხბურთის ისტორიაში ერთ-ერთმა საუკეთესო გუნდმა მსოფლიო ჩემპიონატის მოგება ვერ შეძლო. კიდევ ორი წლის შემდეგ, პოლიტიკური ქაოსის გამო ქვეყანა პუშკაშმა დატოვა, რომელიც მადრიდის „რეალში“ გადავიდა და იქ გააგრძელა თავისი ბრწყინვალე კარიერა.

9. დიეგო მარადონა
25 ივნისი, 1986 წელი

მსოფლიო ჩემპიონატი, 1/2 ფინალი
მეხიკო. „აცტეკა“
არგენტინა-ბელგია 2:0
63-ე წუთი, 2:0

მექსიკის მსოფლიო ჩემპიონატზე სრულად გამოვლინდა მარადონას გენიალური ნიჭი. ინგლისთან მატჩში ჩადენილი გმირობებიდან სამი დღის შემდეგ, არგენტინელთა კაპიტანმა ამჯერად ბელგიის ნაკრები დააჩოქა.

დიეგოს მეორე გოლი ძალიან ლამაზი გამოვიდა: ხოსე კუსიუფომ ბელგიელთა შეტევა ჩაშალა და ბურთი ხორხე ვალდანოს გადააწოდა, მან კი კარიდან 30 მეტრში მარადონა მონახა. ცენტრში მდგომი კაპიტანი არ შეუშინდა ბელგიელი მცველების ტყეს: მარადონა მათ შორის გაძვრა და თითქმის წაქცეულმა ჟან-მარი პფაფს გვერდიდან შემოავლო ბურთი. ეს იყო არგენტინელი ვირტუოზის მეხუთე გოლი ჩემპიონატში. და მართალია, ის საუკეთესო ბომბარდირი ვერ გახდა, სამაგიეროდ, თავის გუნდს ჩემპიონის ტიტული მოუპოვა.

10. ლეონელ მესი
19 აპრილი, 2007 წელი

ესპანეთის თასი, 1/2 ფინალი
ბარსელონა. „ნოუ კამპი“
ბარსელონა-ხეტაფე 5:2
28-ე წუთი, 2:0

მსოფლიო ფეხბურთის „ოქროს ბიჭმა“ ჯერ კიდევ ორი წლის წინ, ჩემპიონთა ლიგაზე შეძლო თავის გამოჩენა, თუმცა ძირითად შემადგენლობაში მყარად ადგილი გასულ სეზონში დაიკავა. არგენტინელის სავიზიტო ბარათი მისი ვირტუოზული ტექნიკაა და „ხეტაფესთან“ მატჩში მას ნამდვილი შედევრი გამოუვიდა:

მოედნის ცენტრში, თავისი საყვარელი მარჯვენა ფლანგიდან მესი მეტოქის კარისკენ დაიძრა, მოატყუა ყველა, ვინც კი გზად შეხვდა, მათ შორის მეკარეც და მახვილი კუთხიდან ზუსტად დაარტყა. ეს გოლი ძალიან ჰგავს იმ ბურთს, რომელიც ამ სიაში პირველ ადგილზე დგას. საერთოდ, მესი ბევრი რამით ჰგავს მარადონას: თუნდაც იმით, რომ მარტში, ლეომ „ესპანიოლის“ კარში ხელით გაიტანა გოლი.

11. რიკარდო ვილია
14 მაისი, 1981 წელი

ინგლისის თასი. ფინალი
ტოტენჰემი-მანჩესტერ სიტი 3:2
76-ე წუთი, 3:2

გოლის გატანამდე, არგენტინელმა ვილიამ „სიტის“ ოთხი მოთამაშე მოატყუა, თანაც აქედან ორს, ფეხებშუა გაუტარა ბურთი.

12. რაიან გიგზი
14 აპრილი, 1999 წელი

ინგლისის თასი. 1/2 ფინალი
მანჩესტერ იუნ-არსენალი 2:1
109-ე წუთი, 2:1

სლალომური რეიდი მარცხენა მცველის ზონაში: გიგზმა უდიდესი სისწრაფით ჩამოიტოვა ხუთი მცველი და დევიდ სიმენს გაუტანა.

13. რივალდო
17 ივნისი, 2000 წელი

ესპანეთის ჩემპიონატი
ბარსელონა-ვალენსია 3:2
89-ე წუთი, 3:2

საჯარიმოს ხაზზე ზურგშექცევით მდგომმა ბრაზილიელმა, მკერდზე მიიღო ბურთი და მაღალ ნახტომში „მაკრატელათი“ აიღო მეტოქის კარი.

14. დენის ბერგკამპი
4 ივლისი, 1998 წელი

მსოფლიო ჩემპიონატი. 1/4 ფინალი
ჰოლანდია-არგენტინა 2:1
90-ე წუთი, 2:1

ფრანკ დე ბურის 60-მეტრიანი პასის შემდეგ, ბერგკამპმა საჯარიმოში აიალა მოატყუა და ტერფის გარე ნაწილით ზუსტად დაარტყა შორეულ კუთხეში.

15. ესტებან კამბიასო
16 ივნისი, 2006 წელი

მსოფლიო ჩემპიონატი. ჯგუფური ეტაპი
არგენტინა-სერბეთი 6:0
31-ე წუთი, 2:0

ამ გოლის უნიკალურობა იმაში მდგომარეობს, რომ არგენტინელებმა კამბიასოს დარტყმამდე 25 (!) ზუსტი გადაცემა შეასრულეს.

16. მაიკლ ოუენი
30 ივნისი, 1998 წელი

მსოფლიო ჩემპიონატი. 1/8 ფინალი
არგენტინა-ინგლისი 2:2
მე-16 წუთი, 1:2

ცენტრალურ ზონაში რეაქტიულმა გარღვევამ და ლამაზმა გოლმა მსოფლიო ფეხბურთს ახალი ვარსკვლავი აჩუქა.

17. რობერტო ბაჯო
19 ივნისი, 1990 წელი

მსოფლიო ჩემპიონატი. ჯგუფური ეტაპი
იტალია-ჩეხოსლოვაკია 2:0
78-ე წუთი, 2:0

ბაჯო გვერდით ხაზთან იდგა, კარამდე უმოკლესი გზა აირჩია, ფინტებით ოთხი მცველი მიაწვინა და მოძრაობის საწინააღმდეგოდ ზუსტად დაარტყა.

18. ჯორჯ ბესტი
2 ოქტომბერი, 1971 წელი

ინგლისის ჩემპიონატი
მანჩესტერ იუნ-შეფილდ იუნ 2:0
84-ე წუთი, 2:0

მოედნის ცენტრში ბურღთან ერთად გაკეთებული პაუზის შემდეგ, ბესტი მოულოდნელად წინ გაიჭრა, გზად ყველა შემხვედრი მოატყუა და ბურთი შორეულ კუთხეში გაგზავნა.

19. გერდ მიულერი
14 ივნისი, 1970 წელი

მსოფლიო ჩემპიონატი. 1/4 ფინალი
გფრ-ინგლისი 3:2
106-ე წუთი, 3:2

გერმანელებმა 1966 წლის მსოფლიოს ჩემპიონატის ფინალში განცდილი მარცხისთვის რევანში აიღეს. მიულერმა დაასრულა პარტნიორების კომბინაცია, როცა ზედა ძელისგან ასხლეტილი ბურთი მოათავსა კარში.

20. ჰელმუტ რანი
4 ივლისი, 1954 წელი

მსოფლიო ჩემპიონატი. ფინალი
გფრ-უნგრეთი 3:2
83-ე წუთი, 3:2

ეს გოლი ყველაზე სენსაციურია მსოფლიო ჩემპიონატების ისტორიაში: კაპიტულაციიდან 9 წლის თავზე, გერმანია ფეხზე წამოდგა - მისი ნაკრები მსოფლიო ჩემპიონი გახდა.



(გაგრძელები იქნება)

ნაწილი I: ყველა დროის 20 საუკეთესო გოლი: გამოკითხვა სპორტულ სამყაროში... [VIDEO]

ყოველდღიური სპორტული გაზეთი "ლელო"
4916
მკითხველის კომენტარები / 1 /
თეიმურაზ დოკვაძე
0
სამოციან წლებში ძალზედ პოპულარული იყო საერთაშორისო ამხანაგური შეხვედრები. თბილისს ეწვია დანიის გუნდი, თუ არ მეშლება, ბოლდკლუბენ 1906.
წვიმიანი ამინდი იყო და თამაშს არ დაესწრო ბევრი მაყურებელი.
მიხეილ მესხმა თავისი ფინტით მოიტოვა მეურვე და კუთხურის ალამის სიახლოვიდან დაარტყა (ჩააწოდა?) და ბურთი შორეულ ცხრიანში მოათავსა!
აი ეს გოლი ჩამრჩა მეხსიერებაში!
და მეორე - ბლოხინის გოლი ბაიერნის კარში!
მსგავსი ამბები
რუბრიკის სხვა სიახლეები
;