[VIDEO] პრემიერლიგა. სტარტი ავტოგოლით, ალისონის ტრავმითა და ლივერპულის შთამბეჭდავი გამარჯვებით

ესეც ასე! პრემიერლიგა შემობრძანდა! დაიწყო დიდი ბატალიები და დაიწყო ვიცე-ჩემპიონის შთამბეჭდავი გამარჯვებით. შარშანდელი შემადგენლობით მოთამაშე "ლივერპულმა" ელიტაში დაბრუნებულ "ნორვიჩს" პირველივე ტაიმში მოუთავა საქმე 4 უპასუხო გოლით და მეორე ტაიმში მხოლოდ პრესტიჟის გოლი "გაატანინა". 4:1 - ასეთია საბოლოო ანგარიში.

მაგრამ იურგენ კლოპს მაინც დარჩა უკმაყოფილების საბაბი. რა თქმა უნდა, "ლივერპული" ვერ არის ჯერ ძველებურ ფორმაში და ეს სრულიად გასაგებია. თან კლოპის გუნდს ძალიან დაეხმარა გრანტ ჰეინლის ავტოგოლი თამაშის დასაწყისშივე, და მეორეც - პირველი ტაიმის ბოლოს, კარიდან ბურთის თამაშში შეყვანის დროს, ტრავმა მიიღო "წითლების" მეკარე ალისონ ბეკერმა და მოედანი იძულებით დატოვა. 

თუ რამდენ ხანს იუქმებს ბრაზილიელი კიპერი, რომელსაც უდიდესი წვლილი მიუძღვოდა "ლივერპულის" შარშანდელ, წარმატებულ სეზონში, ჯერჯერობით უცნობია. ის შეცვალა "ვესტ ჰემის" ყოფილმა მეკარემ, 32 წლის ესპანელმა ადრიანმა, ვინც მხოლოდ ერთ ეპიზოდში იყოჩაღა, ვიდრე მეტოქე გუნდის ფორვარდ ტეემუ პუკის კარის აღების საშუალებას მისცემდა...

"ლივერპულში" გამოსარჩევია მოჰამედ სალაჰი, ვინც გოლი და საგოლე პასი მიითვალა. თავის გამოიჩინეს ასევე ვირჯილ ვან დეიკმა და დივოკ ორიჯიმ. ძირითად შემადგენლობაში არ იყო სადიო მანე, რომელიც თამაშში 74-ე წუთიდან ჩაერთო.

656
მკითხველის კომენტარები / 0 /
მსგავსი ამბები
რუბრიკის სხვა სიახლეები
;