[VIDEO] როგორი სიურპრიზი მოუწყვეს გიორგი ჩაკვეტაძეს!..

ის, რასაც ყველა ქართველი გულშემატკივარი ელოდა, 7 დეკემბერს მოხდა - გიორგი ჩაკვეტაძე 8-თვიანი პაუზის შემდეგ მოედანს დაუბრუნდა. საქართველოს ნაკრების 20 წლის ლიდერი ბელგიის მთავარი ლიგის მე-18 ტურის მატჩში ("გენტი"-"ზულტე ვარეგემი") 76-ე წუთზე გამოჩნდა, რასაც "გელამკო არენაზე" შეკრებილ ქომაგთა დიდი ოვაციები მოჰყვა...

თამაშის შემდეგ ქართველი ფეხბურთელი საყოველთაო ყურადღების ცენტრში მოექცა და რამდენიმე გამოცემამ მიუძღვნა წერილი, რომელიც აუცილებლად დაგაინტერესებთ...

voetbalkrant

"გენტის" გულშემატკივრები ჩაკვეტაძის დაბრუნებამ გაახარა. "ვარეგემთან" მატჩის დროს ყველაზე მეტი აპლოდისმენტი სწორედ ქართველს ერგო. აქამდე, მას არ შეეძლო "ბაფალოსთვის" ("გენტის" მეტსახელია) ეთამაშა, რადგან 2019 წლის 21 აპრილს "ანდერლეხტთან" შეხვედრისას მუხლი დაიზიანა და 8 თვე ვერ თამაშობდა. ახლა, როგორც ჩანს, საშინელი წელი დადებითი ნოტით მთავრდება.

"ძალიან კარგია, ისევ რომ მომეცა თამაშის საშუალება. გულშემატკივრებმა ძალიან თბილად მიმიღეს და თამაშიც ძალიან სასიამოვნო გახდა. მადლობა მინდა გადავუხადო ყველას, ვინც ბოლო თვეებში მამხნევებდა. ახლა ვაგრძელებ შრომას, რათა 2020 წელს სრულად მომზადებული შევხვდე", - ამბობს გიორგი ჩაკვეტაძე.

Het Laatste Nieuws

"აგონია დასრულდა. ტრავმიდან 8 თვის შემდეგ, შაბათს გიორგი ჩაკვეტაძე აპლოდისმენტების ფონზე დაბრუნდა. ქართველმა ჯვარედინი მყესების მძიმე ტრავმის შემდეგ ითამაშა და მიუხედავად იმისა, რომ მხოლოდ 15 წუთი ითამაშა, კარგად გამოიყურებოდა და შეეძლო, გაეტანა და საგოლე გადაცემაც შეესრულებინა.

"გოლის გარეშეც ეს საღამო ჩემთვის წარმატებული იყო. ყველაზე მნიშვნელოვანი ის არის, რომ მუხლზე არანაირი ტკივილი არ მიგრძვნია. მოედანზე შიშის გარეშე ვიყავი. ახლა მხოლოდ სათამაშო პრაქტიკა მჭირდება, რომ ფორმა აღვიდგინო", - ამბობს ქართველი ნახევარმცველი.

გიორგიმ არც ის დამალა, რომ შაბათს მცირე სიურპრიზი მოუწყვეს, ვინაიდან თავიდან განაცხადში არ იყო: "მე შოკში ვიყავი, როცა განაცხადში ჩემი გვარი ვერ ვნახე. მაგრამ მწვრთნელმა ბოლო ვარჯიშამდე მითხრა, რომ თამაშისთვის მზად ვიყავი".

საქართველოში კი ლოდინი აღარ შეუძლიათ. ჩაკვეტაძემ ამაზეც ილაპარაკა: "ჩემი ტელეფონი შეტყობინებებით გადაივსო. საქართველოდან ხალხი ყოველდღე მეკითხებოდა, როდის დავბრუნდებოდი"

walfoot

პირველ ტაიმში რომან ბეზუსმა და რომან იარემჩუკმა გაიტანეს 2 გოლი, რამაც განტუაზელებს (ასე გამოითქმის ქალაქი გენტი ფრანგულად) საშუალება მისცა, "ზულტე ვარგემი" მშვიდად დაემარცხებინათ. თუმცა უფრო მეტი ტაში გიორგი ჩაკვეტაძემ დაიმსახურა, რომელმაც შაბათს დიდი ხნის პაუზის შემდეგ ითამაშა. ახალგაზრდა ფეხბურთელი ტკბებოდა თბილი მიღებით. 

"ეს ფანტასტიური იყო! როგორც იქნა, თამაშის საშუალება მომეცა და ხალხის მხარდაჭერაც ვიგრძენი. მაგრამ ცოტა დრო მაინც დამჭირდება, 100 პროცენტით მზად ვიყო. მინდა მადლობა გადავუხადო კლუბში ყველა იმ ადამიანს, რომელთაგანაც დიდი მხარდაჭერა მივიღე".

როცა კერპი ბრუნდება...

"გენტის" ტვიტერის გვერდზე გავრცელდა ვიდეო, რომელიც გიორგი ჩაკვეტაძის დაბრუნებას ეძღვნება და სადაც ასეთი მინაწერია - "ჩაკ-ვე-ტა-ძე! როცა კერპი ბრუნდება!".

მშვენიერია - ბელგიის ჩემპიონატის მეორეადგილოსან გუნდში კერპი ქართველია. ეს ქვეყანა კი ფიფას რეიტინგში პირველ ადგილზეა...

5829
მკითხველის კომენტარები / 0 /
მსგავსი ამბები
რუბრიკის სხვა სიახლეები
;