[VIDEO] საბერძნეთი 81: 69 საქართველო: შერმადინი და კრეტული ბურუსი - რა მოხდა საბერძნეთში [ანალიზი]

21 თებერვალი, ჰერაკლიონ არენა
საბერძნეთი - საქართველო 81:69
23:14, 21:17, 22:20, 15:18

საბერძნეთი: ათინაიუ (12ქ), კაკლამანაკისი, კონიარისი (11ქ, 5პ), მარგარიტისი (6ქ), ვასილოპულოსი (15ქ), ბოქორიდისი (13ქ), ბურუსისი (9ქ, 10მ, 6პ), ქრისიკოპულოსი, გკიკასი (8ქ), კასელაკისი (3ქ), მავროეიდისი, სალუსტროსი (4ქ).
საქართველო: ანდრონიკაშვილი (4ქ), ბოქოლიშვილი, მაქფადენი (18ქ, 5პ), სანაძე (6ქ), შერმადინი (26ქ, 15მ, 3პ, 2დ), ბერიშვილი (10ქ), დვალიშვილი, ლონდარიძე, ცინცაძე (5ქ, 7პ), ბექაური, ჭოჭუა, ფხაკაძე.
მსაჯები: მარიუს კიულინი (რუმინეთი), ლუის კასტილო (ესპანეთი), ანდრეი შარაპა (ბელარუსი).

საქართველოს კალათბურთელთა ნაკრებმა მსოფლიოს ჩემპიონატის მეორე საკვალიფიკაციო ეტაპის ბოლოსწინა მატჩი კრეტაზე, მინოტავრის სამშობლოში, ითამაშა საბერძნეთის წინააღმდეგ და 69:81 დამარცხდა...

...მინოტავრი ვახსენეთ და საბერძნეთის ნაკრები ხარისთავიან გავეშებულ ადამიანს მოგაგონებდათ, რომელსაც თითქოს ლეგენდების დრო ყოფილიყოს, ადამიანის სისხლი სწყუროდა.

ფარქვეშიდან რამდენიმე სურათი გადავიღე და უნდა გენახათ, როგორი აგრესიით იცავდნენ ისინი თავს. საკითხავი მხოლოდ ის იყო, გაიგნებდა თუ არა გზას ლაბირინთში ილიას ზუროსი. ქართველთა მწვრთნელი ხომ ბერძენია და ძაფის ერთი კი არა, რამდენიმე გორგალი უნდა ჰქონოდა ელინთა ნაკრების დასამარცხებლად.

პირველი გორგალი საქართველოს ნაკრების წინა ხაზი გახლდათ: დიდი ხანია, ჩვენი სათამაშო სქემების გარჩევისას მეტოქეთა მწვრთნელები მთავარ ყურადღებას მეფარეებს უთმობენ.

მიუხედავად იმისა, რომ საქართველოს ნაკრებში აღარ თამაშობს ფაჩულია და ვერ თამაშობენ (ტრავმის და ევროლიგის სიჯიუტის გამო) შენგელია და ბითაძე, ჩვენი მთავარი დამრტყმელი ძალა მაინც წინა ხაზი უნდა ყოფილიყო. ბერძენთა თავკაცსაც ეტყობოდა, რომ ბევრი ჰქონდა ნაფიქრი გიორგი შერმადინის განეიტრალებაზე.

მას პერსონალური მეურვეც მიუჩინა (ბურუსისი), ხოლო თუ გიო მასაც აჯობებდა, დაზღვევაზე სხვა კალათბურთელები არ გადადიოდნენ. რატომ? იმიტომ, რომ რჩებოდა შთაბეჭდილება - მასპინძელთა მწვრთნელისთვის შერმადინის ქულები ერჩივნა სხვა ქართველების ათამაშებას და სამქულიან ტყორცნებს. ჩვენ ხომ წინა მატჩებშიც დაგვიმტკიცებია, რომ პერიმეტრიდან ტყორცნა შეგვიძლია.

საბოლოოდ გიორგი შერმადინმა 26 ქულა ჩააგდო, 15 მოხსნა მიითვალა, მაგრამ...

საქართველოს ნაკრების მთავარი მწვრთნელი თითქმის ყველა მატჩში გვთავაზობს სიურპრიზებს. მაგალითად, 2017 წელს, მსოფლიოს საკვალიფიკაციოს საწყის მატჩებში, გაცილებით ძლიერი შემადგენლობის სერბეთსა და გერმანიას სამქულიანები დაუპირისპირა - კალათბურთელები გაფრთხილებულები იყვნენ, საშუალება მიეცემოდათ თუ არა, პერიმეტრიდან დაუფიქრებლად ესროლათ. ამ სიურპრიზმა გერმანიაც დააბნია, სერბეთიც და ბოლო წამს გონს რომ არ მოსულიყვნენ, საქართველოსთან საშინაო მატჩებში სირცხვილსაც ჭამდნენ.

2018 წლის ნოემბრის მატჩებში ზუროსისგან ახალი სიურპრიზი ვიხილეთ: მოედანზე ერთდროულად ორი 210 სმ-ს გადაცილებული კალათბურთელი - ბითაძე და შერმადინი. ამ ტაქტიკამ შედეგიც მოიტანა.

სწორედ ამ ტაქტიკური მონახაზიდან გამომდინარე, ზუროსმა გადაწყვიტა, მოედანზე სასტარტოში ერთდროულად დაეყენებინა ღონიერი მეფარეები გიორგი შერმადინი და აკაკი დვალიშვილი. ამჯერად ამ ტაქტიკამ რომ არ გაამართლა ისიც მოწმობს, რომ მატჩის უმეტესი ნაწილი ქართველთა მწვრთნელმა ერთი ცენტრით, ერთი მსუბუქი ფორვარდითა და სამი უკანახაზელით ითამაშა.

რაოდენ მოულოდნელი სიურპრიზიც უნდა შესთავაზო მოწინააღმდეგეს, თუ მეტოქეს დაცვა დალაგებული აქვს, ისეთ შედეგს ვერ მოიმკი, როგორიც ჩაფიქრებული გაქვს.

ვითამაშეთ ის, რისი საშუალებაც მეტოქემ მოგვცაო - ხშირად გაიგონებთ. საბერძნეთის ნაკრებს, ისევე როგორც საქართველოს, შემადგენლობაში ხშირი ცვლილებების განხორციელება უწევს. თავად განსაჯეთ: სექტემბერში, თბილისურ შეხვედრაში თამაშობდნენ NBA-მოვლილები პაპანიკოლაუ და კალათესი, მათ გარდა იყვნენ ევროლიგის ვარსკვლავები... ამჯერად კი ბერძენთა მწვრთნელს საბერძნეთის ჩემპიონატის რიგითი კალათბურთელები შერჩა, გუნდში ტოპვარსკვლავი მხოლოდ იოანის ბურუსისი გახლდათ.

ეს ის შემთხვევაა, როცა ვარსკვლავობა ბევრს არაფერს წყვეტს. ეს ჰერაკლიონის მატჩმაც დაადასტურა - ბერძნები დიდი აგრესიით იცავდნენ თავს, თითქმის მთელი მატჩის განმავლობაში მჭიდრო პრესინგი ითამაშეს და ამიტომაც გაიმარჯვეს.



საქართველოს ნაკრების დაცვა კი არათანაბარი და არასტაბილური იყო. ერთ მომენტში ჩავარდა და მეტოქეს 33:35 ჩამორჩა, შემდეგ ისეთი კონცენტრაცია გამოიჩინა, თამაშის შემოტრიალების იმედი გაჩნდა. მეოთხე პერიოდში სხვაობა 5 ქულამდე შეამცირა და სწორედ მაშინ, როცა ქართველ გულშემატკივარს თამაში შემოტრიალებული ეგონა, ისევ და ისევ სამქულიანებით საბერძნეთმა თამაშის ბედი გადაწყვიტა.

- როდესაც პირველი ადგილი გარანტირებული გაქვს, სულ სხვა თავდაჯერებით თამაშობ. ამიტომაც ჩააგდო საბერძნეთის ნაკრებმა სამქულიანები მაღალი პროცენტული მაჩვენებლით. მათთვის ყოფნა-არყოფნის საკითხი რომ ყოფილიყო, არა მგონია, ამდენი სამიანი გამოეყენებინათ, - გვითხრა ვლადიმერ ბოისამ.

აღსანიშნავია, რომ ჩვენს ჯგუფში ესტონეთის ნაკრებმა სენსაცია გამოაცხო - სერბეთი 71:70 დაამარცხა და ამით საქართველოს ნაკრებს შანსი შეუნარჩუნა, სამწუხაროდ, ამ შანსმა მხოლოდ ნახევარი საათი გასტანა....

ილიას ზუროსი:
- საქართველოს ნაკრები თამაშის წინ რთულ სიტუაციაში იყო. წინა ფანჯარასთან შედარებით კიდევ გამოგვაკლდა ორი კალათბურთელი - გოგა ბითაძე და ბექა ბურჯანაძე. წაგების მთავარი მიზეზიც ეს იყო. კიდევ ერთხელ გამოჩნდა, რომ საბერძნეთი მაღალი დონის გუნდია და შემთხვევით არ დაუკავებია პირველი ადგილი ჯგუფში.

გიორგი შერმადინი:
- ბოლომდე ვიბრძოლეთ. გვქონდა მართლაც კარგი მომენტები, მაგრამ გადამწყვეტ ეპიზოდში ვერ შევძელით მეტოქის დაჯაბვნა. იოანის ბურუსისი მაღალი დონის კალათბურთელია, რაც ამ შეხვედრაშიც დაამტკიცა. მართალია, 9 ქულა ჩააგდო, მაგრამ თამაშს ხსნიდა და მწვრთნელმა ამიტომაც ათამაშა დიდი დროით.

ვაჟა სიმონიშვილი
საბერძნეთიდან

ყოველდღიური სპორტული გაზეთი "ლელო"
1371
მკითხველის კომენტარები / 0 /
მსგავსი ამბები
რუბრიკის სხვა სიახლეები
;