[VIDEO] საქართველოს ნაკრების პლუს-მინუსები შვეიცარიული საათის წიკწიკში

ევრობასკეტი 2021
საქართველო-შვეიცარია 96:88 ო
17:8, 25:21, 16:24, 21:26, 17:9
საქართველო: ცინცაძე (21წთ, 6ქ, 4პ), სანაძე (40წთ, 14ქ, 3მ), ბოქოლიშვილი (14წთ), ბურჯანაძე (33 წთ, 21ქ, 7მ, 3პ, 2დ), შერმადინი (36წთ, 16ქ, 13მ, 4პ), ანდრონიკაშვილი (15წთ, 7ქ, 4მ), ტურძილაძე (3წთ), კორსანტია (8წთ, 3ქ), ბერიშვილი (15წთ, 11ქ), მაკფადენი (39წთ, 18ქ, 7მ, 6პ), ლობჯანიძე (1წთ).
შვეიცარია: ბალდასერი (18ქ, 6მ), მბალა, ჟონინი, კაზადი (22ქ, 10მ, 10პ), დ. მლადიანი (5ქ), კოზიჩი, კოვაჩი (14ქ, 5პ), დუბასი (5ქ, 6მ), კოტური (12ქ, 8მ), მ. მლადიანი (6ქ), იურკოვიცი (6ქ, 10მ).
მსაჯები: ვ. ლისჟკა (პოლონეთი), ტ. სუსლოვი (ესტონეთი), გ. სლივიჩი (ავსტრია).

საქართველოს ნაკრებმა ევრობასკეტის შესარჩევ ეტაპზე პირველი მატჩი გამართა. თბილისს შვეიცარიის ნაკრები ესტუმრა და დაძაბულ ბრძოლაში ქართველებმა 96:88 გაიმარჯვეს.

I პერიოდი

სასტარტო შემადგენლობაში ვიხილეთ გიორგი ცინცაძე, მერაბ ბოქოლიშვილი, დუდა სანაძე, ბექა ბურჯანაძე და გიორგი შერმადინი.

შვეიცარიელების ხუთეულთან შედარებით ჩვენი ძირითადი შემადგენლობა გაცილებით მაღალი და ღონიერი ჩანდა. მათი სასტარტო ცენტრი ბალდასერი ხომ შერმადინზე 16 სატიმეტრით დაბალი გახლავთ, თუმცა იგი უფრო ხშირად პერიმეტრიდან სტყორცნიდა და მეორე ტაიმში დაგვანახა, რომ ეს საქმე კარგად გამოსდის.

პირველ მეოთხედში კი შვეიცარია "ბოდიშივით" ატუზულიყო - სავსე ტრიბუნების დანახვამ ამ გუნდის კალათბურთელებზე დამთრგუნველად იმოქმედა და ერთ მომენტში 7 წუთის განმავლობაში ქულის ჩაგდება ვერ მოახერხეს.

II პერიოდი

შეცვლაზე შემოსულმა თად მაკფადენმა და მიხეილ ბერიშვილმა მეორე პერიოდში სტუმრები პერიმეტრიდან დაბომბეს, პირველმა 3 სამიანი გამოიყენა, მიშამ - 2 და მატჩის მე-13 წუთისთვის 29:8 დავწინაურდით. ეს იყო ყველაზე დიდი სხვაობა შეხვედრაში.

სწორედ ამის შემდეგ მოეხსნათ სტუმრებს ყოველგვარი კომპლექსი, თავის მხრივ საქართველოს ნაკრებმაც მისცა მეტოქეს თამაშში დაბრუნების უფლება და დიდი შესვენების წინ 21-ქულიანი უპირატესობა +13-მდე შემცირდა (42:39).

III პერიოდი

შესვენებიდან დაბრუნებულმა შვეიცარიელებმა ტემპს კიდევ უფრო მოუმატეს, ისინი თავქუდმოგლეჯილები გარბოდნენ ჩვენი კალათისკენ, ასეთ დროს კი დაცვაში თამაშის დალაგება იოლი არ არის.

თამაშის ასწრაფება სულაც არ იქნებოდა პრობლემა, სტუმრებს სამიზნეც რომ არ გაესწორებინათ. ისინი სამქულიანებსაც ზუსტად სტყორცნიდნენ და 58:53 საქართველოს ნაკრების სასარგებლოდ მეოთხე რაუნდის წინ.

IV პერიოდი

ძირითადი დროის დასრულებამდე 3:43 წუთით ადრე სწორედ ზემოთ ნახსენებმა ბალდასერმა ბურთი ჩვენი ფარიდან მოხსნა, ჩააგდო და ანგარიში გათანაბრდა - 70:70.

1:36 წუთით ადრე თად მაკფადენმა სამქულიანით 76:72 დაგვაწინაურა.

0:56 - ადრე ბექა ბურჯანაძემ ასევე სამქულიანით დაგვამშვიდა 79:74. ეს თითქოს გამარჯვების სამიანი იყო, მაგრამ...

0:48 - კოვაჩმა კუთხიდან სამქულიანი ჩააგდო, ხოლო 0:01 წუთით ადრე კოტურმა ანგარიში გაათანაბრა - 79:79.

ოვერტაიმი

დამატებითი დრო შვეიცარიელებმა კარგად დაიწყეს, გაგვასწრეს კიდეც - 88:86, თუმცა ამის შემდეგ კიდევ უკეთ გამოჩნდა საქართველოს ნაკრების კლასი:

2:05 - შერმადინი 1+1 და 88:88.

1:26 - ბურჯანაძე 3 ქულა და 91:88. ეს კი მართლა გამარჯვების სამიანი იყო ბექას შესრულებით.

0:52 - ბერიშვილი 3 ქულა და 94:88.

საფინალო ანგარიში კი დუდა სანაძემ საჯარიმოებით დააფიქსირა - 96:88.

ფინეთი-სერბეთი 58:80

ეს იყო შეხვედრა რომელშიც 21 ქულით იგებ და საბოლოო გამარჯვებისთვის ოვერტაიმი დაგჭირდება, რომელშიც მეტოქე შენს ფარზე 23-ჯერ მოხსნის ბურთს, როდესაც სამქულიანებში ისტორიულ რეკორდს ამყარებ, რომელშიც ახალი გმირი იბადება და სანაკრებო პერსპექტივა ჩნდება...

სწორედ ასეთ კონტრასტულ შეხვედრებში ჩანს პლუსებიცა და მინუსებიც. რამდენიმე ასპექტზე აუცილებლად უნდა გამახვილდეს ყურადღება.

რეკორდული 17
საქართველოს ნაკრებს ერთ მატჩში ყველაზე მეტი სამქულიანი მსოფლიო თასი 2019-ის შესარჩევში აქვს ჩაგდებული - ავსტრიასთან (თბილისში) და გერმანიასთან (ქემნიცში) 16-16.

2020 წლის 20 თებერვალს შვეიცარიასთან 17 რეალიზებულ სამქულიანს მოვუყარეთ თავი, რაც ისტორიული რეკორდია.

როდესაც თამაშის მოგების მიზეზებზე ვლაპარაკობთ, სამქულიანების ასპექტი ერთ-ერთი პირველი უნდა ვახსენოთ. მაკფადენმა ჯამში 12-დან 6 სამიანი გამოიყენა, სანაძემ 7-დან 3, ბერიშვილმა 5-დან 3...

ორი გამოყენებული შანსი
ერთ-ერთი გამოცდილი მწვრთნელის სიტყვებს გავიმეორებ: მატჩის გმირი და საუკეთესო მოთამაშე სხვადასხვაა. შეიძლება მანამდე ქულა არ ჰქონდეს ჩაგდებული, მაგრამ ბოლო წამებზე ისეთი რამ გააკეთოს, თამაში მოიგოს. ეს არის მატჩის გმირი. ხოლო ვისაც საუკეთესო სტატისტიკა აქვს საუკეთესო მოთამაშეც ის არისო.

შვეიცარიასთან მატჩში ეს ორი ასპექტი ერთმანეთს დაემთხვა: ბექა ბურჯანაძე საქართველოს ნაკრების ბომბარდირიც გახდა და გმირიც. ამის ბედნიერება ადამიანს შეიძლება ცხოვრებაში ერთხელაც არ მიეცეს, ბურჯანაძეს კი შვეიცარიასთან ორჯერ მიეცა: პირველი - ძირითადი დროის დასრულებამდე 40 წამით ადრე სამქულიანი ჩააგდო და ხუთი ქულით დაგვაწინაურა.

შვეიცარიელებმა დარჩენილ დროში ანგარიში გაათანაბრეს და შეხვედრა ოვერტაიმში გაგრძელდა, რომლის დასრულებამდე 1:26 წამით ადრე ბექას მეორე შანსი მიეცა, ისიც გამოიყენა მეორე სამქულიანიც ჩააგდო და 91:88. ეს უკვე გამარჯვება იყო.

- ჩემთვის გულშემატკივარი უდიდესი მოტივაციაა. არა მხოლოდ ის, ვინც სპორტის სასახლეში მოვიდა და ბოლომდე გვიქომაგა, უამრავმა ადამიანმა მატჩი ტელევიზიით იხილა და ბედნიერი ვარ, რომ მათ სიხარული მივანიჭეთ. როგორც ველოდით, შეხვედრა ძალიან რთული გამოდგა. პირველ ტაიმში დიდი სხვაობით დაწინაურების შემდეგ მეტოქემ თამაშის შემოტრიალება შეძლო. ამის მიზეზი, რა თქმა უნდა, შვეიცარიაა, თუმცა ჩვენც მივეცით თამაშის გრძნობისა და მასში დაბრუნების საშუალება. საბედნიეროდ, გარკვეული დაღმავლობის შემდეგ გამოვნახეთ ძალები, დავლაგდით და ერთხელ მოგებული მატჩი მეორედ მოვიგეთ. ეს გუნდის ბრძოლისუნარიანობას უსვამს ხაზს.



გმირობა
გიორგი შერმადინმა მეოთხე პერიოდის ბოლოს ფეხი იტკინა, თავად მოითხოვა შეცვლა. ცხადია, იმ მომენტში ვერც გიო და ვერც ექიმთა გამოცდილი შტაბი თემურ ხვედელიძის ხელმძღვანელობით ზუსტ დიაგნოზს ვერ დასვამდნენ.
შერმადინი თამაშში რომ არ დაბრუნებულიყო, ვერავინ იტყოდა აუგს, მაგრამ თავად გიომ ხომ იცოდა, რომ ტკივილის მიუხედავად შეეძლო მოედანზე გასვლა და ამ მეტად დრამატულ მატჩში ათასობით ქართველის გახარება.
ჰოდა, დაბრუნდა. დაბრუნდა და მოიგო. მოიგო და ძალიან გაგვახარა. მან მატჩი ორმაგი დუბლით დაასრულა - 16 ქულა, 13 მოხსნა.

23 შეტევითი მოხსნა
2000-იანი წლების დასაწყისში, B დივიზიონში მეტად უხერხული მეტოქე გვყავდა - ფინეთი. მართალია არც ჩვენზე უკეთესი წინა ხაზი ჰყავდა, არც კლასით გვჯობნიდა, მაგრამ თამაშებს გვიგებდა. ფინელები სამქულანებს, შორეულ ორქულიანებს სტყორცნიდნენ და რასაც ვერ აგდებდნენ, ხშირად ისევ თვითონ ხსნიდნენ. როდესაც შორი მანძილიდან სტყორცნი, ასხლეტის შემდეგ ბურთი შორს ვარდება და...

- სწორედ ასეთ დროს პერიმეტრის მოთამაშეებმა სათანადოდ უნდა გადაკეტონ მეურვეები, თორემ ცენტრს სამქულიანის შემდეგ ბურთი ხელებში არ ჩაუვარდება, - თქვა ილიას ზუროსმა შვეიცარიასთან მატჩის შემდეგ და განაგრძო: - მეტოქემ ჩვენს ფარზე ბურთი 23-ჯერ მოხსნა, რაც ძალიან მაღალი მაჩვენებელია. მიზეზი კი სწორედ ის არის, რომ ძირითადად შორი მანძილიდან სტყორცნიდნენ.

56:42 - ასეთი სხვაობით გვაჯობა შვეიცარიამ მოხსნებში. ასეთი რამ დაუშვებელია!

- როგორ მოიგებ თამაშს, რომელშიც მეტოქეს შენი ფარიდან ბურთის 25-ჯერ მოხსნის უფლებას მისცემ? - ეს უკვე იგორ კოკოშკოვის სიტყვებია, რომელიც მან 2008 წელს უმეოში შვედეთთან წაგების შემდეგ (59:61) თქვა.

პერიმეტრი
საქართველოს ნაკრებში გამთამაშებლის პოზიციაზე სასტარტოში გიორგი ცინცაძემ ითამაშა, რომლისთვისაც ეს 85-ე ოფიციალური სანაკრებო შეხვედრა იყო - აბსოლუტური რეკორდი. გიორგის ფეხის ტრავმა ჰქონდა, თუმცა როგორც 2017 წელს, ნაკრებს რომ დასჭირდა, მოედანზე გამოვიდა. ტრავმის გამო, ცხადია, ჩვეულ კონდიციებში, ვერ იქნებოდა, თუმცა დაგვანახა, რომ ნაკრებისთვის დღესაც დიდი ძალაა და ევრობასკეტისთვის ძველებურ ფორმას რომ დაიბრუნებს, მისი გამოცდილება აუცილებლად გამოგვადგება.

ცინცაძეს 2001 წელს დაბადებული, ნიჭიერი ახალგაზრდა რატი ანდრონიკაშვილი ცვლიდა. გავიხსენოთ სეზონი, როცა თორნიკე შენგელიას ტრავმის გამო ბევრი გაუცდა. სეზონის განმავლობაში სათამაშო პრაქტიკის ნაკლებობა, ნაკრების მატჩებისას ხელს მიშლიდაო - თავად თქვა. ამ სეზონში რატი ანდრონიკაშვილიც განიცდის სათამაშო პრაქტიკის ნაკრებობას, რაც მის თამაშზეც ისახებოდა, თუმცა მთავარია, რომ მწვრთნელი ილიას ზუროსი ენდობა და დღევანდელი გადმოსახედიდან სწორედ რატის ხედავს 2021 წელს მომავალ ცინცაძედ. კარგია, რომ ანდრონიკაშვილი საქართველოში დაბრუნდა და ნაკრების მწვრთნელის ანატოლი ბოისას ხელმძღვანელობით "რუსთავში" აკრიფავს სათამაშო პრაქტიკას.

პერსპექტივა
ნაკრებში დებიუტი ჰქონდათ გიორგი ტურძილაძეს, საბა ლობჯანიძესა და გიორგი კორსანტიას. პირველ ორს მცირე სათამაშო დრო მიეცათ, კორსანტია კი საკმარისად დაიტვირთა.

სხვათა შორის, ილიას ზუროსის სასარგებლოდ უნდა ითქვას, რომ მას კორსანტია კარგად ჰყავს შესწავლილი - იცოდა, რომ მოედანზე თუნდაც ბოლო, გადამწყვეტ წუთებზე შეეშვა, მაინც მიიღებდა სარგებელს. მართლაც, პირველ ტაიმში არ ათამაშა, სიტუაცია რომ დაიძაბა, მაშინ გამოიყვანა კორსანტია და დავინახეთ მისი სითამამე. განსაკუთრებით დაცვაში გიორგის თამაშით კმაყოფილი ვარო, - განაცხადა მწვრთნელმა.

ილიას ზუროსმა ისიც თქვა, სერბეთთან, 23 თებერვალს შერმადინის თამაში სათუოა და რომც ითამაშოს, შეიძლება ზედმეტად არც დავტვირთოთ, ეს კი ტურძილაძისა და კორსანტიას შანსი იქნებაო. შანსის გამოყენება როგორ უნდა, მათზე გამოცდილმა ბექა ბურჯანაძემ დაგვანახა.

930
მკითხველის კომენტარები / 0 /
მსგავსი ამბები
რუბრიკის სხვა სიახლეები
;