[VIDEO] სერია A. ატალანტა ლიგაში! სიხარული და ცრემლი მილანში. იტალიაში ყველაფერი განაწილდა

ფეხბურთი ასეთი სპორტია - ზოგს დიდ სიხარულს არგუნებს, ზოგსაც - დიდ ტკივილს. ასეთი შერეული გრძნობებით დასრულდა სერია A მილანელი გულშემატკივრებისთვის. თუ "ინტერი" ჩემპიონთა ლიგაზე გავიდა, "მილანმა" ეს ვერ შეძლო. ეს იმის მიუხედავად, რომ ჯენარო გატუზოს მიერ გაწვრთნილმა გუნდმა სანუკვარი მიზნისთვის ბოლომდე იბრძოლა და სპალ-ს საგარეო მატჩიც მოუგო...

"მილანს" წყალში ჩაუყარა გარჯა "ინტერის" მოგებამ. ლუჩანო სპალეტის გუნდს კი გაუჭირდა, მაგრამ საბოლოოდ მაინც დაამარცხა "ემპოლი". ლევან მჭედლიძის გუნდი სერია B-ში დაქვეითდა, ისევე, როგორც "კიევო" და "ფროზინონე". თავს მხოლოდ იმით თუ დავიმშვიდებთ, რომ სულ მალე მჭედლიძისა და "ემპოლის" გზები უნდა გაიყაროს...

...კეიტა ბალდემ "ინტერი" ლამაზი გოლით დააწინაურა. ამას მოჰყვა ტრაორეს გამათანაბრებელი გოლი. თამაშის დასრულებამდე ბევრი აღარ რჩებოდა, როცა რაჯა ნაინგოლანმა "ინტერი" წინ გაიყვანა. დარჩენილ დროში "ინტერს" გოლი გაუუქმეს და "ემპოლიმ" საფინალო შტურმის მაგვარი მოაწყო, ძალიან მაგარი შანსებიც ჰქონდა, მაგრამ ამაოდ.

"ატალანტა" თავიდან აგებდა "სასუოლოსთან", მაგრამ მერე მოუმატა და 3 გოლი შეუგდო უმოტივაციო მეტოქეს. თავი გამოიჩინეს საპატამ, გომესმა და პაშალიჩმა. "სასუოლომ" ბოლომდე იბრძოლა და ორკაცნაკლულმა დაასრულა შეხვედრა. ეს იმას ნიშნავს, რომ იტალიის ჩემპიონატის აღმოჩენა, ბრწყინვალე ფორმაში მყოფი ბერგამოული კლუბი ჩემპიონთა ლიგაში პირველად ითამაშებს, რაშიც უდიდესია მეტად საინტერესო მწვრთნელის, ჯან პიერო გასპერინის დამსახურება.

ჰაკან ჩალჰანოღლუს გოლითა და ფრანკ კესის დუბლით "მილანმა" გასვლაზე 3:2 მოუგო სპალ-ს, მაგრამ ჩემპიონთა ლიგას მაინც ასცდა. მილანელ ფეხბურთელთა და გუნდის ქომაგების ცქერა საცოდაობა იყო. "მილანი" ევროპალიგაზე წარადგენს იტალიას, ისევე, როგორც "რომა" და თასის მფლობელი "ლაციო".

ჩემპიონმა "იუვენტუსმა" თავი არ მოიკლა "სამპდორიასთან" საგარეო შეხვედრაში და 0:2 დამარცხდა. მოკლედ, იტალიის ჩემპიონატი დასრულდა და სატურნირო ცხრილმა ყველა გუნდს თავისი ადგილი მიუჩინა.

ყოველდღიური სპორტული გაზეთი "ლელო"
1017
მკითხველის კომენტარები / 0 /
მსგავსი ამბები
რუბრიკის სხვა სიახლეები
;