[VIDEO] სერია A. სარი: შეგვიძლია, შედეგს მივაღწიოთ იმ პირობებშიც კი, როცა საუკეთესო თამაშს ვერ ვაჩვენებთ! კონტემ, იუვენტუსს ჯერ ნუ შევედრებითო...

კვირას "იუვენტუსმა" მილანში 2:1 მოუგო "ინტერს", პირველი ქულები დააკარგვინა და თავად მოკალათდა პირველ ადგილზე, სადაც ბოლო წლებში მისი მუდმივი ადგილსამყოფელი იყო...

თუმცა ამ მატჩმაც დაადასტურა, რომ "ინტერი" ტურინული გრანდისთვის სერიოზული კონკურენტი იქნება სკუდეტოსთვის ბრძოლაში. "იუვენტუსის" მწვრთნელი მაურიციო სარი ჯერჯერობით არაფრად მიიჩნევს იმ ფაქტს, რომ მისი გუნდი სერია A-ს ახალი ლიდერია:

"ის, რომ პირველ ადგილზე გადავედით, ახლა აბსოლუტურად არაფერს ნიშნავს. გაცილებით მნიშვნელოვანია, რომ კარგად ვითამაშეთ იმ გუნდის წინააღმდეგ, რომელსაც აქამდე ქულები არ ჰქონდა დაკარგული...

ჩვენ კარგად დავიწყეთ თამაში და ბოლომდე სწორად წარვმართეთ. ჩემი აზრით, პასით თამაშის მხრივ, "იუვენტუსისთვის" ეს მატჩი ამ სეზონში საუკეთესო იყო...

თუმცა, ჯერჯერობით, სამუშაო გვაქვს იმაზე, რომ მუდმივად ვდომინირებდეთ, ვაკონტროლებდეთ თამაშს, ვუტევდეთ მეტი ეფექტით და შეგვეძლოს მეტოქის ნებისმიერი კომბინაციის შეჩერება...

ვხედავ და კარგად ვიცი, რომ ძალიან ბევრი რამ შეგვიძლია გავაუმჯობესოთ. ეს ეტაპობრივი პროცესია, რომელიც უკვე დაწყებულია. ჩვენ ძლიერი მოთამაშეები გვყავს იმისთვის, რომ ყველა დასახული ამოცანა გადავჭრათ...

მიხარია, რომ შეგვიძლია, შედეგს მივაღწიოთ იმ პირობებშიც კი, როცა საუკეთესო თამაშს ვერ ვაჩვენებთ", - უთხრა სარიმ "სქაი სპორტ იტალიას".

ახლა კი "ინტერის" მწვრთნელის, ანტონიო კონტეს კომენტარი, მწვრთნელისა, რომელიც კვირას თავის წარსულთან დამარცხდა:

"ბიჭებს ვერ ვუსაყვედურებ. მათ ყველაფერი ჩადეს ამ თამაშში. ვფიქრობ, ახლა არ არის იმის დრო, რომ "იუვენტუსს" შევედაროთ. ჩვენ ჯერ კიდევ დიდი გზა გვაქვს გასავლელი, მათ დონეზე რომ ავიდეთ...  

მატჩის შემდეგ ვნახე სტატისტიკა, საიდანაც ჩანს, რომ თამაში თანაბარი იყო. ორივე გუნდს ჰქონდა შანსები, მაგრამ დიდი გამარჯვებების გამოცდილებამ მოიტანა ეს განსხვავება და შესაბამისი შედეგიც", - ასე შეაჯამა თამაში კონტემ.

ყოველდღიური სპორტული გაზეთი "ლელო"
331
მკითხველის კომენტარები / 0 /
მსგავსი ამბები
რუბრიკის სხვა სიახლეები
;