[VIDEO] 'ტორონტომ' 'გოლდენ სტეიტს' მესამეც მოუგო...

"ტორონტომ" ზედიზედ მეორე მატჩი მოიგო "გოლდენ სტეიტის" მოედანზე და ერთ ნაბიჯშია ისტორიულ შედეგთან. "რეპტორზს" სამი დღის შემდეგ, საკუთარ მოედანზე შეუძლია გაიფორმოს არსებობის ისტორიაში პირველი ჩემპიონობა.

ისევ ვერ მოასწრო გამოჯანმრთელება "გოლდენ სტეიტის" ერთ-ერთმა ლიდერმა კევინ დურანტმა, სამაგიეროდ, კარგად დაბრუნდა კლეი ტომპსონი, რომელმაც ექვსი სამქულიანი ჩააგდო და 28 ქულა დააგროვა. 26 ქულა იყო სტეფ კარის ანგარიშზე, თუმცა, მან 22-დან ცხრა ტყორცნა ჩააგდო და ცხრიდან შვიდი სამქულიანი ააცილა.

"ტორონტოს" რიგებში, რა თქმა უნდა, კავაი ლეონარდი იყო გამორჩეული, რომელსაც 36 ქულა და 12 მოხსნა დააგროვა, მაგრამ აუცილებლად უნდა აღინიშნოს ზედიზედ მეორე მატჩში სათადარიგო სერჟ იბაკას შესანიშნავი მოქმედება. წინა მატჩში მას ექვსი დაფარება ჰქონდა, ახლა კი 12-დან ცხრა ტყორცნა ჩააგდო და 22 წუთში 20 ქულა აიღო.

თამაშის ბედი კი იმ მეოთხედში გადაწყდა, რომელშიც, როგორც წესი, "გოლდენ სტეიტი" ანადგურებს ხოლმე მეტოქეებს. 61:59-ზე ჩემპიონს 18:3 გაექცა მეტოქე და კანადელთა უპირატესობამ 13 ქულას მიაღწია. ამის შემდეგ, "უორიორზმა" მხოლოდ ერთხელ ჩამოიყვანა სხვაობა 10 ქულაზე ქვემოთ.

NBA-ის ისტორიაში ყოფილა შემთხვევა, როცა ფინალური სერია მოუგია გუნდს 1:3 ჩამორჩენის შემდეგ. იმ სერიაში სწორედ "გოლდენ სტეიტი" მონაწილეობდა - სამი წლის წინ, სტივ კერის გუნდი ასეთი ანგარიშით ამარცხებდა "კლივლენდს", მაგრამ დათმო ჩემპიონობა. ასე რომ, "მეომრებისთვის" დაკარგული არაფერია, მით უმეტეს, მეხუთე მატჩში იგეგმება კევინ დურანტის დაბრუნება.



გ. სტეიტი-ტორონტო 92:105
23:17, 23:25, 21:37, 25:26
გ-ს: ტომპსონი (28), კარი (27+6 პასი), დრეიმონდ გრინი (20+9 მოხსნა+12 პასი), კაზინსი (6), იგუოდალა (3) - სასტარტო; ლუნი (10+6 მოხსნა), ლივინგსტონი (6), მაკინი (2), ბოგუტი (0+6 მოხსნა).
ტ: ლეონარდი (36+12 მოხსნა+4 ჩაჭრა), სიაკამი (19+9 მოხსნა+6 პასი), ლაური (10+7 პასი), მ. გასოლი (9+7 მოხსნა), დენი გრინი (3+3 ჩაჭრა) - სასტარტო; იბაკა (20), ვანვლიტი (8).
სერია: 1-3

636
მკითხველის კომენტარები / 0 /
მსგავსი ამბები
რუბრიკის სხვა სიახლეები
;