[VIDEO] ტრაგიკული კვირა. რეალმა ყველაფერი წააგო. მიდის სოლარი?

"რეალმა" ზედიზედ 4 საშინაო ოფიციალური მატჩი წააგო, რაც მის ისტორიაში არასოდეს მომხდარა. ცხადია, ასეთ დროს მწვრთნელი ვერ იქნება განზე. მწვრთნელი ხომ ის ფიგურაა, რომელიც ყოველთვის პირველი დგას რიგში პასუხისმგებელთა შორის. ამიტომ, ახლაც ასე დგას საკითხი - მიდის სანტიაგო სოლარი თუ რჩება?

სოლარი წასვლას არ აპირებს და მან ეს უკვე თქვა, ასე რომ, "რეალის" ხელმძღვანელობის გადასაწყვეტია, შეუნარჩუნებს თუ არა მას მთავარი მწვრთნელის თანამდებობას. ამის ალბათობა ძალიან მცირეა. ყველა ვარაუდობს, რომ არგენტინელ სპეციალისტს, 2021 წლის ივნისის ბოლომდე ხელმოწერილი კონტრაქტის მიუხედავად, მალე მიუთითებენ კარისკენ.

ვინ შეიძლება შეცვალოს სოლარი? ამ დროისთვის გამოკვეთილი კანდიდატი მხოლოდ ერთია - ჟოზე მოურინიო. მოგეხსენებათ, ის თავის დროზე წვრთნიდა "რეალს" და გულშემატკივრებს მაინცდამაინც არ ეხატებოდათ გულზე თავისებური სათამაშო სტილისა და შედეგების გამო.

ახლა კი ჟოზეს კანდიდატურა ძალიან სერიოზულად განიხილება. საინტერესო იყო "რეალის" ყოფილი პრეზიდენტის, რამონ კალდერონის სიტყვები - მაქვს შეგრძნება, რომ მომავალი სეზონიდან მთავარი მწვრთნელი კვლავ მოურინიო იქნებაო...

ამ საკითხთან დაკავშირებით კომენტარი თავად ჟოზემაც გააკეთა და აღნიშნა, რომ მისთვის სასიამოვნოა, თუკი ყოფილი კლუბი მისით ისევ ინტერესდება.

საინტერესოა, "რეალის" ფეხბურთელების შთაბეჭდილებები. დანი კარვახალმა თქვა: "ამაზე უარესის წარმოდგენა უბრალოდ შეუძლებელია. არ გადავაჭარბებ, თუ ვიტყვი, რომ ეს კვირა კოშმარული იყო ჩვენთვის. ყველაფერი წავაგეთ, რისი წაგებაც კი შეიძლებოდა. ამის მიუხედავად, ჩვენ უნდა გვახსოვდეს, რომ "რეალი" ვართ".

ლუკა მოდრიჩი: "რა თქმა უნდა, ვერ ვითამაშეთ ისე, როგორც უნდა გვეთამაშა. ჩვენი ფეხბურთი არ იყო მობილური და სწრაფი. ჩვენი შეტევები მეტოქისთვის იოლად გასაშიფრი აღმოჩნდა. ასე გაგრძელება აღარ შეიძლება. გასაგებია, რომ "რეალს" აღარ ჰყავს კრიშტიანო რონალდო, მაგრამ ათი წელი ხომ არ უნდა ვიტიროთ ამის გამო"?

ქარიმ ბენზემა: "მე ვერ დავიწყებ თავის მართლებას. რად უნდა თქმა იმას, რომ ვერ ვითამაშეთ ისე, როგორც უნდა გვეთამაშა. ამას დაემატა ის, რომ ჩვენს მეტოქეს ყველაფერი გამოუვიდა მინდორზე. ასეთი რამ ძალიან იშვიათად ხდება".

ყოველდღიური სპორტული გაზეთი "ლელო"
1074
მკითხველის კომენტარები / 0 /
მსგავსი ამბები
რუბრიკის სხვა სიახლეები
;