[VIDEO] ქართველი ზლატანი პსჟ-დან. რას წერენ 18 წლის ნიკოლოზ ქუთათელაძეზე, რომელსაც სპარტაკში შთამბეჭდავი დებიუტი ჰქონდა

"ახალი ზლატანი" პსჟ-დან. ვინ არის ქუთათელაძე?" - ამ სათაურით გამოაქვეყნა "სოვეტსკი სპორტმა" წერილი მოსკოვის "სპარტაკის" დუბლშემადგენლობის ახალწვეულ ნიკოლოზ ქუთათელაძეზე.

"სპარტაკმა" 18 წლის ქართველ თავდამსხმელთან კონტრაქტი რომ გააფორმა, უკვე ცნობილია. ვნახოთ, რას წერენ მასზე...

ევროპა

ქუთათელაძე 2001 წელს თბილისში დაიბადა, მაგრამ მთელი ბავშვობა და ახალგაზრდული კარიერა დასავლეთ ევროპაში გაატარა. მამამისი (სერგო ქუთათელაძე) შვილის ხარისხიან საფეხბურთო განათლებაზე ოცნებობდა. ამიტომ 2009 წელს მთელი ოჯახი პრაღაში გაემგზავრა. ნიკოლოზი ჯერ "სპარტას" აკადემიაში ვარჯიშობდა, შემდეგ - ოსტრავის "ბანიკში".

შემდეგ მამა შეეცადა შვილის "ბარსელონასა" და "მილანში" მოწყობას, მაგრამ უარი უთხრეს. სამაგიეროდ, მიიღეს ფრანგულ "ლილში", სადაც ნიკამ 6 სეზონი გაატარა და 100-ზე მეტი გოლი გაიტანა. იქ ახალგაზრდების გვერდით ვარჯიშობდა ედენ აზარიც, რომელიც მაშინ "ლილის" ფორვარდი გახლდათ...

პსჟ

2016 წელს ქუთათელაძე პსჟ-ში აღმოჩნდა - პარიზელები ქართველის სტატისტიკითა და სხვა მონაცემებით მოიხიბლნენ და ასაკობრივ გუნდში მიიწვიეს. ზლატან იბრაჰიმოვიჩმა სწორედ წელს დატოვა საფრანგეთი, ადგილობრივმა მედიამ კი ქართველი დიდი შვედს მიამსგავსა - ქუთათელაძემ სწრაფად დაიწყო პსჟ-ს იუნიორებში გატანა და მას "ახალი ზლატანიც" უწოდეს.

იმ პერიოდში პსჟ-ის სპორტული დირექტორი პატრიკ კლივერტი იყო. "ბარსელონასა" და "აიაქსის" ყოფილი ვარსკვლავი ქუთათელაძეს კარგად ახასიათებდა და რჩევებით ეხმარებოდა. ქსელში არის ვიდეო, რომელშიც ნიკა და ჰოლანდიური ფეხბურთის ლეგენდა პარკში ბურთს ისე კენწლავენ, თითქოს ეზოს მეგობრები იყვნენ...

ანჟი

პარიზში, ქუთათელაძემ ორნახევარი წლის განმავლობაში გაჩერდა. გასულ წლის შემოდგომაზე ის "ანჟიში" აღმოჩნდა. მიზეზი - დიდების დონეზე თამაშის სურვილი იყო. ნიკამ აღიარა, რომ "მისი ნახვა სხვა ევროპულ კლუბებშიც სურდათ, მაგრამ მახაჩყალელთა პრეზიდენტი ოსმან კადიევი ყველაზე მონდომებული აღმოჩნდა და დაარწმუნა, დაღესტანში გადასულიყო.

ქუთათელაძემ ამ გუნდში ერთხელაც ვერ ითამაშა - იანვარში რუსეთის საფეხბურთო კავშირმა "ანჟის" ახალწვეულთა რეგისტრაცია აუკრძალა, ამიტომ 6 თვე უგუნდოდ დარჩა. ნიკას თამაში სხვა მიზეზითაც არ შეეძლო - გასული წლის გაზაფხულზე, ტრავმის გამო, ის ხელჯოხის დახმარებით დადიოდა.

ახლა ის აიყვანა "სპარტაკმა", რომელიც მამამისის საყვარელი კლუბია. სხვათა შორის, ქუთათელაძე TMZ სააგენტოს კლიენტია, ვისთანაც კლუბის გენერალური დირექტორი თომას ცორნი მჭიდრო კავშირშია.

კავშირი რუსეთთან

"თეთრ-წითელთა" ახალწვეულს მხოლოდ ქართული პასპორტი აქვს, მაგრამ თუ მოისურვებს, რუსეთის მოქალაქეობის მიღებაც შეუძლია. ქუთათელაძის დედა და ბებია რუსები არიან, ბაბუა კი საბჭოთა კავშირის გმირი იყო. თუმცა, თავად ფეხბურთელი ხაზს უსვამს, რომ საქართველოს ნაკრებში თამაში სურს. ამავე დროს, ესმის, რომ მასთან ერთად მსოფლიოსა და ევროპის ჩემპიონატებზე მოხვედრა მისთვის უფრო რთული იქნება, ვიდრე რუსეთთან ერთად.

თამაშის წესი

ქუთათელაძე ტანმაღალი ცენტრფორვარდია. შესანიშნავად თამაშობს თავით და ფეხით. "ანჟის" ყოფილი მწვრთნელი მაგომედ ადიევი აღნიშნავდა მის სისწრაფეს, ტექნიკასა და დარტყმას. "სპარტაკში" ქუთათელაძე თავიდან ახალგაზრდულ გუნდში ითამაშებს.

P.S. შეგახსენებთ, რასაც lelo.ge უკვე წერდა: ქუთათელაძემ უკვე ითამაშა პირველი ოფიციალური მატჩი. "სპარტაკის" დუბლების მწვრთნელმა ის ცსკა-სთან კალენდარულ შეხვედრაში ძირითად შემადგენლობაში დააყენა. ქუთათელაძეს შესანიშნავი დებიუტი გამოუვიდა - აქტიური მონაწილეობა მიიღო პირველ საგოლე კომბინაციაში, ხოლო გოლი უშუალოდ მისი გადაცემით გავიდა. ამას გარდა, ერთ მომენტში "მაკრატელათიც" დაარტყა...

მოკლედ, მოინდომა და პირველივე თამაშის შემდეგ კარგი პრესა დაიმსახურა. ოღონდ, ეგ იყო, რომ საგოლე პასის ეპიზოდში ტრავმა მიიღო და შესაცვლელი გახდა. იმედია, დაზიანება სერიოზული არ არის.

3218
მკითხველის კომენტარები / 0 /
მსგავსი ამბები
რუბრიკის სხვა სიახლეები
;