[VIDEO] ქართული ლეგიონის უქმეები. სამი გოლიდან ორი მცველებისაა...

ამ უქმეებზე ქართველმა ლეგიონერებმა სამი გოლით გამოიჩინეს თავი. ამ ტრიოდან ორი მცველია - ლაშა დვალი და გიორგი გველესიანი, ერთიც ფორვარდი - გიორგი ქვილითაია.

იტალია
სერია A. ლევან მჭედლიძის (სათადარიგო) "ემპოლიმ" "სასუოლო" შინ გაანადგურა - 3:0 და 21 ქულით მე-17 ადგილზეა.

ესპანეთი
ლა ლიგა 2. ტრავმირებული გიორგი პაპუნაშვილის "სარაგოსა" "ალბასეტეს" დაუზავდა - 0:0. გიორგი აბურჯანიას "ლუგო" სტუმრად "მალიორკასთან" განადგურდა - 0:3. ქართველი დიდი პაუზის მერე სასტარტოში გამოჩნდა, ის 54-ე წუთზე, 0:1-ზე გამოცვალეს.

გერმანია
II ბუნდესლიგა. აკაკი გოგიას "უნიონი" "დუისბურგს" ესტუმრა და 3:2 დაამარცხა. გოგია 1:1-ზე, შესვენების მერე გამოჩნდა და ყვითელი ბარათი მიიღო. ბერლინელები ბუნდესლიგაში გადასვლისთვის იბრძვიან. გიორგი ლორიას "მაგდებურგმა" სტუმრად 3:1 მოუგო "არმინიას", ქართველი მეკარის ანგარიშზე ორი "სეივია". "მაგდებურგმა" პირველად დააღწია თავი გასავარდნ ზონას.
III ლიგა. ლუკას ჰუფნაგელის "უნტერჰახინგი" შინ 1:2 დამარცხდა. ქართველი ლეგიონერი 64-ე წუთზე გამოცვალეს.   

საფრანგეთი
ლიგა 2. ჯაბა ჯიღაურის "გრენობლი" სტუმრად "ვალანსიენთან" დამარცხდა - 2:3. ქართველი ფეხბურთელი მოედანზე 63-ე წუთზე გამოჩნდა, მან 12 წუთში საგოლე პასი შეასრულა.
ნასიონალი. ამირან სანაიას "როდეზი" სტუმრად "ავრანშთან" 1:2 დამარცხდა და ხელიდან გალიდერების შესანიშნავი შანსი გაუშვა.

პორტუგალია
პრიმეირა. "ნასიონალის" რიგებში არც გიორგი არაბიძე ყოფილა და არც ავთო ებრალიძე, მადეირელებმა კი "ფეირენშეს" 4:0 მოუგეს. შეგახსენებთ, რომ წინა ტურში ეს გუნდი "ბენფიკასთან" 0:10 დამარცხდა.  

ბელგია
ჟუპილერ ლიგა. ქართველთა "გენტი" სტუმრად "ვაასლანდ-ბევერენთან" დამარცხდა და სატურნირო მდგომარეობა გაიუარესა - 1:2. გიორგი ჩაკვეტაძე ტრავმირებულია, გიორგი ქვილითაია კი მოედანზე 76-ე წუთზე გამოვიდა და 91-ეზე სტუმართა ერთადერთი გოლიც გაიტანა. ეს ქვილითაიას უკვე მე-3 გოლია ჩემპიონატში.
პროქსიმუს ლიგა. ირაკლი ბუღრიძის (არ უთამაშია) "ბეერსხოტმა" სტუმრად "ლომელს" მოუგო - 2:0.

შვეიცარია
სუპერლიგა. ტრავმირებული ოთარ კაკაბაძის "ლუცერნი" შინ 0:3 დამარცხდა "ლუგანოსთან". ლევან ხარაბაძის "ციურიხი" სტუმრად "იან ბოისთან" 0:2 დამარცხდა. ერთპიროვნულ ლიდერთან ხარაბაძემ შეუცვლელად ითამაშა, ის პირველ ტაიმში გააფრთხილეს.

დანია
სუპერლიგა. საბა ლობჟანიძის "რანდერსი" შინ 0:2 დამარცხდა "კოპენჰაგენთან". საბა ლიდერთან 81-ე წუთზე გამოცვალეს. ლაშა პარუნაშვილის "ესბიერგმა" "ბრონდბიუს" უმასპინძლა და 2:1 დაამარცხა, ქართველმა ნახევარმცველმა შეუცვლელად ითამაშა.  

პოლონეთი
ექსტრაკლასა. ვაკო გვილიას "გურნიკი" სტუმრად "პოგონთან" დამარცხდა - 1:2. გვილიამ 90 წუთი ითამაშა. გიორგი მერებაშვილმა ტრავმა მიიღო და ის 39-ე წუთზე გამოცვალეს, მისი "პლოცკი" კი სტუმრად "იაგელონიასთან" 0:1 დამარცხდა.  ქართველთა "ზაგლემბიემ" შინ ლუკა ზარანდიას "არკას" 3:2 მოუგო. გამარჯვებულთა რიგებში გიორგი გაბედავა 83-ე წუთზე გამოცვალეს, ხოლო გიორგი ივანიშვილი სათადარიგო იყო. ზარანდიამ შეუცვლელად ითამაშა, გუნდისთვის პენალტი მოიპოვა და ის პირველ ტაიმში გააფრთხილეს. "ზაგლემბიემ" წაგებათა სერია კი შეწყვიტა, მაგრამ ჯერ მაინც უიმედო აუტსაიდერია. ვატო არველაძის "კორონა" შინ "ლეხიას" 0:0-ს ეთამაშა. არველაძე მოედანზე 64-ე წუთზე გამოჩნდა.

ჩეხეთი
I ლიგა. ვახტანგ ჭანტურიშვილის დებიუტი "პრჟიბრამთან" სტუმრად 75-ე წუთზე შედგა. ქართველის "ზლინი" 2:3 დამარცხდა.

საბერძნეთი
სუპერლიგა. ლაშა შერგელაშვილის (არ უთამაშია) "იანინა" შინ "ატრომიტოსთან" დამარცხდა - 0:2. გიორგი რეხვიაშვილის (90 წუთი) "ლევადიაკოსმა" "პანეთოლიკოსს" უმასპინძლა და 1:0 მოუგო.

უნგრეთი
OTP. ლაშა დვალმა "ფერენცვაროშის" რიგებში უკვე მეორე მატჩში გაიტანა - ქართველმა მცველმა შეუცვლელად ითამაშა, მისი გუნდი კი "დებრეცენთან" სტუმრად 1:2 დამარცხდა. ანგარიში დვალმა გახსნა. ამ სეზონში მან თითო გოლი "პოგონისა" და "ფერენცვაროშის" მაისურით გაიტანა.

ტრავმირებული ზაქარია ბეგლარიშვილის "ჰონვედი" სტუმრად "დიოშდიორთან" დამარცხდა - 1:2. ბუბა დაუშვილის (არ უთამაშია) "ჰალადაში" შინ "მეზოკოვეშდთან" დამარცხდა - 1:2. ბაჩანა არაბულის (63-ე წუთზე შევიდა) "პუშკაშ აკადემია" შინ გიორგი ბერიძის (77-ე წუთზე შეცვალეს) "უიპეშტთან" დამარცხდა - 0:1.

ბულგარეთი
პარვა ლიგა. გოდერძი მაჩაიძისა (90 წუთი) და შოთა გვაზავას (არ უთამაშია) "ვერეია" შინ ლიდერ "ლუდოგორეცს" დაუზავდა - 0:0. ეს "ვერეიას" მე-6 ქულაა ჩემპიონატში, ქართველთა გუნდი ბოლო ადგილზეა.

ხორვატია
HNL. გიორგი მჭედლიშვილის "გორიცა" შინ "ზაპრეშიჩს" 2:2 დაუზავდა. ქართველმა ლეგიონერმა შეუცვლელად ითამაშა.

შვედეთი
თასი. ამ ქვეყანაში ახალი საფეხბურთო სეზონი თასით დაიწყო - გიორგი ხარაიშვილის "გიოტებორგმა" სტუმრად 2:0 დაამარცხა "ნიკოპინგსი" და მეორე წრეში გავიდა. ქართველმა ლეგიონერმა შეუცვლელად ითამაშა (გააფრთხილეს) და საგოლე პასიც მიითვალა.

კვიპროსი
I დივიზიონი. ირაკლი მაისურაძის (90 წუთი, გააფრთხილეს) "პარალიმნი" 1:1 დაუზავდა "პაფოსს". ქართველთა "ანორთოსისი" შინ "ომონიას" დაუზავდა - 0:0. ბექა მელქაძე 78-ე წუთზე გამოცვალეს, ნიკა კაჭარავა სათადარიგო იყო.

ალბანეთი
სუპერლიგა. ირაკლი ძარიას "კუკესი" სტუმრად "ტეუტასთან" 1:2 დამარცხდა. ქართველმა ფეხბურთელმა მეორე ტაიმის დასაწყისში ყვითელი ბარათი მიიღო. უშუალო კონკურენტთან წაგების შემდეგ "კუკესი" მესამე ადგილზე დაქვეითდა.

აზერბაიჯანი
პრემიერლიგა. თამაზ ცეცხლაძის (სათადარიგო) "საბაილმა" შინ 1:0 მოუგო "საბაჰს" და 27 ქულით მე-3 ადგილზეა. დავით ვოლკოვის "გაბალა" სტუმრად ლიდერ "ყარაბაღთან" 1:2 დამარცხდა. ვოლკოვი 93-ე წუთზე გამოცვალეს. "გაბალა" 23 ქულით მე-4 ადგილზეა.

ირანი
სპარსეთის ყურის პროლიგა. ქართველთა "რაშთი" შინ "მაჩინ საზის" დაუზავდა - 1:1. ლუკა ნოზაძემ და რომან ჩაჩუამ შეუცვლელად ითამაშა. ქართველთა კიდევ ერთი გუნდი,"ნასაჯი" სტუმრად "პარსსთან" დამარცხდა - 1:3. ლაშა თოთაძემ შეუცვლელად ითამაშეს, გიორგი გველესიანმაც 90 წუთი გაატარა, თანაც, შინაარსიანად - ჯერ საკუთარი კარი დალაშქრა, შემდეგ - მეტოქის (პენალტი). ქართველი მცველის ანგარიშზე ჩემპიონატში 4 გოლია.

ყოველდღიური სპორტული გაზეთი "ლელო"
984
მკითხველის კომენტარები / 0 /
მსგავსი ამბები
რუბრიკის სხვა სიახლეები
;