[VIDEO] წაუქცეველი კაპიტანი და გაგლეჯილი ცხრიანები!.. 25 მარტი მანუჩარ მაჩაიძის დაბადების დღეა...

25 მარტს თბილისის "დინამოს" ლეგენდარული კაპიტანი მანუჩარ მაჩაიძე 71 წლის გახდა. იმ თაობის "დინამოში" დიდი ვარსკვლავები თამაშობდნენ, მაგრამ დიდმა კაპიტანმა მაინც დატოვა თავის კვალი, თავის ხელწერა, გამორჩეული მანერა...

ვის ახსოვს ტრავმირებული ან წაქცეული კაპიტანი? ძალიან ძნელი გასახსენებელია. ლეგენდების გარშემო ყოველთვის არის კამათი და იყო მაჩაიძის შემთხვევაშიც. მას საყვედურობდნენ, რომ ხშირად დიდხანს ვერ ელეოდა ბურთს, მაგრამ ამაშიც შეიძლება დავინახოთ პოზიტივი - დღეს თუ გუნდურად ცდილობენ ბურთის შენარჩუნებას, შეტევის მომზადებას, დიდი მანუჩარი ამას მარტო აკეთებდა ხოლმე...

თუმცა ვერავინ იტყვის, მას სხვანაირად არ შეეძლო თამაში. შეეძლო და მეტიც - საკუთარ საჯარიმოსთან რომ მოიგდებდა ბურთს და მთელ მოედანს გადასერავდა ადევნებული მეტოქეების გარემოცვაში, გეტრებჩაწეული და "ფაფარაშლილი", ესეც ბევრი გვახსოვს...

ბევრი გვახსოვს მისი დიდებული "სტანდარტებიც", 25-30 მეტრიდან გაგლეჯილი "ცხრიანები"... დიდ ნოდარ ახალკაცს უნატრია - მაჩაიძისნაირი კიდევ ერთი ფეხბურთელი მომცა ნახევარდაცვაშიო!..

დაიბადა 1949 წელს, ამბროლაურში. 1967 წლიდან 1980 წლამდე ითამაშა თბილისის "დინამოში" (297 მატჩი, 42 გოლი). 1976 წლიდან 4 სეზონის განმავლობაში იყო გუნდის კაპიტანი.

1980 წელს გადავიდა ტაშკენტის "ფახთაქორში" (13 მატჩი, 1 გოლი), 1981 წელს - მოსკოვის "სპარტაკში" (2 მატჩი), ხოლო 1981-82 წლებში ითამაშა ქუთაისის "ტორპედოში" (45 მატჩი, 6 გოლი). 1974-79 წლებში 4 მატჩი ჩაატარა საბჭოთა კავშირის ნაკრებში.

2127
მკითხველის კომენტარები / 4 /
tngh
0
გილოცავ მანუჩარ!!! ეს ცნობილი ფოტო კი, თბილისში "გრასჰოპერთან" თამაშის ამსახველია...
mmm
0
მანუჩარი რომ ბურთს მიიღებდა, მხრებს მაღლა ასწევდა, ხელებს ნახევრად გაშლიდა და მიდიიი წინ. კაცი არ იყო ბურთის წამრთმევი.
მსგავსი ამბები
რუბრიკის სხვა სიახლეები
;