[VIDEO] ხარაიშვილს გოლი ქართული ცეკვით მიულოცეს, ლობჟანიძე ტურის ფეხბურთელია, კიტეიშვილიც სიმბოლურშია

საქართველოს ნაკრებში გამოძახებული საბა ლობჟანიძე და ოთარ კიტეიშვილი სექტემბრის მატჩებისთვის კარგ ხასიათზე მოდიან. ორივე მათგანი ბოლო ტურში დააფასეს და სიმბოლურ ნაკრებში დაასახელეს.

ორივე მათგანი საფეხბურთო სტატისტიკის საერთაშორისო ვებგვერდმა "სოფასკორმა" გამოარჩია...

კიტეიშვილის 7,5

ავსტრიის ბუნდესლიგის მე-5 ტურში გუნდი, გრაცის "შტურმი" რეინდორფში "ალტახს" ესტუმრა და 1:2 დაამარცხა. მედიამ ოთარ კიტეიშვილი ამ თამაშშიც გამოარჩია.

ქართველ ნახევარმცველს, რომელიც გრაცელთა ძირითად შემადგენლობაში იყო და მატჩის ბოლოს, დამატებულ მე-2 წუთზე შეცვალეს, ამჯერად თავი გოლით და საგოლე გადაცემით არ გამოუჩენია, მაგრამ შრომა ფეხბურთის სტატისტიკის საერთაშორისო ინერნეტპორტალმა "სოფასკორმა" 10-ბალიან სისტემაში 7,5 ქულით დაუფასა.

რადგან ავსტრიული ბუნდესლიგის სხვა მოთამაშეებთან შედარებით "10 ნომრის" პოზიციაზე (შემტევ ნახევარმცველებში) საუკეთესო შეფასება აღმოაჩნდა, კიტეიშვილი ტურის სიმბოლურ გუნდშიც მოხვდა.

ეს მისი ზედიზედ მეორე აღიარებაა. სიმბოლურში მოხვედრის გარდა, 23 წლის ქართველი ნახევარმცველი მე-5 ტურში "სოფასკორმა" ტურის საუკეთესო მოთამაშედ დაასახელა.

ლობჟანიძის ორი სიმბოლური

დანიური სუპერლიგის VIII ტურში "სოფასკორმა" საბა ლობჟანიძე გამოარჩია. იმავე "სოფასკორმა" 10-ბალიან სისტემაში "რანდერსის" ქართველი შემტევის გარჯა 8,9 ქულად შეაფასა, რაც ძალიან მაღალი მაჩვენებელია.

ამ შეფასებით, საქართველოს ნაკრების თავდამსხმელი არა მხოლოდ სიმბოლურ ნაკრებში მოხვდა, არამედ, ტურში ყველაზე მაღალი მაჩვენებელი აღმოაჩნდა და ტურის საუკეთესო მოთამაშე გახდა. შეგახსენებთ, რომ ლობჟანიძის გუნდმა "სილკებორგი" სწორედ ქართველის დუბლით დაამარცხა (2:0).

ქართველი ტურის სიმბოლურ ნაკრებში გამოცემა დანიურმა გამოცემა "ტიპსბლადეტმაც" დაასახელა და 4-4-2 სქემით შედგენილ გუნდში მარცხენა ნახევარმცველად გაამწესა, უკვე მეორედ - მიმდინარე სეზონში.

შვედური ტაშ-ფანდური... ქართულად

ქართველმა ფეხბურთელმა თავი შვედეთშიც გამოიჩინა. გიორგი ხარაიშვილმა ისევ გაიტანა - მართალია, ის ტურის სიმბოლურ ნაკრებში არ დაუსახელებიათ, მაგრამ მის თავს სახალისო ამბავი კი მოხდა.

როგორც ცნობილია, ხარაიშვილის "გიოტებორგმა" ალსვენსკანში (შვედეთის მთავარი ლიგა) აუტსაიდერი "სუნდსვალი" გასვლაზე 2:0 დაამარცხა. 38-ე წუთზე ანგარიში სწორედ მეკარესთან პირისპირ დარჩენილმა "გიოტებორგის" 23 წლის ქართველმა ნახევარმცველმა გახსნა და გუნდს მორიგი 3 ქულის მოპოვებაში დაეხმარა.

ხარაიშვილს "გიოტებორგის" აფრიკელმა ლეგიონერებმა - კონგოელმა ტობი ნძუძიმ და ნიგერიელმა ჰასან იუსუფმა გოლი... ქართული ცეკვით მიულოცეს.

1021
მკითხველის კომენტარები / 0 /
მსგავსი ამბები
რუბრიკის სხვა სიახლეები
;