გუშინ თურქეთში შეკრებაზე მყოფმა სამარის "კრილია სოვეტოვმა" ბოლო საკონტროლო მატჩი გამართა ყაზახურ "ქაისართან". "კრილიას" ქართველი ლეგიონერი ჯანო ანანიძე მიოდრაგ ბოჟოვიჩმა ძირითად შემადგენლობაში დააყენა. სამარელებმა მეტოქე 3:0 დაამარცხეს, რაშიც ჯანომ დიდი წვლილი შეიტანა. ბრწყინვალე პასით მონაწილეობა მიიღო პირველ საგოლე კომბინაციაში, ერთი ბურთიც მალევე თავად გაიტანა და ანგარიში 2:0 გახადა. მესამე გოლი "კრილიამ" მეკარის უხეში შეცდომის შედეგად გაიტანა. ანანიძე 78-ე წუთზე შეცვალეს.