[VIDEO ჰაილაითები] კარიმ 47 ჩააგდო, 'ტორონტომ' 'გოლდენ სტეიტი' მისსავე მოედანზე დაამარცხა

კევინ დურანტმა ისევ ვერ მოასწრო გამოჯანმრთელება, რასაც კლეი ტომპსონისა და კევონ ლუნის ტრავმები დაემატა და "გოლდენ სტეიტი" ნახევრად სათადარიგო შემადგენლობით დაუხვდა კანადურ კლუბს. "ტორონტომაც" ეს ფორა ძალიან კარგად გამოიყენა და სერიაში მეორედ დაწინაურდა.

სტეფ კარი ბოლომდე სასწაულმოქმედი არ ყოფილა. მან 47 ქულით პლეი ოფში შედეგიანობის პირადი რეკორდი დაამყარა, "გოლდენ სტეიტის" მთლიანი მონაგარის თითქმის ნახევარი მიითვალა, მაგრამ მარტო თამაშის მოგება შეუძლებელი აღმოჩნდა. მით უმეტეს, რომ "ტორონტოს" თითქმის ყველა მოთამაშეს მისდიოდა თამაში - სასტარტო ხუთეულის ყველა წევრმა მინიმუმ 10 ქულა დააგროვა, რასაც სათადარიგო ფრედ ვანვლიტის 11 ქულაც დაემატა. სტუმრებმა თამაშიდან 52.4 პროცენტის სიზუსტით ისროლეს და 17 სამქულიანი მოათავსეს კალათში.

"გოლდენ სტეიტი" მატჩში ერთადერთხელ იყო წინ - დებიუტში 5:4 დაწინაურდა, რის შემდეგაც, "ტორონტო" 16:2 გაიქცა. ამის შემდეგ, სხვაობა ანგარიშში, ძირითადად, 10 ან მეტი ქულა იყო. მესამე მეოთხედის მიწურულს სტუმრების უპირატესობა 16 ქულამდეც გაიზარდა, მაგრამ კარიმ ბოლომდე იბრძოლა და ერთხელ კინაღამ თამაშში გარდატეხა შეიტანა, როცა მეოთხე მეოთხედის მეორე წუთზე სამი საჯარიმო ჩააგდო და სხვაობა შვიდ ქულამდე დაიყვანა, თუმცა, ამას იქვე სერჟ იბაკას ზედიზედ ორი ზუსტი ტყორცნა და სხვაობის გაზრდა მოჰყვა.

შემდეგი შეხვედრა შაბათს გაიმართება. "გოლდენ სტეიტის" ფანები დურანტისა და ტომპსონის დაბრუნებას ელიან. მათ გარეშე, ტიტულის შენარჩუნება შეუძლებელი ჩანს.



გოლდენ სტეიტი-ტორონტო 109:123
29:36, 23:24, 31:36, 26:27
გ-ს: კარი (47+8 მოხსნა+7 პასი), დრეიმონდ გრინი (17+7 მოხსნა), იგუოდალა (11+6 მოხსნა), კაზინსი (4), ლივინგსტონი (4) - სასტარტო; კუკი (9), ბოგუტი (6+7 მოხსნა), ჟერებკო (6), მაკინი (3), ბელი (2).
ტ: ლეონარდი (30+7 მოხსნა+6 პასი), ლაური (23+9 პასი), სიაკამი (18+9 მოხსნა+6 პასი), დენი გრინი (18), მ. გასოლი (17+7 მოხსნა) - სასტარტო; ვანვლიტი (11+3 ჩაჭრა), იბაკა (6+6 დაფარება).
სერია: 1-2

937
მკითხველის კომენტარები / 0 /
მსგავსი ამბები
რუბრიკის სხვა სიახლეები
;