[VIDEO] ახალგაზრდა ჟურნალისტის ემოცია მადრიდიდან: გაკვირვებული ვუყურებდი, ქომაგთა არმია "ბორჯღალოსნებთან" მოედანზე როგორ შევარდა

საქართველოს დროშიანი წინდებით ამაყად მივაბიჯებ მადრიდის ქუჩებში. ჯერ თამაში არც დაწყებულა, აბა ეს სიამაყე საიდან მოდის? ალბათ ჩემთვის საკმარისია სხვა ქვეყანაში ჩვენი ბიჭების საგულშემატკივროდ წასვლა - გულის სიღრმეში ხომ დარწმუნებული ვიყავი, რომ ამ თამაშსაც მოვიგებთ.

როდესაც საქართველოს მორაგბეთა ნაკრები ესპანეთში ჩადის, მუდამ ფავორიტია.

სტადიონთან ახლომდებარე მეტროს სადგურთან ქართული სული ვიგრძენი - დროშებით შეიარაღებულ ქართველობას შევუერთდი. რაც უფრო ვუახლოვდებოდით სტადიონს, გონების სიღრმიდან სულ უფრო ხშირად გაისმოდა ფრაზა - "რაგბი ჩვენი თამაშია".

სტადიონის შესასვლელთან დიდი რიგი იდგა. ესპანელებმა მატჩი იმდენად პატარა არენაზე დანიშნეს, გულშემატკივრების სიმრავლეს ვიწრო შესასვლელი ნამდვილად არ შეესაბამებოდა. იქვე რამდენიმე ნაცნობ ქართველსაც გადავეყარე, რაც დამატებითი სიხარული იყო. სალაროსთანაც დიდი რიგი დაგვხვდა...

გრძელი რიგის გამო თამაშზე შესვლა დავაგვიანე. ქართული ჰიმნი გარედან მოვისმინე. გული დამწყდა, რომ ტრიბუნებზე ამაყად გამართვა და თანამემამულეებთან ერთად სიმღერა ვერ შევძელი. შესვლისთანავე ტაბლოს შევხედე - 5:0 ეწერა ჩვენს სასარგებლოდ. პირველი ლელო ვერ ვნახე...

სამაგიეროდ, ისეთ ადგილზე მქონდა ბილეთი, ერთი ხელის გაწვდენაზე იყო ჩათვლის ხაზი. ოღონდ, მეორე ტაიმამდე უნდა მომეცადა - პირველში ჩემს მხარეს ესპანელები უტევდნენ. ბედი არ გინდა?! - მეორე ნახევარში ჩვენმა გუნდმა ლელო ვეღარ დადო. თუმცა ენერგიულად უტევდა:

ესპანეთის საგულშემატკივროდ ბევრი ადგილობრივი მოვიდა, რაც მოსალოდნელიც იყო. ლუდის ქილებითა და დროშებით ხელში მშვიდად ისხდნენ და უყურებდნენ თამაშს. ესპანელებისგან ასეთი სიმშვიდე ცოტა გასაკვირი იყო, რადგან ყველამ ვიცით, როგორი ემოციურები და აქტიურები არიან. 

სამაგიეროდ ქართველი გულშემატკივრები არ გავჩერებულვართ - სტადიონის ერთი მხარე დავიკავეთ და მონდომებით ვამხნევებდით მადრიდში ჩამოსულ მორაგბეებს, რომლებმაც აღნიშნეს კიდეც, რომ არც უგრძვნიათ, რომ სტუმრად თამაშობდნენ.

ბურთის ყოველი მიღებისას ოვაციების ახალი ტაღლა მოდიოდა. მაყურებლებში გამოირჩეოდა საქართველოს დროშით სახემოხატული გოგონა, რომელმაც გულშემატკივრების ლიდერის ფუნქციაც შეითავსა და წამით მოდუნების უფლებას არ გვაძლევდა.

ჩვენმა "ბორჯღალოსნებმა" კარგად დაწყებული საქმე ბოლომდე მიიყვანეს, 23:10 მოიგეს და კიდევ ერთი ლამაზი დღე გვაჩუქეს ქართველ გულშემატკივრებს. თუმცა სულაც არ არის მთავარი იყო გულშემატკივარი და ერკვეოდე რაგბიში - მთავარი ემოციაა. სტადიონზე მისულმა ყველა ქართველმა ხომ უზომო დადებითი ემოცია მივიღეთ.

გახარებულმა გულშემატკივრებმა ჯერ ერთმანეთს მიულოცეს, გადაეხვივნენ, შემდეგ იხუვლეს და ყველა მოედანზე აღმოჩნდა. ჩემთვის ეს მოულოდნელი, მაგრამ საოცარი მომენტი იყო. თავიდან ვერ მივხვდი რა ხდებოდა, სიტუაციაში რომ გავერკვიე, მეც უმალ მოედანზე აღმოვჩნდი. აკი გითხარით, ტრიბუნასთან ხელის გაწვდენაზე ვიყავი.

"ბორჯღალოსნებს" პირადად მივულოცეთ გამარჯვება და ფოტოები ჩვენც სიამოვნებით გადავიღეთ მათთან და მათ - ჩვენთან.

მარია შაველაშვილი მადრიდიდან

11400
მკითხველის კომენტარები / 1 /
წვიმა იყო
3
მეორე ტაიმში ლელო ვერ დადეს, მარა ჩვენები მაინც მაგრები არიან, ისინი სუსტები. აი ბურთი ცოტა მრგვალიც რომ იყოს, მერე გენახათ მათი სირბილი.
მსგავსი ამბები
რუბრიკის სხვა სიახლეები
;