[VIDEO] U17. კიდევ ერთი მარცხი და მხოლოდ მეექვსე ადგილი

მინსკში "განვითარების თასის" დასკვნით დღეს საქართველოს 17-წლამდელთა ნაკრებმა ბოლო მატჩი ჩაატარა და V ადგილისთვის დაპირისპირებაში ფინეთთან დამარცხდა. ჯგუფურ ეტაპის ბოლო ტურში ტაჯიკეთთან ძალიან უსიამოვნო წაგებამ (1:2) ქართველ ჭაბუკებს მხოლოდ მესამე ადგილი არგუნა და გიორგი ჩიტაურის გუნდს მეორე ჯგუფის მესამეადგილოსან ფინეთთან მოუხდა საქმის დაჭერა.

პატარა "სუომისთან" მატჩი ჩვენი გუნდის უპირატესობით დაიწყო. მაგრამ პირველი ტაიმის შუაში ფინელებმა ჯერ თამაში გაათანაბრეს, მეორე ტაიმში კი უკვე თავად დაეუფლნენ სადავეებს. ისინი მაღალი პრესინგით თამაშობდნენ, ქართველებს კი შეტევაში არაფერი გამოსდიოდათ.

ფინელების აქტიურობამ შედეგი გამოიღო: მე-60 წუთზე მეტოქის ნახევარმცველმა, "ვოლფსბურგის" ასაკობრივი გუნდის წევრმა ემანუილ პატუტმა გასწვრივი ფლანგური გადაცემა ახლო მანძილიდან ზუსტი დარტყმით დააგვირგვინა.

62-ე წუთზე ფინელებმა მორიგი სწრაფი იერიში განახორციელეს, მაგრამ ბოლო მომენტში ბურთს მცველი გადაეღობა და გუნდი გადაარჩინა. 73-ე წუთზე იოსა მაკინენს შეეძლო თავის გამოჩენა, მაგრამ ახლო მანძილიდან კარს ააცილა.

ჩვენები მხოლოდ ამის შემდეგ გამოცოცხლდნენ და ეპიზოდებში მწავევდაც შეუტიეს. პირველი რეალური მომენტი 73-ე წუთზე გიგა აბუაშვილის შორეულ დარტყმის შემდეგ შეიქმნა. მაგრამ ფინელები მეკარემ ერთ ეპიზოდში ორჯერ გადაარჩინა - დამატებულზეც იყოჩაღა. ამას ფინელების სწრაფი კონტრშეტევა და მორიგი მომენტი მოჰყვა, მაგრამ ბურთი ამჯერადაც ასცდა მიზანს.

78-ე წუთზე გიორგი გვიშიანმა შორეული დარტყმით სცადა ბედი და ეს დარტყმაც უშედეგო გამოდგა. გოლის გატანის ბოლო მცდელობა ქართველ ჭაბუკებს ბოლო წუთებზეც ჰქონდათ, მაგრამ ფლანგური შეტევიდან არაფერი გამოვიდა. საბოლოოდ, საქართველოს ნაკრები 0:1 დამარცხდა.

ფინეთი-საქართველო  1:0
გოლი: 1:0 პატუტი (60)
საქართველო: ხარატიშვილი, აბჟანდაძე (68. ზოსიაშვილი), ხვადაგიანი, ო. მამაგეიშვილი, გვიშიანი, გაგნიძე, სალუქვაძე, უბილავა, აბუაშვილი, გ. მამაგეიშვილი (56. თუთაშვილი) იობაშვილი (68. უგრეხელიძე).
სათადარიგოები: ასათიანი, ავალიანი, ჩხეტიანი, დუნდუა, ტატიშვილი, ონიანი.
გაფრთხილებ: ო. მამაგეიშვილი (31), აბჟანდაძე (54)

ამრიგად, საქართველოს 17-წლამდელთა ნაკრებმა მინსკის ტურნირი მე-6 ადგილზე დაასრულა. "განვითარების თასზე" ჩვენების უარესი გამოსვლაც გვახსოვს, მაგრამ ეს გამართლებად არ გამოდგება. მით უფრო, რომ გუნდს ტურნირის ფინალში გასვლის რეალური შანსი ჰქონდა.

საქართველოს 17-წლამდელთა ნაკრები ევროპის ჩემპიონატის ელიტრაიუნდისთვის ემზადება, რომელიც 25-დან 31 მარტამდე გაიმართება. მეტოქეებად ინგლისის, ბელგიისა და რუმინეთის 17-წლამდელები გვეყოლებიან. მინიტურნირს ბელგია უმასპინძლებს.

და ბოლოს: გუნდს რომ შეტევაში პრობლემები აქვს, ფინეთთან მატჩის ბელარუსმა კომენტატორმაც შენიშნა. ისე, გუნდის მთავარმა მწვრთნელმა გიორგი ჩიტაურმა ევროპის ჩემპიონატის შესარჩევი ციკლის შემდეგ "ლელოსთან" თავადაც აღიარა. პირველი საკვალიფიკაციო ეტაპიდან გუნდი ელიტრაუნდში ისე გავიდა, ერთი გოლიც ვერ გაიტანა.

მინსკში უკეთესობა ის იყო, რომ 4 მატჩი 3 გოლი გავიტანეთ. ცხადია, ეს საკმარისი ვერ იქნება. მოახერხებს თუ არა გუნდი პოტენციალის გამოვლენას ელიტრაუნდამდე დარჩენილ დროში, ესეც გამოჩნდება.

480
მკითხველის კომენტარები / 0 /
მსგავსი ამბები
რუბრიკის სხვა სიახლეები
;