რატომ ახსენა 'ბორჯღალოსნების' მწვრთნელმა გრემ როუნთრიმ ქართველთა დნმ?

რაგბი ევროპის ჩემპიონატის დაწყებამდე რამდენიმე დღით ადრე, World Rugby-მ ბორჯღალოსანთა ინგლისელ შერკინების მწვრთნელთან, გრემ როუნთრისთან ინტერვიუ გამოაქვეყნა. გთავაზობთ ამონარიდს ამ პუბლიკაციიდან.

„ოთხი მსოფლიო თასის მონაწილეს - ორჯერ როგორც მოთამაშეს და ორჯერ როგორც მწვრთნელს, გრემ როუნთრის სრულყოფილი ინფორმაცია აქვს 2019 წლის მსოფლიო თასზე „ბოჯღალოსანთა“ მეტოქეების შესახებ.

იაპონიაში საქართველო D ჯგუფში ავსტრალიის, უელსის, ფიჯისა და ურუგვაის წინააღმდეგ ითამაშებს, რაც ყოფილი ინგლისელი ბურჯისთვის, ფაქტობრივად, დეჟავუა, რადგან 2015 წლის მსოფლიო თასზე როუნთრი სწორედ ამ მეტოქეებს დაუპირისპირდა, როგორც ინგლისის მთავარი მწვრთნელის ასისტენტი.

ინტრიგა არ დაკარგულა, ვინაიდან 47 წლის სპეციალისტს ამჯერად ოპტიმისტური განწყობა აქვს. 2015 წელს ინგლისმა ავსტრალიასთან და უელსთან წააგო, ხოლო ფიჯისა და ურუგვაის მოუგო, რაც საკმარისი არ აღმოჩნდა და საკუთარ სამშობლოში მსოფლიო თასს ჯგუფური ეტაპიდან გამოეთიშა.

„რა თქმა უნდა, ეს ჯგუფი ჩემთვის ნაცნობია, რაც თავის მხრივ, აღტაცებულ განწყობაზე მაყენებს და მოდი, ვთქვათ, ამ შემთხვევაში, როცა საქართველო ფავორიტად არ მიიჩნევა, თავს ბევრად კომფორტულად ვგრძნობ“- განაცხადა მან.

წინა მსოფლიო თასზე ჯგუფში მესამე ადგილის დაკავებით, საქართველომ წლევანდელ მსოფლიოზე მონაწილეობის უფლება ავტომატურად მიიღო, აქედან გამომდინარე, „ბორჯღალოსნებს“ მოსამზადებლად საკმაო დრო ჰქონდათ და როუნთრისთვის ამ პროცესში მონაწილეობა დიდი პატივია.

„ქართული დნმ წარმოუდგენელი ფენომენია. მაგალითად, შემოდგომის ტესტებზე ჩვენ მონპელიეში ვემზადებოდით და წარმოიდგინეთ, სატრენაჟორო დარბაზში სიმძიმეები გაუთავდათ - ასეთი რამ მანამდე არ მენახა. ისინი შეუდარებლად ძლიერნი და, ამავდროულად, ტექნიკურად ძალიან მაგრები არიან“ - ამბობს როუნთრი დიდი აღტაცებით.

„თუმცა, საერთაშორისო რაგბიში ჩემი დიდი გამოცდილებით ვიცი, რომ მხოლოდ სტატიკით ფონს ვერ გახვალ. შერკინების გარეთაც მაგრები უნდა ვიყოთ. მსოფლიოს თასზე ისეთი გუნდები, როგორიც უელსი და ავსტრალია არიან, ბურთს მთელ მოედანზე ათამაშებენ.

დღევანდელ რაგბიში უნდა ითამაშო და ამის გარდა არსენალში ისეთი ძალა უნდა გქონდეს, რომელსაც საჭიროების შემთხვევაში გამოიყენებ, რათა მეტოქეებს ახალი გამოწვევა დაუპირისპირო და გათანგო“.

ახლა, მორკინალი ბევრ სხვადასხვა დონეზეც მოწოდების სიმაღლეზე უნდა იყო. უნდა გაითავისო, რომ სტატიკის იქითაც არსებობს სხვა როლები, რომლებიც უნდა შეისისხლხორცო და პატივი სცე - ისეთი დეტალები, როგორებიცაა კონტაქტის შემდეგ ეგრევე ფეხზე წამოდგომა და საქმეში ჩართვა. ეს ისეთი დეტალებია, რომელთა ზედმიწევნით კარგად შესრულება უმაღლეს დონეზე საჭირო სხვაობას გაძლევს“.

საქართველოს ნაკრები რაგბი ევროპის ჩემპიონატს ამ უქმეებზე, ტურნირში ყველაზე რთული მეტოქის, რუმინეთის წინააღმდეგ გასვლაზე თამაშით იწყებს. თუმცა, ამ დონეზე წლების განმავლობაში დომინირების შემდეგ, საქართველოს ნაკრების ზომა-წონას პირველი დონის გუნდების წინააღმდეგ თამაშით ზომავენ. აქედან გამომდინარე, შემოდგომაზე იტალიასთან ფლორენციაში 17:28 წაგება მათთვის საკმაო იმედგაცრუება იყო.

„იტალიაში ცუდად არ გვითამაშია. უბრალოდ, ტესტების პირველი მატჩი იყო და განსხვავებული კომბინაციებით ვითამაშეთ. რა თქმა უნდა, ძალიან კარგი იქნებოდა, ეს სერიის ბოლო თამაში რომ ყოფილიყო და არა პირველი. თამაშისას ადვილად ვთმობდით ბურთს. ამ მატჩში ჩვენ დიდი გაკვეთილი მივიღეთ და ბევრი რამ ვისწავლეთ

საქართველოს ნაკრების შერკინების მწვრთნელის კონტრაქტს ხელი რომ მოვაწერე, ცალი თვალით მსოფლიო თასისკენ ვიყურებოდი. წინა მსოფლიო თასზე მიღწეულის გათვალისწინებით, ალბათ, ბუნებრივია, რომ ჯგუფში მესამე ადგილის დაკავება ნამდვილად პროგრამა მინიმუმია.

მიყვარს ეს თამაში და გასაცემად ზღვა ენერგია მაქვს. საქართველოს ნაკრების შერკინების მწვრთნელობა ჩემთვის, ფაქტობრივად, ბუნებრივი მდგომარეობაა. ქართველი მორაგბეები საუცხოო პროფესიონალები არიან და მიმაჩნია, რომ 2019 წლის მსოფლიოს თასზე ბევრს გავაკვირვებთ“ - დასძინა გრემ როუნთრიმ.

ყოველდღიური სპორტული გაზეთი "ლელო"
1089
მკითხველის კომენტარები / 0 /
მსგავსი ამბები
რუბრიკის სხვა სიახლეები
;